Braniborska chce społnomócnjenych za serbske naležnosće w třoch delnjołužiskich wokrjesach a w měsće Choćebuzu w połnym přistajenju z krajneho budgeta płaćić. To předwidźi zakonska iniciatiwa knježerstwoweju frakcijow SPD w Lěwicy w Krajnym sejmje Braniborskeje.
Podstupim (SN/at). Z wjetšeje ličby komunow w serbskim sydlenskim rumje Braniborskeje wurostu dalše změny krajneho prawa. Frakciji SPD a Lěwicy tohodla měnitej, zo měł krajny zakonjedawar mjeńšinowe prawa Serbow předewšěm přez strukturne rozsudy zawěsćić. To wuchadźa z naćiska za Druhi zakoń wo změnje prawniskich předpisow wo prawach Serbow w kraju Braniborskej, kaž frakciji kónc tydźenja informowaštej.
Budyšin (SN/JaW). Budyski wokrjesny zwjazk Lěwicy podpěruje wobydlersku iniciatiwu Federalistiskeje unije europskich narodnych mjeńšin (FUEN) Minority Safepack k skrućenju mjeńšinowych prawow na europskej runinje.
Kaž z dźensnišeje nowinskeje zdźělenki wokrjesneho jednaćela strony Felixa Mustera wuchadźa, bě wokrjesne předsydstwo minjeny pjatk w sprjewinym měsće podpěru jednohłósnje wobzamknyło. Zapodał bě ju serbski zapósłanc Lěwicy w Sakskim krajnym sejmje a zdobom mjeńšinopolitiski rěčnik tamnišeje frakcije Hajko Kozel. „Předewšěm hladajo na tudyšu mjeńšinu Serbow mamy za wosebje wažne iniciatiwu podpěrać“, rěka w zdźělence zwjazka. „Najebać tu abo tamnu kritiku z našeje strony pak je Němska mjeńšinopolitisce derje nastajena. W druhich čłonskich statach EU tudyše standardy zdawna hišće njedocpěwaja“, w zjawnym wozjewjenju dale rěka.
Kaž Serbske Nowiny zhonichu, je njedawno tež předsyda frakcije Lěwicy w Sakskim krajnym sejmje Rico Gebhardt Minority SafePack podpisał.
Berlin (dpa/SN). Nawoda dźěłarnistwa ver.di Frank Bsirske žadanja za jasnym zwyšenjom mzdow w zjawnej słužbje dale zakituje. Do zahajenja tarifowych jednanjow je wón dźensa w rańšim magacinje telewizije ZDF na to skedźbnił, zo maja přistajeni Zwjazka a komunow wot lěta 2000 mjeztym zastatk štyrjoch procentow hladajo na wuwiće mzdow w hospodarstwje. Ver.di žada sej za 2,3 miliony přistajenych zjawneje słužby šěsć procentow wjace mzdy, znajmjeńša pak 200 eurow wjace wob měsac.
Nowe nalěty a dalše wopory
Damaskus (dpa/SN). Najebać žadanje Bjezstrašnostneje rady UNO za přiměrom w Syriskej je při nowych nalětach na region zběžkarjow w Ghuta znajmjeńša dźesać ludźi zahinyło, kaž syriscy aktiwisća rozprawjeja. Mjez woporami su tři dźěći. Tak je so ličba smjertnych woporow minjene dny na wjace hač 500 ciwilistow powjetšiła. Wuchodny dźěl regiona Ghuta je jedna z poslednich kónčin Syriskeje pod kontrolu zběžkarjow. Jednotki knježerstwa ju wot lěta 2013 woblěhuja. Humanitarne połoženje za ciwilnu ludnosć je tam mjeztym dramatiske.
Němska kritizowana
Berlin (dpa/SN). Na swojim cyłoněmskim zjězdźe chcyše CDU dźensa w Berlinje wo koaliciskim zrěčenju wothłosować, kotrež bě wona poboku CSU minjene tydźenje z SPD wujednała. Powšitkownje wočakowachu, zo so delegaća při wothłosowanju, planowanym w popoł- dnišich hodźinach, z wjetšinu za wujednany dokument wupraja. Na spočatku zjězda bě stronska předsydka a zwjazkowa kanclerka Angela Merkel kompromis přećiwo kritikarjam ze swójskich rjadow zakitowała.
