Wysoka inflacija so na płaćiznu klasiskeje hodowneje jědźe wuskutkuje. Po wobličenjach Instituta němskeho hospodarstwa (IW) w swójbach k swjedźenjej kisałe běrny z kołbaskami sydaja. Přerěznje budu za to lětsa wo 23,4 procenty wjace zapłaćić dyrbjeć. W někotrych regionach je so klasikar samo wo nimale 30 procentow podróšił, wčera hospodarscy fachowcy rozprawjachu. Štóž chce mjenje pjenjez za běrnjacu solotej wudać, dyrbjał so majonezy wzdać a wariantu z kisałom a wolijom přihotować, institut poruča.

Štó je zawčerawšim pjeć milionow eurow w loće dobył? Tele prašenje zaběra tuchwilu statnu loteriju. Cedlku z ličbami je wosoba anonymnje w Hornjej Bayerskej wotedała. Dobyćerjej přisteji 5 018 021 eurow. Nanajpozdźišo hač do kónca lěta 2025 ma dobyćer chwile swoju kwitowanku zapodać.

Prjedy hač so na wčerawšim posedźenju Budyskeje měšćanskeje rady dalšim temam wěnowachu, mějachu radźićeljo při naprašowanjach wobydlerjow a informacijach wyšeho měšćanosty wjacore naležnosće na wědomje brać.

Budyšin (CS/SN). We wobłuku hodźiny naprašowanja wobydlerjow dźěše na wčerawšim posedźenju Budyskeje měšćanskeje rady mjez druhim wo Budysku hwězdarnju. Wo njej porěča wodźer po měsće a čłon spěchowanskeho towarstwa hwězdarnje Andreas Thronicker. Wón připowědźi, zo chce so wotnětka na kóždym posedźenju měšćanskich radźićelow wobdźělić, doniž hwězdarnja do wobsydstwa města njepřeńdźe. Thronicker argumentowaše, zo je hwězdarnja kubłanske zarjadnišćo. Hinak pak hač w šulach a pěstowarnjach dyrbja čestnohamtscy sobudźěłaćerjo we hwězdarni wšitko sami zapłaćić. Na zakładźe wučbnych planow zakładnych a wyšich šulow kaž tež gymnazijow Thronicker dopokaza, zo su tam astronomiske temy do wučbneho plana wšelakich rjadowniskich schodźenkow kruće zakótwjene.

Brüssel (dpa/SN). Naprašowanje za płunom milišeho wjedra dla zaso wotběra. Zawčerawšim bě so staw němskich płunowych składźišćow po informacijach europskeho płunoweho zwjazka GIE cyłkownje jenož hišće wo 0,1 procentny dypk na 87,2 procentaj znižił. Minjeny tydźeń bě to zymnych temperaturow dla na štyrjoch dnjach za sobu stajnje nad jednym procentom. 27. nowembra su w Němskej posledni dźeń płun składowali. Wot toho časa mnóstwo woteběra, tak kaž je w zymje z wašnjom.

So zapósłancam USA dźakował

Washington (dpa/SN). Ze skutkownej narěču před kongresom USA je so ukrainski prezident Wolodymyr Zelenskyj zapósłancam Zjednoćenych statow za jich podpěru přećiwo ruskej nadběhowej wójnje dźakował. „Najebać wšě wobćežnosće njeda so Ukraina podwolić. Ukraina je strowa a čiła“, wón wčera wječor před komoromaj parlamenta we Washingtonje zwurazni. Zdobom na to skedźbni, zo trjeba za dobyće dalše ćežke brónje, kotrež jemu USA přizwoli.

Twarić je dźeń a dróše