Zapasena šansa
Zwada mjez Němskej a Turkowskej by zwjazkowemu knježerstwu dobra składnosć być móhła, němskich wojakow domoj zwołać a wonu dwělomnu akciju, z kotrejž pječa bój přećiwo terorowej milicy Islamski stat (IS) podpěruje, skónčić. Ludoprawnisce je jasne: Němske wojerske lětadła nimaja w syriskim powětrowym rumje ničo pytać, dokelž je Syriska naje-bać krawnu wobydlersku wójnu přeco hišće suwereny stat a dokelž Němska za wone zasadźenje wotpowědny mandat Bjezstrašnostneje rady UNO nima.
Mjeztym je znate, zo su informacije, kotrež němske wuskušowanske lětadła nad Syriskej za antiterorowu koaliciju zběraja, tež krajam přistupne, kotrež IS na wšelakore wašnje podpěruja, byrnjež zaćichim. Hdyž tak chceš: Němska indirektnje Islamski stat z informcijemi zastaruje, štož wězo nichtó přiznać njebudźe. To měło so spěšnje skónčić. Marko Wjeńka
To a tamne (07.06.17)
Zwrěšćił je pospyt rekorda na kupje Rujany. Tam chcychu 16 metrow wysoki hród z pěska natwarić a do Guinnessoweje knihi rekordow zapisać dać. Při wudeskowanju bě so hród wčera puknył a so skónčnje sypnył. „Smy wšitcy jara zrudni“, zdźěli zamołwita festiwala skulpturow na Rujanach. Kónc meje běchu wjace hač 5 000 tonow prasowaneho pěska přiwjezli, zo móhł hoberski twar nastać. Nowonatwar njeje hižo móžny.
Muzej nimokulenych wunamakanjow je wot dźensnišeho w šwedskim Helsingborgu přistupny. Tam pokazuja eksponaty, wot kotrychž běchu sej producenća swój čas wulki wuspěch lubili: datowe nawoči Google Glass, składowak datow MiniDisc, zamróžene jědźe zhotowjerja zhubneje pasty Colgate abo parfim twarca motorskich Harley-Davidson. Koncerny tajke něšto rady zatajeja.
Primicu w Kulowje swjećił
Škit oceanow trěbny
New York (dpa/K/SN). K zazběhej konferecy UNO za škit morjow je jeje generalny sekretar António Guterres k tomu namołwjał, so za morja wobšěrnišo a skutkownišo zasadźeć. Delegacije z wjace hač 150 krajow wuradźuja hač do pjatka wo tym, kak zadźěwać ničenju morjow a jich žiwjenskich rumow. To stawa so mj. dr. z jich zanjerodźenjom z plastowymi wotpadkami, wułójenjom přewjele rybow abo kóncowanjom koralow.
Putin: Ruskej winu přisunyć
Pětrohród (dpa/SN). Ruski prezident Wladimir Putin je so wospjet wumjetowanjam wobarał, zo su ruscy hackerojo prezidentske wólby w USA manipulowali. Za to njeje dopokazow, rjekny wón ameriskemu sćelakej NBC. „Hackerojo móža wšudźe być, w Ruskej, Aziskej abo w Americe“, wón praji. Wón pokaza na móžnosć, zo móhli hackerojo w USA aktiwni być, zo bychu potom „wušiknje a profesionalnje“ winu Ruskej přisunyli. Putin móhł sej tole derje předstajić.
Raketa za čas konferency
Po wšej Wulkej Britaniskej su ludźo dźensa z mjeńšinu mjelčenja ...
Z mjeńšinu mjelčenja wopory wopominali
Poćahi su chětro hubjene
W sejmje serbsce rěčeli
Němski parlament wo naležnosćach mjeńšin wuradźował
Berlin (SN/MkWj). W zwjazkowym sejmje su minjeny pjatk wo mjeńšinach a jich rěčach debatowali, a to na lóštne wašnje bjez kóždeje politiskeje zwady. Při tym je so w najwyšim politiskim gremiju Němskeje tež serbsce rěčało.
Nastork k wuradźowanju bě 25. róčnica Europskeje charty regionalnych a mjeńšinowych rěčow, kotruž bě Europska rada 5. nowembra 1992 předpołožiła. Mjeztym je 25 krajow dokument ratifikowało. Němska bě jón 1998 připóznała a so zawjazała, mjeńšiny a jich rěče škitać.
Społnomócnjeny zwjazkoweho knježerstwa za nalěžnosće mjeńšin a wusydlencow Hartmut Koschyk (CSU) móžeše k zakónčenju swojeho zastojnstwa bilancować, zo je so na polu mjeńšin wjele docpěło. Wuraznje so wón knježerstwu dźakowaše, zo wotpowědne srědki přewostaja, zo móhł na přikład mjeńšinowy sekretariat w Berlinje dźěłać.
To a tamne (06.06.17)
Na wšě 27 900 eurow dołži šoferka awta mějićelej parkowanskeho domu na kupje Mallorca. Žona bě Volvo w měrcu 2009 w stolicy kupy Palma w zjawnym parkowanskim domje wotstajiła – a njeje awto hižo ženje wotewzała. Nětko, wosom lět pozdźišo, awto tam přeco hišće steji, „zapróšene, wopušćene a z mało powětrom we wobručach“, piše nowina Ultima Hora. Mějićel wot lěta 2012 přećiwo žonje skorži, zo by pjenjezy dóstał, dotal podarmo.
Z nócnym wołanjom w stilu alarmoweje připrawy je sowa w badensko-württembergskim Riedlingenje wospjet zasadźenje policije zawinowała. Naposledk wobydlerka w nocy na póndźelu zastojnikow alarma dla informowaše. Policisća pak njenańdźechu paducha, ale sowu, kotruž mjeztym znaja. Přičinu nócneho harowanja njeznaja, „dokelž je njemóžne, so ptačka woprašeć“.
Hotel nadpadnjeny
Manila (dpa/SN). Při nadpadźe na hotelowy a kazinowy kompleks w filipinskej stolicy Manili je dźensa znajmjeńša 36 ludźi zahinyło. Po słowach policije běchu so woni při wohenju zadusyli, kotryž bě pozdatny skućićel zawinił. Tež wón je žiwjenje přisadźił. Teroristiski pozadk policija dotal wuzamkuje. Přiwšěm wozjewi milica Islamski stat, zo bě njeskutk zawiniła.
Knježerstwo měło wotstupić
Kabul (dpa/SN). Po ćežkim atentaće w Kabulu protestowachu dźensa sta ludźi a žadachu sej, zo měło afghaniske knježerstwo wotstupić. Zdobom wuprajichu so za to, zo měli sobustawow talibanow a jich podpěrarjow z islamistiskeje syće Hakkani wotprawić. Při nadpadźe srjedu bě 90 ludźi žiwjenje přisadźiło, 460 so zrani. Na městnje njeskutka blisko němskeho pósłanstwa je so situacija dźensa přiwótřiła. Policija tuž do powětra třěleše, zo njebychu demonstranća prezidentski palast docpěli.
1 000 swobodnych městnow