Na dnjowym porjedźe steješe nimo toho wažna personalija: Dotalna posaarska ministerska prezidentka Annegret Kramp-Karrenbauer měješe so po woli zwjazkoweje kanclerki z nowej generalnej sekretarku stać.
Angela Merkel bě wčera lisćinu nowych ministrow předstajiła a kabinet widźomnje womłodźiła. Tak chce swojeho 37lětneho kritikarja Jensa Spahna za strowotniskeho ministra powołać. Zastojnstwo noweje ministerki za kubłanje ma 46lětna Anja Karliczek přewzać.
Wo přenocowanje w policajskej celi prosył je wopity muž w badensko-württembergskim Rheinfeldenje. Přičina bě zwada z mandźelskej, kaž 34lětny zastojnikam rozłoži. Wón so boješe, zo zwadu namócnje skónči. Dokelž běchu policisća tajkeje njewšědneje próstwy dla skeptiscy, jědźechu k bydlenju muža. Po tym bě wšitko jasne: „Próstwu mandźelskeho smy spjelnili a jeho na policajski rewěr dowjezli“, rěka w rozprawje.
Kurjenc w palasće prezidenta chcedźa prawje bórze w Parisu zarjadować. To je francoski prezident Emmanuel Macron připowědźił, po tym zo běchu jemu na ratarskich wikach w stolicy kokoš darili. Tak chcył so wón nětko z jejemi sam zastarać. Najprjedy pak dyrbja zaručić, zo njezměje kokoš problem z psom, kotrehož bě sej Macron w awgusće ze zwěrjatownje do palasta přiwjezł.
Podrězane štomy w najprěnjotnišim lěsu Europy su Pólsku hač na sudnistwo EU přinjesli. Kraj drje je dźěła najprjedy raz zastajił, wobswětoškitarjo pak warnuja: Strach wo přirodne namrěwstwo UNESCO a jeho škitane družiny zwěrjatow njeje hišće přewinjeny.
Luxemburg/Białowieża (dpa/SN). Pólskej hrozy w rozestajenju nastupajo podrězane štomy w přirodoškitnej kónčinje Białowieża poražka na Europskim sudnistwje. Zamołwity generalny prawiznik EU je wutoru wusprawnjenja knježerstwa we Waršawje wotpokazał a zwěsćił, zo Pólska prawo Europskeje unije rani. Wusud wšak wočakuja hakle za něšto tydźenjow.
Brüssel (dpa/SN). Na wosebitym wjerškowym zetkanju wo přichodnych nadawkach a financowanju Europskeje unije, kotrež so dźensa w Brüsselu zahaji, su wótre rozestajenja wotwidźeć. Pólske knježerstwo raznje wotpokazuje, rozdźělowanje pjenjez EU z wuměnjenjemi kaž z přiwzaćom ćěkancow zwjazać. To kaž tež dodźerženje europskich hódnotow bě němska zwjazkowa kanclerka Angela Merkel (CDU) wčera namjetowała.
Najprjedy bjez wuslědka
New York/Damaskus (dpa/SN). Wosebite posedźenje Bjezstrašnostneje rady UNO konflikta w Syriskej dla skónči so wčera wječor w New Yorku bjez dojednanja na přiměr. Diplomaća maja wothłosowanje po dalšich wuradźowanjach dźensa za móžne. Šwedska a Kuwait běštej naćisk rezolucije za 30dnjowski přiměr a za přistup humanitarnych pomocnikow zapodałoj. USA signalizuja přihłosowanje. Ruska předležacy naćisk njepodpěruje a zapoda namjety za změny.
Walentin Falin zemrěł
Lipsk (dpa/SN). Wo jězbnych zakazach jako móžnym instrumenće přećiwo přewjele wotpłunam, kotrež strowoće škodźa, Lipšćanske Zwjazkowe zarjadniske sudnistwo hakle přichodnu wutoru rozsudźi. Miliony mějićelow dieselowych wozydłow a wobydlerjow w městach z přewysokimi emisijemi w powětře dyrbja hišće něšto dnjow wočaknyć. Wčera předwidźany wusud Lipšćanskich sudnikow bu přestorčeny, dokelž trjebachu za wěcowne rozjimowanje dlěje hač předwidźane, kaž předsydowacy sudnik Andreas Korbmacher rjekny.
Sakska njeje wot móžneho jězbneho zakaza potrjechena, kaž z wobswětoweho ministerstwa w Drježdźanach rěka. W Lipsku a Drježdźanach njebuchu loni hranične hódnoty wustorka škódnych dusykow překročene.