Žane zhromadne dźěło z BSW
Drježdźany (dpa/SN). Něhdyši funkcionarojo sakskeje CDU so dale přećiwo móžnej koaliciji swojeje strony ze zwjazkarstwom Sahra Wagenknecht (BSW) wuprajeja. Skupina wokoło něhdyšeho zapósłanca zwjazkoweho sejma Arnolda Vaatza w lisće krajne předsydstwo CDU před zhromadnym dźěłom z BSW warnowaše. Centrala CDU spis mjeztym wobkrući. Kaž ze zjawneho lista wuchadźa, maja bywši funkcionarojo CDU Sahru Wagenknecht za „Neobolschewistku“, kotraž jako galionowa figura wustupuje. Město zwjazka z BSW žadaja sej woni mjeńšinowe knježerstwo.
Podpisali su list mjez druhim bywši prezident krajneho sejma Matthias Rößler a bywši Drježdźanski wyši měšćanosta Herbert Wagner. Wonaj zdobom kritizuja, zo politikarjo CDU krajneho sejma murju přećiwo AfD rigoroznje zakituja.
Před něšto dnjemi běchu hižo něhdyši čłonojo CDU z Lipšćanskeho ruma, mjez nimi bywšej sakskaj ministraj Manfred Kolbe a Frank Kupfer, za dialog z AfD wabili.
Znowa aktiwistow lepili a zajeli
Grünheide (dpa/SN). Policija je blisko fabriki Tesle w Grünheide zakročiła a štyrjoch aktiwistow přechodnje zajała. Tući su sej na bagry zalězli. Kaž zastojnicy po kontroli personalijow zwěsćichu, su wšitcy štyrjo mužojo pod 30 lětami. Nimo toho přepytowaše policija, hač su dźěłowe nastroje wobškodźene, a pruwowaše chłostajomnych njeskutkow dla.
Přećiwnicy twornje, hdźež produkuja elektroawta Tesle, běchu wčera rano na bagry zalězli, zo bychu přećiwo rozšěrjenju twornje protestowali. Bagry běchu blisko twornje w lěsu, hdźež so tuchwilu rozšěrjenje fabriki přihotuje.
Po słowach braniborskeho wobchadneho ministerstwa tam pasmo realizuja, hdźež ma twarski puć Němskeje železnicy mjez krajnej dróhu a awtodróhu nastać. Předewšěm je naprawa za twar dwórnišća trěbna.
Hižo před někotrymi tydźenjemi běchu aktiwisća protesta přećiwo Tesli dla bager a štom wobsadźili. Tež wobydlerska iniciatiwa je so wutworiła, kotraž chce rozšěrjenju twornje zadźěwać.
Zniči Lafontaine CDU?
Jednanje zahajene
To a tamne (23.10.24)
Hižo dwě lěće přenocuje sorna na zapadźe Schleswigsko-Holsteinskeje w bydlenskej stwě swójby. Wodnjo pak so zwěrjo z mjenom Timmi z tamnymi sornami po přirodźe honi. Jako młodźato je swójba njezboža dla młodu sornu přiwzała a je z mlokom zastarała. Poprawom chcychu młodźato zaso do přirody pušćić, čemuž pak so Timmi wobaraše. Mjeztym ma zwěrjo transponder. Tak swójba stajnje wě, hdźe Timmi je. Tež hajnicy jeho na nastroju spóznawaja.
Kwas a wšitke wažne etapy swójskeho žiwjenja a stawiznow je dźensa 67lětny Italčan Luciano d’Adamo prosće zabył. Na 39 lět swojeho žiwjenja wón žanych dopomnjenkow nima. Njezboža w lěće 2019 dla ma amneziju. Na šmóratko abo měnu euro dyrbješe so najprjedy zaso zwučić.
Dźěłowy čas so změnja
Wiesbaden (dpa/SN). Podźěl dźělnje přistajenych je dale a wjetši a dźěłowy čas połnje přistajenych woteběra, zdźěli dźensa zwjazkowy statistiski zarjad ze sydłom we Wiesbadenje. Po dopóznaćach z najnowšeho mikrocensusa dźěłachu połnje přistajeni loni 39,8 hodźinow wob tydźeń. To je nimale hodźina mjenje hač w lěće 2011, jako přerěznje hišće 40,7 hodźinow dźěłachu. Dźěłowy čas dźělnje přistajenych pak je wot 18,2 na 21,2 hodźin wob tydźeń přiběrał.
