Moratorij žadany
Škitej klimy přinošować
Brüssel (dpa/SN). Mjezynarodne financne zawody chcedźa nimale 130 miliardow dollarow za škit klimy mobilizować. K tomu wupraja so belgiska nowina „De Standaard“ dźensa, zo su pjenjezy, kotrež banki, zamóžni ludźo a fondsy za pensije přewostajeja, minimum toho, štož wočakuješ wot zamołwiteho předewzaća. Pjenjezy su dołho hižo za inwesticije předwidźane, kotrež Pariske klimowe zaměry podpěraja.
Migrantow na morju wumóžili
Calais (dpa/SN). W Doverskim zaliwje mjez Francoskej a Jendźelskej su wot wutory wječora 400 migrantow z nuzy wumóžili. Jedna wosoba, kotraž bě hižo we wodźe bjez wědomja, pak w přistawje zemrě. Migranća spytachu z čołmami Jendźelsku docpěć. Na pomocnej akciji wobdźělichu so łódźe francoskeje mariny, pobrjóžneje straže a dwaj helikopteraj. Wot spočatka lěta hač do kónc awgusta su hižo nimale 16 000 ludźi z Doverskeho zaliwa wuchowali.
Korona bytostna přičina
Aktiwisća „Extension Rebellion“ protestuja před zawodom banki JP ...
Merkel pomina k wjetšej kedźbliwosći
Berlin (dpa/SN). W koronakrizy starosće před nowym přiwótřenjom połoženja předewšěm w hladarnjach a regionach z razantnje stupacymi infekciskimi ličbami přiběraja. Amtěrowaca zwjazkowa kanclerka Angela Merkel (CDU) pominaše k wjetšej kedźbliwosći a wabješe znowa nuznje za wjace šćěpjenjow – tež jako wobnowjenje pola staršich ludźi. Wona je wuwědomiła, zo dyrbja při kritiskim wuwiću regionalnje z postajenjemi zakročić, kotrež su jenož pola nješćěpjenych trěbne. Strowotniski minister Jens Spahn (CDU) tłóči dale na wobšěrniše wjetše tempo při šćěpjenskim posylnjenju, tak mjenowanych „Boosterach“, a chce z praksowymi lěkarjemi a krajemi konkretne rozrisanja rozjimać.
Tež prezident RKI Lothar Wieler warnowaše před přiwótřenjom połoženja.
Sakska měła so wo bjezpłatne testy starać
Berlin/Drježdźany (dpa/SN). W zwisku ze sylnje stupacymi ličbami koronanatyknjenjow w Sakskej je zapósłanc zwjazkoweho sejma Torsten Herbst (FDP) krajne knježerstwo namołwił, so za to zasadźiło, koronatesty znowa bjezpłatnje zmóžnić. „Znajmjeńša we wokrjesach, kotrež maja wysoke ličby infekcijow, měł zaso poskitk bjezpłatnych testow za wšitke wobydlerki a wšitkich wobydlerjow być“, rjekny Herbst wčera w Berlinje.
Njewotwisnje wot šćěpjenjow je prawidłowne testowanje wažny instrument, zo hodźeli so natyknjenja zahe spóznać a infekciske rjećazy přetorhnyć. Tež dwójce šćěpjene wosoby móža so natyknyć a infekcije dale dawać.
Zhromadny koronakurs pytany
Berlin/Lindau (dpa/SN). Z 33 949 nowymi koronainfekcijemi je so telko ludźi w běhu dnja natyknyło kaž ženje do toho w Němskej. Paralelnje k nowemu rekordej pytaja ministrojo za strowotu Zwjazka a krajow wot dźensnišeho na konferency w Lindauje nad Bodamskim jězorom za nowym zhromadnym kursom za pandemiju w zymje. Mjez druhim chcedźa hač do jutřišeho diskutować, kak móža wjace ludźi za wobnowjace šćěpjenje motiwować. Tež testowa winowatosć w hladarnjach je tema. Hišće amtěrowacy zwjazkowy minister za strowotu Jens Spahn (CDU), je wčera znowa za tak mjenowane „boosterowe“ šćěpjenja wabił. Z jeho wida njeńdźe spěšnje dosć. Tohodla maja zwjazkowe kraje wšitkim ludźom w starobje nad 60 lětami list pisać a na to pokazać. Z krajow je namjet přišoł, wšitkich, kotřiž su starši hač 70 lět, pisomnje informować.
Wotewrjene je tež prašenje, hač maja so regionalne šćěpjenske centry za boosterowe šćěpjenje reaktiwizować. Wjacore kraje, Němski dźeń městow a zastupjerjo lěkarjow su namjet Spahna kritizowali.
