Wobstawaja na wobdźělenju
Rakety na lětanišćo třěleli
Kabul (dpa/SN). W afghaniskej stolicy Kabulu su njeznaći dźensa rano wjacore rakety do směra na lětanišćo třělili. Telewizijny sćelak CNN rozprawja wo pjeć raketach. Wo woporach abo škodach spočatnje žane informacije njepředležachu. Wotwobaranski system lětanišća je rakety, kotrež buchu ze sewjerneje kromy Kabula startowane, pječa wotpopadnył.
Aktiwistow na mjezy zajeli
Waršawa (dpa/SN). Skupina aktiwistow je w Pólskej spytała nowu, z kałateho grotu wobstejacu zawěru na mjezy Běłoruskeje přerězać. Dwanaće Polakow a Nižozemjana policija zaja. Jim wumjetuja, zo su „techniske zawěry na mjezy zničili“. Nutřkowny minister Mariusz Kamiński je akciju jako dospołnje njeakceptabelnu“ zasudźił a wotpowědne prawniske konsekwency připowědźił. Pólska zawěru twari, wumjetujo Běłoruskej, zo zaměrnje ćěkancow přez mjezu do Pólskeje a tak do Europskeje unije sćele.
Jenož hišće tempo 30
60 procentow ludźi šćěpjenych
Přijědu na wuchod
Ischinger: Z talibanami rěčeć
Taškent/Berlin (dpa/SN). Němski zwjazkowy minister za wonkowne naležnosće Heiko Maas (SPD) wupraja so za rozmołwy z Chinu a Ruskej wo krizy w Afghanistanje. Su prócowanja „wšitkich mjezynarodnje wažnych wobdźělnikow za blidom zhromadźić, při čimž je wažne, zo so tež Ruska a China wobdźělitej“, rjekny Maas dźensa na wopyće w uzbekskej stolicy Taškenće. Wón skedźbni mjez druhim na dźensa planowane wurjadne posedźenje Bjezstrašnostneje rady UNO runje k mjenowanej naležnosći w New Yorku.
Předsyda Mnichowskeje wěstotneje konferency Wolfgang Ischinger radźi, z militantno-islamskimi talibanami w Afghanistanje direktnje rěčeć. „We wonkownej politice dyrbiš w prěnim rjedźe z tymi rěčeć, kotřiž njesłušeja k přećelam“, rjekny Ischinger dźensa rano w rańšim magacinje sćelaka ARD. „Z přećelemi dźeš k wječeri. Z přećiwnikami, tež z komplikowanymi, tež ze złóstnikami, dyrbiš rěčeć.“ Ischinger so nadźija, zo rozmołwy UNO, hinak hač w padźe Syriskeje, tónraz něšto wunjesu.
Šule wjace njezawrěć
Kopenhagen/Genf (dpa/SN). Zawrjenje šulow za čas koronapandemije měješe po měnjenju Swětoweje strowotniskeje organizacije (WHO) za wuknjacych katastrofalne wuskutki. To njesměło so po lětnich prózdninach wospjetować, žadatej sej WHO a dźěćacy pomocny skutk UNICEF. Zhromadnje namołwjatej wonej knježerstwa Europy so wo to starać, zo wostanu šule najebać koronu wotewrjene. Tak měli so wučerjo a dźěći, starše hač dwanaće lět šćěpić dać. W rjadownjach měło dobre přewětrjenje zaručene być, rjadownje měli po móžnosći małe dźeržeć a šulerjow dyrbjeli prawidłownje testować.
Do europskeho regiona WHO słuša 53 krajow. Šula je přewšo wažna za duchownu strowotu a socialnu kompetencu dźěći, rěka w zhromadnej deklaraciji mjenowaneju organizacijow. „Pandemija je najkatastrofalniše přetorhnjenje šulskeho kubłanja w stawiznach zawinowała“, praji direktor europskeje wotnožki WHO Hans Kluge. Šule su wažny element, zo bychu so dźěći ze spokojnymi a produktiwnymi čłonami našeje towaršnosće stali, Kluge wuzběhnje. „Zawrjene šule runje tomu zadźěwaja.“
To a tamne (30.08.21)
Na wšě 380 kilometrow domoj nóžkował je pos w Francoskej. Do toho bě wón při dowolowej jězbje na přestawce při awtodróze twochnył. Po hodźinach čakanja dyrbještaj wobsedźerjej bjez njeho dale jěć. Něšto dnjow pozdźišo dóstaštaj wonaj foto psa wot susodow, kotřiž doma na jeju dom kedźbowachu. Na nim bě „Pablo“ widźeć, słaby, ale strowy. Swój dowol mandźelskaj hnydom skónčištaj, zo byštaj so nawróćiłoj.
