Berlin (dpa/SN). Nižozemski kralowski porik je dźensa na statny wopyt do Berlina přijěł. Willem-Alexander a Máxima wostanjetaj tři dny w zwjazkowej stolicy. K zahajenju witaše jeju zwjazkowy prezident Frank-Walter Steinmeier z wojerskej ceremoniju před hrodom Bellevue. Nimo politiskich rozmołwow steja tež wopyty kulturnych a wědomostnych institucijow na programje. Je to prěni statny wopyt wobeju w Němskej.
Orbán „njepřećel“ žurnalistow
Berlin (dpa/SN). Organizacija Reporterojo bjez mjezow wjedźe na swojej prawidłownej lisćinje „Njepřećeljo nowinarskeje swobody“ prěni króć tež knježerstwoweho šefa z Europskeje unje: madźarskeho ministerskeho prezidenta Viktora Orbána. „Po tym zo je Orbán ze swojej stronu Fidesz lěta 2010 móc přewzał, su woni madźarsku medijowu krajinu krok po kroku pod kontrolu přinjesli“, rěka w dźensnišej zdźělence zjednoćenstwa žurnalistow.
Wulke njewjedra zachadźeli
Münster (dpa/SN). Skeptiske zhladowanje swětoweje cyrkwje na tuchwilny reformowy proces w Němskej ma po słowach Münsterskeho biskopa Felixa Genna tež něšto z němskej zašłosću činić. „Wobsteji strach, zo nas Němcow w swětowej cyrkwi jako tych wobhladuja, kiž po zdaću wšitko lěpje wědźa hač druzy“, rjekny Genn katolskemu internetnemu magacinej Kirche + Leben. Wón před tym warnuje to pohódnoćić. „Hdyž nastanje zaćišć, zo my Němcy wšitko zdokonjamy a wy tamni to snano tež něhdy docpějeće, by to fatalne a jara strašne było. Wostanjemy poćežowany lud z poćežowacym herbstwom.“
Reformowy proces synodalneho puća ma najwjace katolikow Němskeje za dawno trěbny. W druhich krajach su zdźěla jara skeptiscy a na Němsku „křiwje hladaja“, Genn zwěsća. Při synodalnym puću dźe wo pozicije žonow w cyrkwi, wo katolsku seksualnu moralku, wo wobchadźenje z mocu a wo celibat. Vatikan bě so wospjet kritisce k planowanym reformam wuprajił.
Drježdźany (dpa/SN). Móžneho chłostanskeho přesćěhowanja dla je wuběrk Sakskeho krajneho sejma za jednaćelski porjad a imunitu minjeny pjatk tomu přihłosował, imunitu zapósłancow Lěwicy Juliany Nagel a Marca Böhmy zběhnyć. Wobaj běštaj so kónc nowembra 2019 na protestach hibanja „Ende Gelände“ w brunicowej jamje Schleenhain wobdźěliłoj. Srjedźoněmska brunicowa akciska towaršnosć Mibrag bě jeju na to ranjenja domjaceho měra dla wobskoržiła.
Böhme, kiž je zdobom zastupowacy frakciski šef, minjeny pjatk na to dopominaše, zo bě so protest swój čas měrniwje wotměł. „Njejsmoj demonstraciju nawjedowałoj abo organizowałoj. Samo-zrozumliwje pak sympatizujemoj z naležnosću spěšneho skónčenja zmilinjenja brunicy a mjezynarodneje klimoweje sprawnosće a smój demonstraciju tuž jako wobkedźbowarjej přewodźałoj.“
Berlin (dpa/SN). Społnomócnjeny zwjazkoweho knježerstwa za turizm Thomas Bareiß (CDU) je w debaće wo raznišich prawidłach za nawróćacych so dowolnikow před tym warnował, ludźi njetrjebawši znjeměrnjeć. Bareiß rjekny wčera powěsćerni dpa w Berlinje: „Płaća dźě hižo najrazniše wěstotne předpisy za tajke kónčiny, kotrež su noweje delta-warianty koronawirusa dla hižo wosebje strašne. Při tym měło wostać. Aktualna diskusija wo nowych wobmjezowanjach ludźi njewěstych čini a płaći dowěru.“
Hladajo na rozšěrjenje wosebje natykliweje warianty koronawirusa běchu sej wjacori ministerscy prezidenća wótriše postajenja žadali, mjez druhim podlěšenu karantenu za nawrótnikow.
Bareiß na to skedźbni, zo su z cyłozwjazkowymi rjadowanjemi zapućowanja jasne a zrozumliwe prawidła nastajene. Po tójšto kónčinach swěta móža ludźo tuchwilu wěsće pućować, hdyž naprawy hygieny na městnje a rjadowanja jednotliwych krajow wobkedźbuja. „Zo njebychmy to wohrozyli, dyrbjał kóždy hladajo na delta-wariantu wosebje kedźbliwy być a postajenja dodźeržeć.“
Na wšě 300 000 awtowych kilometrow zalutował je Robert Grein z badensko-württembergskeho Wertheima, dokelž hižo 30 lět wšědnje z čołmom na dźěło jězdźi. Za 15 mjeńšin je wón na tamnym pobrjoze Mohana w Bayerskej a jědźe wottam z kolesom poslednje kilometry hač na dźěło, wón rozprawja. Wosebje pozbudźace jemu je, hdyž rano w pjećich na rańšu změnu wotjědźe a słónco schadźa. Do wody padnył hišće ženje njeje.
76 hotdogow w běhu dźesać mjeńšin zjědł je dobyćer minjenych lět Joey Chestnut na tradicionalnym napřemojědźenju w New-Yorkskim wólnočasnym parku Coney Island a je tak swój lońši rekord wo jedyn hotdog polěpšił. Chestnut je wubědźowanje mjeztym 14. króć dobył. Na druhe městno přińdźe Geoffrey Esper z 50 kołbaskami w całće. Pola žonow doby Michelle Lesco z 31 hotdogami.
Berlin (dpa/SN). Lěkarske praksy Němskeje dóstanu přichodny tydźeń prěni króć telko šćěpiwa přećiwo koronawirusej, kaž su skazali. To rjekny šef předsydstwa zwjazka kasowych lěkarjow Andreas Gassen powěsćerni dpa. Praksy běchu z něhdźe 2,3 milionami dozow mjenje šćěpiwa skazali, hač je k dispoziciji. Nětko wuskutkuja so tež prózdniny w dźeń a wjace zwjazkowych krajach. Tójšto pacientow je na dowolu, a dale a wjac ludźi je mjeztym hižo šćěpjenych.
Merkel pola Johnsona a queen
London (dpa/SN). Zwjazkowa kanclerka Angela Merkel (CDU) poda so dźensa do Wulkeje Britaniskeje. Tam wočakowaštaj ju premierminister Boris Johnson a kralowna Elizabeth II. Planowane bě wuradźowanje z Johnsonom w jeho rezidency Chequers sewjernje Londona. Nawječor chcyše queen zwjazkowu kanclerku na hrodźe Windsor witać. Zetkanje z 95lětnej kralownu je Angeli Merkel wosebita česć, kaž jeje rěčnik zdźěli. Kanclerka chce so po tym puću z njej rozžohnować.
Žane wotprawjenja w USA