Při pólskej mjezy njekontrolować
Berlin (dpa/SN). Dźěłarnistwo policije (GdP) nima kontrole při mjezy k Pólskej najebać jasnje zwyšeneje ličby njedowolenych zapućowanjow požadarjow azyla tuchwilu za trěbne. „Aktualne migraciske połoženje drje je chutne, přiwšěm pak jara zdalene wot situacije, kajkuž smy we wobłuku masoweje migracije w lěće 2015 dožiwili. Tak wokomiknje scyła žaneje přičiny njeje, nachwilnje namjezne kontrole přewjesć“, rjekny předsyda GdP za zajimy zwjazkoweje policije Andreas Roßkopf wčera.
Ze 120 hač do 280 bjez dowolnosće zapućowanymi migrantami na dźeń při cyłkownej mjezy k Pólskej wot Ahlbecka hač do Žitawy su hišće we wobłuku, w kotrymž njeje wysoke zapřimnjenje do pućowanskeje swobody Europskeje unije z namjeznymi kontrolemi wusprawnić, wón doda. Roßkopf měješe nastupajo połoženje při němsko-pólskej hranicy tónle tydźeń tež rozmołwu z tuchwilu jednacym zwjazkowym ministrom nutřkowneho Horstom Seehoferom (CSU) a z Dagmar Busch, nawodnicu wotrjada za naležnosće zwjazkoweje policije w ministerstwje.
Su potrjechene
Glasgow (dpa/SN). Na swětowym klimowym wjerškowym zetkanju su zastupjerjo wuwićowych krajow industrijne staty namołwili, zo bychu jich wustorkowanja škódnych maćiznow hač do lěta 2030 połojcowali a financne slubjenja dodźerželi. „Njemóžemy dlěje čakać“, rjekny Sonam Phuntsho Wangdi, zastupjer knježerstwa z Bhutana a rěčnik skupiny nanajmjenje wuwitych krajow wčera w Glasgowje. „My smy nanajmjenje k tutej krizy klimy přinošowali.“
46 krajow skupiny, w kotrychž je něhdźe miliarda ludźi žiwa, su po słowach Wangdija jenož za jedyn procent globalnych klimoškódnych wustorkowanjow zamołwite. Runočasnje su wone hižo nětko wšědnje wot změny klimy potrjechene. „Smy wotwisni wot toho, štož so tu rozsudźi“, Wangdi podšmórnje. Wón je zhromadźenstwo statow namołwił, połojcowanje parnišćowych płunow hač do lěta 2030 postajić.
Zastupjerjo wuwićowych krajow běchu přesłapjeni, zo industrijne staty swoje w Pariskim klimowym zrěčenju potwjerdźene slubjenje, kóžde lěto 100 miliardow dolarow k zmištrowanju klimoweje krizy přewostajić, hakle ze zapozdźenjom docpěja.
To a tamne (04.11.21)
Wuměnkar pyta woteběrarjow za tysacy dekoraciskich swini. „Bywša dźěćaca stwa wupada kaž chlěw“ zdźěli 85lětny wuměnkar z Kölna. Jeho žona Hannelore, kotraž loni zemrě, bě je něhdy zběrała. Hač škleńčane abo železne swinje abo pleńčatka – w kóždej wariaciji so po domskim waleja. Nětko chce wuměnkar je wotbyć a dźěl dobytka darić, na přikład na wopory popławjenja w Ahrtalu. Za to pyta nětko kupcow.
Zmužity juwelěr wuhna paducha z retlom w sewjernorynsko-westfalskim měsće Kleve. Kaž policija zdźěli bě njeznaty překupcej z nožom hrozył a sej pjenjezy z kasy žadał. Tutón so spočatnje zady tejki schowa, tola potom paduchej z drjewjanym kijom hrožeše. Na to paduch bjez rubizny twochny. Reakcija juwelěra běše zmužita, ale tež riskantna, praji rěčnica policije. „To by so tež nimo kulić móhło – znajemy dosć tajkich padow.“
Dalše miliardy za podpěru GKV
Berlin (dpa/SN). Zakonske chorobne zawěsćenje (GKV) ma w nowym lěće přidatnu podpěru sydom miliardow eurow dóstać, zo bychu přinoški stabilne wostali. To předwidźi postajenje strowotniskeho ministra Jensa Spahna (CDU), kotrež je nadawki wukonjacy kabinet dźensa wobjednał. W přezjednosći z financnym ressortom ma podpěra za GKV klětu na 28,5 miliardow eurow rozrosć. Zwjazkowy sejm ma tomu hišće přihłosować.
Najćeše wohroženje wobstaća
Sarajewo (dpa/SN). Hladajo na prócowanja wo wotšćěpjenje w bosniskej dźělnej Republice Srpskej warnuje načolny zastupjer mjezynarodneho zhromadźenstwa w Sarajewje, Christian Schmidt, před strašnej eskalaciju. „Bosniska-Hercegowina je ze swojim najćešim eksistencielnym wohroženjom powójnskeje periody konfrontowana“, piše němski diplomat w swojej najmłódšej rozprawje swětowej wěstotnej radźe Zjednoćenych narodow.
NRW tež hižo za 2030 zwólniwa
