Drježdźany (dpa/SN). Bój přećiwo terorizmej je centralna tema dźensa zahajeneje konferency nutřkownych ministrow zwjazkowych krajow a Zwjazka w Drježdźanach. Wuradźowanja nawjeduje sakski nutřkowny minister Markus Ulbig (CDU). Wón bě sej hižo do zahajenja žadał, zo měli kraje a Zwjazk zhromadne dźěło zesylnić. To płaći na přikład tež při wobchadźenju z ćěkancami, kotřiž so we wšelakich zwjazkowych krajach ze wšelakimi identitami wudawaja. Tomu hodźało so zadźěwać, bychu-li so kraje a zwjazkowy zarjad za migraciju a ćěkancow mjezsobnje informowali.
Dalša wažna tema je wobchadźenje z tak mjenowanymi reichsbürgerami, kotřiž Němsku jako stat njepřipóznawaja a jeje zakonje ignoruja.
Protestujo přećiwo awtam přichilenym městam su sta kolesowarjow zdźěla abo samo cyle bjez drasty po Londonje jěli. World Naked Bike Ride wotměwa so kóžde lěto w mnohich městach, w Londonje je tale demo tradicionalnje najwjetša. Z nahim protestom pokazuja wobdźělnicy tež na strachi, kotrymž su kolesowarjo w městach wustajeni, hdźež po jich słowach přemało na dobro tohole wobswět škitaceho wobchadneho srědka činja.
Z awtom nana je třilětny w Bremenje do parkowaceju awtow zrazył. Hólčk bě wčera dopołdnja z klučikom awta w ruce swojej maćeri twochnył. Z dalokoposłužowakom wón awto wočini, zalěze do njeho a startowaše motor. Wóz na to zaskoči, prasny pak do pódla so parkowaceju awtow. Tak zražka jězbu třilětneho zdobom skónči. Na zbožo so nichtó njezrani, kaž w policajskim reporće steji.
Mexiko-city (dpa/SN). Zwjazkowa kanclerka Angela Merkel (CDU) je so dźensa we wobłuku swojeho tři dny trajaceho wopyta we Łaćonskej Americe do Mexika podała. Tam chce ze zamołwitymi w prěnim rjedźe wo wikowanskej politice prezidenta USA Donalda Trumpa rěčeć, kaž medije rozprawjeja. Wječor wočakuje němsku kanclerku prezident Enrique Peña Nieto. Wčera bě Merkel w argentinskej stolicy Buenosu Airesu.
UNO za diplomatiske srědki
New York (dpa/SN). Generalny sekretar UNO António Guterres je wšitkich wobdźělenych namołwjał, krizu w zwisku z Katarom diplomatisce rozrisać. Guterres sćěhuje połoženje w statach wokoło Persiskeho zaliwa „z wulkimi starosćemi“, zdźěli jeho rěčnik Stéphane Dujarric w New Yorku. Guterres wšitke kraje regiona namołwja, napjatosćam zadźěwać a „diplomatiske srědki“ zasadźić, zo bychu njedorozumjenja přewinyli.
Žada sej rozrisanje
London (dpa/SN). Britiska premierministerka Theresa May chce najebać bolostneje wólbneje poražki w zastojnstwje wostać a mjeńšinowe knježerstwo wutworić. Při tym so na to zepěra, zo ma podpěru sewjeroirskeje konserwatiwneje strony Democratic Unionist Party (DUP). Hišće w běhu dnja chce so May k britiskej kralownje Elizabeth II. podać a ju wo dowolnosć prosyć, knježerstwo wutworić směć. Tole zdźěli rěčnik britiskeje premierki dźensa připołdnju w Londonje. May bě při wčerawšich wólbach swoju dotalnu konserwatiwnu wjetšinu w delnjej komorje parlamenta přisadźiła. Mjeztym je tež nawoda britiskeje strony Labour Jeremy Corbyn připowědźił, zo chcył lěwicarske mjeńšinowe knježerstwo wutworić. Hladajo na přirost hłosow při wólbach je jeho strona woprawdźita dobyćerka, nawoda opozicije rjekny. May bě wólby w meji wukazała, zo by swoju wjetšinu w parlamenće rozšěriła a sej tak sylnu podpěru za bórzomne jednanja wo wustupje kraja z Europskeje unije zawěsćiła. Nětko nimaja ani konserwatiwni ani Labour wjetšinu.
W tutych spodźiwnych časach stajnje zaso dožiwjamy, zo so na swěće wěcy stawaja, kotrež njeby nichtó za móžne měł. Štó by sej runje před lětom předstajić móhł, zo so wjetšina wobydlerjow Wulkeje Britaniskeje woprawdźe rozsudźi, z Europskeje unije wustupić. Štó z nas je loni w nowembru woprawdźe chutnje wočakował, zo wobydlerjo USA woneho populista a managera Donalda Trumpa za prezidenta wuzwola? A nětko Theresa May w Londonje! Premierka měješe komfortabelnu wjetšinu w parlamenće za sobu a chcyše hladajo na jednanja wo brexit hišće wjace. Wona pak je so dospołnje zaličiła. May chcyše wjace stability a je chaos načiniła.
W Němskej wšak so tole při wólbach w septembru stać njemóže, sej mnozy mysla. CDU je we woprašowanjach dale stabilna, SPD porno tomu dale woteběra. A tola nas wčerawši dźeń wuči: Ničo njeje dźensa njemóžne. Marko Wjeńka
Ze swojim hroznym kostimom je młody muž njedaloko Hamburga wulkozasadźenje policije z 21 policajskimi awtami zawinował. Muž bě rano z čornej hawbu zakukleny w Seevetalu po puću, na čož ludźo policiju wołachu, myslo na hrožacy amokowy běh. Policistam 17lětny rozłoži, zo je so na temowym dnju šule jako agent FBI předrasćił. Policisća njemějachu za tajki žort žane zrozumjenje a wupisachu skóržbu. Snano dyrbi šuler tež kóšty wulkozasadźenja přewzać.
Žiwe wotpadki? Policistam w Offenburgu je při nócnej słužbje na chódniku joghurtowy nopašk napřećo přišoł. Jako nopašk zběhnychu, wuhladachu małeho jěža pod nim. Prawdźepodobnje bě wćipne zwěrjo do nopaška zalězło a w nim tčacy wostało. Zastojnicy jěža wuswobodźichu a w měšćanskim parku wusadźichu, bjez woneho nahłownika.