Berlin (dpa/SN). Zwjazkowa kanclerka Angela Merkel (CDU) je wčera po informacijach knježerstwa z ruskim prezidentom Wladimirom Putinom telefonowała. Jedna z temow bě rusko-němski płunowód Nord Stream 2. Kanclerka rozłoži Putinej w tym zwisku kompromis, kotryž běchu USA a Němska do toho wujednali. W prěnjej reakciji chwaleše rěčnik Krje­mla „konsekwentne zasadźenje němskeje strony“ při zwoprawdźenju „ryzy ho­spodarskeho projekta“, kiž polěkuje energijowej wěstoće Němskeje, kaž rěkaše.

Němska a USA běchu so po lěta trajacej zwadźe na kompromis dojednali. Płunowód ma so dotwarić, bjez toho zo USA dalše sankcije wukazaja. Z nim dóstawa Němska zemski płun z Ruskeje. Z nowej pipelinu wobeńdu Ukrainu, kotraž je na srědki z transita płuna pokazana. Chłostanja přećiwo Ruskej měli so hakle postajić, hdyž wona płun jako srědk po­litiskeho ćišća nałožuje. Wonkowny minister Heiko Maas (SPD) reaguje woló­ženy na dojednanje a mjenuje je „konstruktiwne rozrisanje“.

Sakski krajny sejm połoženje w koronakrizy rozjimał

Drježdźany (dpa/SN). Minister za hospodarstwo Sakskeje Martin Dulig (SPD) ma pobrachowacu zwólniwosć ludźi, so přećiwo koronawirusej šćěpić dać, za wulke riziko. Sakska steji nastupajo kwotu šćěpjenja po wšej Němskej na poslednim městnje, rjekny wón wčera w krajnym sejmje. „To je strach za přichodnu nazymu.“ Dulig apelowaše na zapósłancow, so zhromadnje za škitne šćěpjenje přećiwo koronje zasadźeć, zo by šćěpjenska zwólniwosć zaso přiběrała. Šćěpić so dać je tež akt solidarity napřećo tym, kotřiž njemóža so šćěpić dać. „Trjebamy hišće dalšu motiwaciju“, sakski hospodarski minister wuzběhny. Ličby infekcijow zaso přiběraja. Móžemy so jenož nadźijeć, zo njedóńdźe k dalšej žołmje a nowemu lockdownej. Zaměr wostanje, dalšim infekcijam zadźěwać a pandemiju dalokož móžno wobmjezować.“

Snano njeje to zamołwitym w USA hišće nichtó rjekł: Płunowód Nord Stream 2 mjez Ruskej a Němskej njeje poprawom ničo noweho. Lětdźesatki dóstawa Němska – a z njej wša zapadna Europa – zemski płun z Ruskeje, a to spušćomnje. Hišće ni­hdy njejsu wottam Němskej „honač zawjertli“, zo bychu někajki ćišć wukonjeli. Čehodla potajkim tajke hroženje ze sankcijemi? A scyła: Čehodla trjebamy dowolnosć USA za projekt energetiskeho zastaranja Němskeje a zapadneje Europy? Prašeja so nas we Washingtonje, hdyž chcedźa nowy płunowód z Kanady do USA twarić? Snano tež hospodarske zajimy za tym tča. Móže być, zo chcedźa nas pohnuć radšo ameriski frackingowy płun kupować, kaž to Pólska čini. W přistawje Świnoujście nad Baltiskim morjom twarja mjeztym připrawu za składowanje woneho płuna, kotryž dowožuja z łódźemi ze 6 000 kilometrow zdaleneje Ameriki. Njemóžu so dopomnić, zo su so USA w tym padźe Němsku za dowolnosću prašeli. Marko Wjeńka

W Choćebuskim měšćanskim muzeju wotewru jutře wječor nowu wosebitu wustajeńcu wo stawiznach industrijneje kultury w Delnjej Łužicy. Tak tam mjez druhim dokumentuja, kak je industrija Łužicu změniła. Časowy wobłuk přehladki saha hač do 3 000 lět wróćo. Muzej je wustajeńcu zhromadnje z krajnym zarjadom za hladanje pomnikow a archeologiskim krajnym muzejom natwarił. Jednu z rumnosćow wěnuja tekstilnej industriji Delnjeje Łužicy. Tam wustajeja tež krosna za tkaće pře­strjencow z časa wokoło lěta 1900, kaž je direktor muzeja Steffen Krestin (hlej wobraz) do oficialneho wotewrjenja muzeja nowinarjam přeradźił. Foto: Michael Helbig