Ministerski prezident Michael Kretschmer chwali saksko-pólske styki

Wrócław (dpa/SN). Sakski ministerski prezident Michael Kretschmer (CDU) je mjeztym „cyle samozrozumliwe“ dobre poćahi ze susodnym pólskim regionom Delnja Šleska chwalił. Wuspěchi při hospodarskich a infrastrukturnych projektach kaž tež na polu kultury a slědźenja běchu stajnje zaso „móžne přez regionalnu zamołwitosć“, podšmórny sakski premier minjeny štwórtk na swojim prěnim wopyće Pólskeje we Wrócławju. „Dokelž móžachmy sami jednać a njetrjebachmy na centralny stat čakać“, je so poradźiło tójšto mjezu přesahowacych projektow zwoprawdźić, wón rjekny. Tohodla chcył so wón tež pola Europskeje unije za to zasadźeć, zo spěchowanje projektow tež w přichodźe decentralnje organizuja, „zo móžemy my jako region sami rozsudźić, kotre projekty su nam wažne“, Michael Kretschmer na nowinarskej konferency zwurazni.

Přihłosowanje čłonow SPD k wospjetnej wulkej koaliciji z CDU a CSU zmóžnja ­Angeli Merkel (CDU) štwórte kanclerstwo. A nětko maja socialdemokraća tež w ruce, raznym kritikarjam dotalneho njepomjenowanja ministerki abo ministra z wuchoda dla dopokazać, zo su jim tudyše zajimy a problemy wažne. Zo je mjez móžnymi mjenami tež te sakskeje ministerki za integraciju padnyło, zwjesela. Starosć wotpokazowarjow dalšeho zwjazkarstwa z uniju­ pak njeje přeco hišće ze swěta. Nichtó za to rukować njemóže, zo budu so ministrojo SPD w štwórtym kabineće Merkel emancipować a bóle za swoje pozicije tež wojować. Tohodla chcedźa so młodźi socialisća dale wo wobnowjenje najstaršeje strony w Němskej prócować. Zdawa so, zo je dorostowa organizacija jasnje kaž ženje do toho a hinak hač mnozy we wodźacych gremijach SPD spóznała, zo hrozy stronje w padźe njewobnowjenja hórki puć do njewažnosće. Axel Arlt

Pjenjezy w hódnoće 30 000 eurow su bjez swojeho wobsedźerja w Mnichowje z ćahom po puću byli. Muž bě po puću na wiki twjerdych pjenjez ćah wopušćił, drohotny wačok pak jědźeše dale hač na kónčnu staciju. Tam je železnicarka toboły połne pjenjez wuhladała a woteda je na Mnichowskim hłownym dwórnišću. Tam móžeše sej je zběrar pjenjez hišće w prawym času do zahajenja wikow wolóženy wotewzać.

Psycu z liščeje jamy wuswobodźiła je wohnjowa wobora w sewjerorynsko-westfalskim Mühlheimje. Foxterrier „Hope“ bě so při přechodźowanju z wobsedźerku w lěsu njejapcy zminył, po tym zo drje bě něšto wučušlił. Kameradojo trjebachu nimale pjeć hodźin, zo bychu zmjerznjenu zemju wokoło liščeje jamy wotstronili a žałosćacu 16lětnu psycu wobsedźerce skónčnje přepodać móhli.

Berlin (dpa/SN). Zwjazkowy sejm je dźensa chětro naležnje wo žadanju strony AfD debatował, němčinu jako oficialnu rěč kraja do Zakładneho zakonja Němskeje zapisać. Zastupnik AfD Stefan Brandner wopodstatni žadanje z přiběracym wohroženjom němskeje rěče přez anglicizmy we wšědnym žiwjenju kaž tež přez turkowšćinu a arabšćinu. Tamne strony AFD wumjetowachu, zo chce přiležnosć wužiwać, so profilować, kedźbnosć budźić a prowokować. Na kóncu su žadanje AfD wuběrkam dale posrědkowali.

Chcedźa Ukrainu wobrónić

Washinghton (dpa/SN). Knježerstwo USA chce Ukrainje raketywotwobaranske systemy a raketymjetaki w hódnoće 39 milionow eurow předać. Ukrainscy wojacy ­móhli přećiwo proruskim zběžkarjam na wuchodźe­ Ukrainy zasadźeć, piše Washington Post. Wo předani bróni ma nětko kongres USA rozsudźić. Knježerstwo w Kijewje bě wo brónje prosyło, kaž wonkowne ministerstwo we Washingtonje zdźěla. Jedna so mjez druhim wo system Javelin, kotryž móža wojacy nosyć a z kotrymž móža z ramjenja na rakety třěleć.

EU chce so cłam wobarać