Zwjazkowy sejm wobjednawa dźensa reformu struktury medicinskeho zastaranja. Z wotpowědnym zakonjom wotmysli wulka koalicija změnić zasydlenosć lěkarjow w Němskej. Nadzasta­ranje w husće wobydlenych regionach ma so skónčić, podzastaranje na wsach přewinyć.

Berlin (dpa/SN/K). Zjednoćenstwa regionalnych kasowych lěkarjow změja winowatosć, zarjadować terminowe serwisownje, zo bychu zawěsćeni, je-li trjeba, w běhu štyrjoch njedźel z přepokazanku termin pola fachoweho lěkarja měli. Njedyrbjało-li to móžno być, měła pacientej tež chorownja pomhać.

Berlin (dpa/SN). Cyberowa ataka na kompj­uterowu syć Němskeho zwjazkoweho sejma ma prawdźepodobnje masiwne sćěhi. Po rozprawach časopisa Spiegel njejsu specialisća přeco hišće zdokonjeli, wuskušowansku software znješkódnić. Hackerojo maja přistup k wšitkim systemam sejma a su přeco hišće aktiwni. Hižo je rěč wo totalnej škodźe. Kaž wupada, njebudu jenož software znowa instalować dyrbjeć, ale tež tak mjenowanu hardware dospołnje wuměnić. To by měsacy dołho trało a wjacore miliony eurow płaćiło. Zwjazkowy zarjad za wěstotu informaciskeje techniki (BSI) dawa mjeztym wulke dźěle parlamentariskich datow přez lěpje škitanu syć zwjazkoweho knježerstwa wobdźěłać. Fachowcy­ BSI měnja, zo njeda so syć sejma wjace wuchować a měła so spušćić. Hackeram je so poradźiło, přewzać tak mjenowanu zapisowansku słužbu zwjazkoweho sejma, do kotrejež je wjac hač 20 000 kompjuterow zapřijate.

Tak mjenowany čorny dźěłaćer je spytał swojeho šefa na hłownym cłownym zarjedźe wozjewić. Twarski dźěłaćer bě někotre tydźenje na wšelakich twarnišćach zasadźeny, njedóstawaše pak žanu mzdu. Zastojnicy wšak zwěsćichu, zo nima 34lětny scyła dowolnosć přebywanja w Němskej. Nětko­ ma kraj najspěšnišo wopušćić. Šef pak změje so ilegalneho přizwolenja dźěła dla zamołwić.

Jako slepy pasažěr bě 22lětny z nakładnym ćahom w Bayerskej po puću. 22lětny chcyše z awtami nakładowany ćah wužiwać, zo by wot Mnichowa do Strasbourga jěł. Lokomotiwnik młodeho Texasčana po něhdźe hodźinje jězby blisko Augsburga wuhlada, zadźerža ćah a přepoda młodźenca policiji. Muž njebě wopity a njesteješe tež pod drogami. Wón přizna, zo bě w Mnichowje na ćah zalězł. Nětko čaka na njeho pokuta.

Skóržba wotpokazana

Choćebuz (dpa/SN/ch). Zwjazkowe wustawowe sudnistwo je skóržbu přećiwo fuziji wysokeju šulow Choćebuz a Zły Komorow do dalokeje měry wotpokazało. Załoženje Braniborskeje techniskeje uniwersity Choćebuz-Zły Komorow lěta 2013 njeje tuž z wida sudnikow přećiwowustawne, kaž z wčera wozjewjeneho wobzamknjenja wuchadźa. Zdobom skru­ći sudnistwo prawa profesorow. Ministerstwo za wědomosć potajkim njesmě jim při zjednoćenju wysokeju šulow prosće přechodneho nawodu před nós sadźić. Podstupimske ministerstwo bě społnomócnjeneho zasadźiło, kiž měješe wysoku šulu hač do pomjenowanja za­łoženskeho prezidenta nawjedować.

Póstownicy dale stawkuja