Napřemoběh šlinkow su sobotu w Oldenburgu zarjadowali. Dobyćer wubědźowanja bě šlink z mjenom „Speedy Gonzales“. Wón trjebaše za 33 centimetrow dołhu čaru tři minuty a 28 sekundow. Zwěrjo dósta hłójčku solotje jako myto, jeho trenar Rudi trajnu kartu za delnjosakski filmowy festiwal „Fast and Furios – Back to the Culture“. Cyłkownje 25 šlinkow bě so wubědźowało.
Zeleni Harigej znapřećiwjeja
Předsydstwo wokrjesneho zwjazka Budyšin a frakcija Zwjazka 90/Zelenych w tudyšim wokrjesnym sejmiku znapřećiwjatej wuprajenjam w zjawnym lisće Budyskeho krajneho rady Michaela Hariga (CDU) zwjazkowej kanclerce a ministerskim prezidentam nastupajo politiku korony dla.
Budyšin (SN/at). „Ze zadźiwanjom“ su Zeleni w Budyskim wokrjesu zwuraznjenje Budyskeho krajneho rady Michaela Harig na wědomje brali, rěka we wčera wozjewjenej zhromadnej nowinskej informaciji wokrjesneho předsydstwa a frakcije w sejmiku.
Hinak hač Harig, kiž nadběhowaše w zjawnym lisće předwidźany kónc statneho financowanja spěšnotestow na koronu, maja Zeleni tajki krok „za zastupujomny“. Wšako je mjeztym dosć poskitkow so šćěpić dać. Sakska ma z nimale 50 procentami čerwjenu latarnju nastupajo šćěpjensku kwotu w Němskej, tempo šćěpjenjow so wšědnje spomala. „Při tajkim, we wokrjesu nimo toho jara njejasnym połoženju datow njeje móžno jeno přibližnje z wjetšinoweje imunity wuchadźeć“, w nowinskej zdźělence rěka.
Wočakuja słabe žně
Berlin (dpa/SN). Zwjazk ratarjow Němskeje liči lětsa z přesłapjacymi žnjemi. Tak wočakuja 42,4 miliony tonow žita, nimale dwaj procentaj mjenje hač loni. Je to zdobom 4,7 procentow mjenje hač přerězk žnjow w lětach 2015 do 2020, zdźěli prezident zwjazka Joachim Rukwied. Wospjetne krupy a zliwki su pokazali, zo maja so tež ratarjo z wuskutkami klimoweje změny bědźić. Kukuricy, cokorowej rěpje a zeleninje su spadki tyli. Płaćizny su so tohorunja zwyšili, štož je na dobro ratarskich zawodow.
Wjacore demonstracije zakazane
Berlin (dpa/SN). Policija w Berlinje je dalše planowane demonstracije přećiwnikow wobmjezowanjow koronawirusa dla zakazała. Dotal je sydom zarjadowanjow zakazanych, pruwowanja pak njejsu hišće wotzamknjene. Srjedu bě policija tři wulke demonstracije srjedź města zakazała, mjez nimi manifestaciju iniciatiwy prěkimyslerjow pod hesłom „Lěto swobody a měra“ na Dróze 17. junija před Braniborskimi wrotami. W zwisku z koronu běchu za sobotu 17 demonstracijow a njedźelu 14 přizjewili.
Z afriskimi krajemi rěčała
Zeman poskića Němskej milinu
Zwjazkowy prezident Frank-Walter Steinmeier přebywa na tři dny trajacym wopyće w susodnej Čěskej. Wčera je so wón z prezidentom Milošom Zemanom k rozmołwje zetkał.
Praha (dpa/SN). Čěski statny prezident Miloš Zeman je poćahi swojeho kraja k němskemu susodej „wulkotne“ mjenował. „Naše poćahi njeběchu hišće nihdy tak dobre kaž tuchwilu“, rjekny 76lětny po zetkanju ze Steinmeierom w Praze. Wosebje dźakowaše so Němskej za pomoc w koronapandemiji. Na wjeršku pandemije loni nazymu běchu lěkarjo Zwjazkoweje wobory we wojerskej chorowni w Praze wupomhali.