Pjenjezy a złoto pod chorownju
Tel Aviv/Beirut (dpa/SN). Proiranska milica Hisbollah je po informacijach israelskeho wójska w bunkeru pod chorownju libanonskeje stolicy Beiruta pjenjezy a złoto w hódnoće wjacorych stow milionow dolarow schowała. Rěčnik wójska Daniel Hagari libanonske knježerstwo a mjezynarodne organizacije na to skedźbni, zo wužiwa Hisbollah tute zamóženje za teror a nadpady přećiwo Israelej. Israel ležownosć al-Sahel-kliniki na juhu Beiruta dokładnje wobkedźbuje.
Na Brics-zetkanje přeprosył
Mužojo z indoneskeje prowincy Aceh přepruwuja čołm z ćěkancami ...
Baltiske morjo wuznamne
Rostock (dpa/SN). Zwjazkowy minister za zakitowanje Boris Pistorius (SPD) je wuznam Baltiskeho morja za wěstotu Europy wuzběhnył. Tole je so z w zwisku z wójnu w Ukrainje, potajkim w bjezposrědnim susodstwje, hižo pokazało. Po słowach Pistoriusa je jasne, zo njeměri so wójna prezidenta Wladimira Putina jenož přećiwo Ukrainje. „Putinowy woprawdźity njepřećel je naše swobodne, njewotwisne a demokratiske wašnje žiwjenja“, minister za zakitowanje při wotewrjenju noweho hłowneho kwartěra Němskeje mariny w Rostocku wuzběhny.
Wěstota w Baltikumje je z wěstotu cyłeje Europy zwjazana. Z nowej centralu přewozmje namórniske stejnišćo nadawki NATO, kotraž chce swoju wobornosć při a na Baltiskim morju skrućić. Němska, kotraž ma w zwjazkarstwje NATO najwjetše stejnišćo při Baltiskim morju, je regionalnu nawjedowacu rólu hižo 1. oktobra přewzała. Pistorius pak zdobom zwurazni, zo so wo nowy hłowny kwartěr NATO njejedna.
Sonděrowanske rozmołwy zahajili
Drježdźany (dpa/SN). Sonděrowanske rozmołwy tak mjenowaneje „Koalicije ćernjowki“ z CDU, ze SPD a BSW so dźensa dopołdnja w sakskim krajnym sejmje zahajichu. Krajne předsydstwa třoch stronow běchu so hižo na kóncu minjeneho tydźenja za sonděrowanje rozsudźili. Jelizo je sonděrowanje wuspěšne, so koaliciske jednanje přizamknje.
Do toho běchu so zastupjerjo stronow wospjet na zeznawanske rozmołwy zešli. Wuslědk toho je papjera z pozicijemi. W nim běchu potencielni partnerojo cyły rjad zhromadnych temow dokumentowali – na přikład hladajo na kubłansku politiku, strowotu a hladanje kaž tež za ratarstwo.
W někotrych dypkach pak su sej zastupjerjo CDU, SPD a BSW tež njepřezjedni. Na přikład podpěruje CDU wutworjenje sakskeje namjezneje policije. SPD chce wjace pjenjez do kubłanja a infrastruktury inwestować. BSW ma měrowu politiku za centralnu temu při sonděrowanju.
Tež seksizm nazhonjeja
Katja Meier studiju wo žonach w komunalnej politice předstajiła
Drježdźany (dpa/SN). Sakska liči w Němskej do zwjazkowych krajow, hdźež je najmjenje žonow w politice zastupjenych. Podźěl wolenych žonow po lětušich komunalnych wólbach w Sakskej wučinja w gmejnskich a měšćanskich radach přerěznje 22 procentow, we wokrjesnych sejmikach jenož něhdźe 19 procentow. Tole wuchadźa ze studije, kotruž je sakska ministerka za runostajenje Katja Meier (Zeleni) wčera zjawnosći předstajiła. Najebać snadne polěpšenje po zańdźenych wólbach (něhdźe dwaj procentaj wjace) je swobodny stat daloko pod němskim přerězkom z něhdźe 30 procentami žonow.
Hladajo na wokrjesne sejmiki je podźěl žonow w rudnohórskim wokrjesu z dźewjeć procentami najniši. Najwyši je podźěl we wokrjesu Mišno z 23 procentami. Jasnje wjace žonow je podźělnje w měšćanskich radach Drježdźan (34 procentow), Lipska (39 procentow) a Kamjenicy (31 procentow) zastupjenych.
