Budyšin (SN). Wosebita komisija je wčera w Budyšinje mjeztym 3. koło wubědźowanja „Rěčam přichilena komuna – Serbska rěč je žiwa“ wuhódnoćiła a dobyćerjow wuzwoliła. Cyłkownje 14 městow a gmejnow je so tónkróć na nim wobdźěliło. To je runje telko kaž w minjenymaj přeběhomaj, rjekny Marja Michałkowa, předsydka Rady za serbske naležnosće Sakskeje, našemu wječornikej. Čłonojo rady su runje tak z čłonom komisije kaž wšitcy regionalni rěčnicy Domowiny. Wubědźowanje traje mjeztym 16 lět.

Posudźowali su wobdźělnikow w třoch kategorijach: Do prěnjeje skupiny słušeja tři wobdźělene města, a do druheje pjeć gmejnow, kotrež leža wosrjedź serbskeho sydlenskeho ruma. Třeća skupina wobsteji ze šěsć dalšich dwurěčnych łužiskich komunow.

Dobyćerjow chcedźa 2. februara w Slepom mytować, kaž Marja Michałkowa připowědźi. Wona bě wubědźowanje loni w februaru zhromadnje z prezidentom Sakskeho krajneho sejma Matthiasom Rößlerom zahajiła.

Sakski ministerski prezident Kretschmer zastupnikow cyrkwje přijał

Drježdźany (dpa/SN). Sakske krajne knježerstwo­ ma cyrkej za wažneho partnera w boju wo zhromadnosć w towaršnosći. Tudyši ministerski prezident Michael­ Kretschmer (CDU) dźakowaše so w dwuhodźinskej rozmołwje z biskopami w Sakskej aktiwnym katolskim diecezam a ewangelskej krajnej cyrkwi. Cyrkej je sylna zhromadnosć, kotraž so na najwšelakoriše wašnje na towaršnostnym wuwiću wobdźěla a tak k tomu přino­šuje, zo je kraj žiwjenjahódny, Michael Kretschmer wuzběhny.

Drježdźanskaj biskopaj Heinrich Timmerevers a Carsten Rentzing rěčeštaj wo „konstruktiwnym zetkanju“ a wo „přećelnej“ rozmołwje, kotraž je dowěru do přichoda spožčiła. Rozmołwa wotmě so w sakskej statnej kencliji.

... dyrbimy solidarni być z małymi ludami, kotrež trjebaja šansu, swójske naležnosće w sylnej měrje před wjetšinu zastupować móc. W europskich zrěčenjach je zakótwjene skrućenje mjeńšinowych prawow bóle wobkedźbować, tež na runinje EU. Prócowanja to hišće raz podšmórnu. Njeměli tež na serbske zajimy zabyć. Swójske wobsahi w měrje wulkich narodow poskićeć je wo tójšto wobćežniše. To měli w spěchowanskich směrnicach sylnišo wobkedźbować. Jednory přikład je wudaće knihi: Nałožena próca němskeje a serbskeje knihi je podobna, mnóstwowy nakład a cyłkowny dobytk pak chětro rozdźělnej. Při wotwobaranju tajkich njedostatkow přeju wšěm prócowarjam wjele wuspěcha.

Konfeti budźe zakazany na lětušim póstniskim ćahu w Stuttgarće 13. februara. Hłowna přičina su wulke rjedźenske kóšty na Hrodowym naměsće, kotrež njesłuša městu, ale krajej, kaž zarjadowar ćaha informuje. Tež w druhich městach ma tajki zakaz płaćić. Karnewalisća su wězo přesłapjeni: Zanjerodźenja, kotrež nory zawostajeja, njejsu dawno tak wulke kaž silwester.

Před črijowym wobchodom w Berlinje přenocowali su wjacori zajimcy, dokelž chcychu sej dźensa na kóždy pad nowe płatowe sportowe črije kupić, kotrež płaća zdobom jako jězdźenka w podzemskej železnicy, tramwajkach a busach Berlinskich wobchadnych zawodow. Črije zhotowjerja Adidas su w stilu poćehnjenja sedłow podzemskeje zhotowjene. Pře­dawane budźe jenož 500 eksemplarow za 180 eurow.