SPD, Zeleni a FDP so na koaliciske zrěčenje dojednali – Lěwica kritiska

Berlin (dpa/SN). Po dojednanju wodźacych zastupnikow SPD, Zelenych a FDP na koaliciske zrěčenje wo wutworjenju po wšej Němskej prěnjeje tak mjenowaneje amploweje koalicije su nětko čłonojo a delegaća na rjedźe. Hižo dźensa chcychu so Zeleni swojich čłonow prašeć, hač koaliciskemu zrěčenju a personalnym planam nowe knježerstwo nastupajo přihłosuja. Wothłosowanje ma dźesać dnjow trać a digitalnje abo z listom móžne być. Za přihłosowanje dosaha jednora wjetšina. We wobłuku SPD a FDP maja delegaća spočatk decembra na stronskimaj zjězdomaj koaliciske zrěčenje wotžohnować.

Byrnjež w koaliciskich jednanjach wšitke tři strony kompromisam přizwolić dyrbjeli, je sej přichodny zwjazkowy kancler Olaf Scholz (SPD) wěsty, zo wšitke tři strony zrěčenju přihłosuja. „To sym jara optimistiski. Je to dobry wuslědk z wida wšitkich třoch stron“, rjekny wón wčera wječor w telewiziji ARD.

Nastupajo narodne mjeńšiny w našim kraju naćisk koaliciskeho zrěčenja SPD, Zwjazka 90/Zelenych a FDP kaž tež reakcije, wo kotrychž smy dźensa rozprawjeli, swěcu a sćin wotbłyšćuja. Jasne wuznaće, zo chcedźa amplowi koalicionarojo europsku wobydlersku iniciatiwu Minority SafePack na zakładźe jednohłósneho wobzamknjenja zwjazkoweho sejma podpěrać, je dobra powěsć. Předewšěm sada z naličenymi tudyšimi narodnymi mjeńšinami pak je porno tomu tak powšitkowna, zo móžeš wšitko abo docyła ničo do njeje nutř nje/interpretować. Tu nawjazuje tež kritika zapósłanca SSW w zwjazkowym sejmje. Pozicija Domowiny je łahodna a někotremužkuli abo někotrejžkuli snano amplowym koalicionaram přepřichilena. Naje­bać angažement Braniborskeje, Sakskeje a Schleswigsko-Holsteinskeje so próca wo mjeńšinowy artikl do Zakładneho zakonja w koaliciskim zrěčenju direktnje njejewi. Tónle fakt wšak móhła tež Domowina raznišo porokować. Axel Arlt

Najebać zawrjene adwentne wiki w Lipsku koronapandemije dla móža sej ludźo tež lětsa zaso woblubowane dźěćace šalki z motiwom pěskowčika kupić. Předawać chcedźa je, dołhož su na składźe, wot 1. decembra přez internetny portal abo w předawanišću na Lipšćanskim Hłownym torhošću. Nimo toho poskića tež normalne zelene winowe šalki. Lipšćanske hodowne wiki dyrbja runje tak kaž hižo loni korony dla wupadnyć.

Gitara Bruca Springsteena abo keyboard Eltona Johna: Za beneficnu akciju w Los Angelesu je tójšto sławnych hudźbnikow swoje instrumenty dariło. Přesadźować budu je 11. decembra, kaž awkciski dom zdźěli. Wunošk awkcije přewostaja organizaciji, kotraž hudźbne šule na juhu USA podpěruje, zo móhli tež chude dźěći na instrumentach hrać nawuknyć.

Budyšin (SN/bn). „Wutworić korporaciju zjawneho prawa je najbóle dowidźomna naprawa, kotraž by kolektiwnemu samopostajowanju Serbow najlěpje polěkowała. Wosobinsce tajki krok z wulkej sympatiju wobhladuju.“ Tak zjima fachowc za statne a ludowe prawo dr. Stefan Oeter z Hamburgskeje uniwersity swoje mysle nastupajo prašenje, kak hodźała so kulturna awtonomija Serbow zwoprawdźić a juristisce zaručić. Wosebity hósć a eksperta wčerawšeho seminara „Samopo­stajowanje Serbow w Sakskej“, internetnje wuhotowaneho wot wuběrka „wu­stawa a prawo“ Serbskeho sejma, poda pohódnoćenje wot iniciatiwy zestajeneho naćiska za „statne zrěčenje“, rjadowace poćahi mjez Zwjazkom kaž tež Sak­skej a Braniborskej a serbskim ludom. „Rozdźělnych přičin dla je mi naćisk problematiski. Sprěnja złožuje so na zrěčenja mjez statom a cyrkwjemi, štož mam za tola trochu přehnaty narok. Kmańšo drje by było so na wotpowědnych do­jednanjach, na přikład z uniwersitami abo hospodarskimi komorami, orientować. Zdruha měli jasnje mjez teritorialnej a personalnej awtonomiju rozeznawać.