Zeleni zwólniwi za knježerstwo
Berlin (dpa/SN). Sobupředsyda Zelenych Robert Habeck njewuzamkuje, zo so strona na nowej knježerstwowej koaliciji wobdźěli, dyrbjała-li wulka koalicija SPD, CDU a CSU zwrěšćić. „Smy zwólniwi zamołwitosć přewzać, hdyž so to wudani“, rjekny Habeck dźensa w rańšim magacinje ZDF. Hač zwjazkowa kanclerka Angela Merkel (CDU) prašenje dowěry staji, njemóžeše wón prajić. „W tajkim kołwrótnym času njemóžeš ničo wuzamknyć.“ Wot Merkel nawjedowane mjeńšinowe knježerstwo podpěrać njeby Zelenym „žadyn atraktiwny poskitk był“.
Kapitan před sudnistwom
Valletta (dpa/SN). Němski kapitan wuchowanskeje łódźe „Lifeline“ dyrbješe dźensa dopołdnja na kupje Malta před sudnistwo. Claus-Peter Reisch měješe so za wuchowanje 230 migrantow před libyskim pobrjohom wusprawnić. Powšitkownje wočakowachu, zo sudnistwo kapitanej wumjetuje, zo bě wukazy ignorował wuchowanje ćěkancow libyskej mórskej straži přewostajić. Maltaske knježerstwo chce łódź, kotraž njeje pječa porjadnje registrowana, sćazać.
Za hólcami dale pytaja
Z ćežkej techniku dyrbjachu wčera popołdnju nakładne awto z ...
Trump: EU tak złakaž China
Pólska dojednanjez Merkel dementuje
Waršawa (dpa/SN). Po Čěskej a Madźarskej tež Pólska prěje, zo je so ze zwjazkowej kanclerku Angelu Merkel (CDU) wo pospěšenym přewzaću migrantow dojednała. Rěčnica knježerstwa Joanna Kopcińska k tomu twitterowaše: „Nimamy žane dojednanje wo přewzaću požadarjow azyla z druhich krajow EU.“
Angela Merkel bě w spisu nawodnistwu koalicije w zwisku z wjerškom EU wo „přilubjenjach na politiskej runinje“ rěčała, tajke zrěčenje wotzamknyć. Při tym naliči wona 14 krajow, mjez druhim Pólsku, Madźarsku a Čěsku. Praha je tajke jednanja jasnje wotpokazała a samo dementowała, zo bě ju Němska wo tajke scyła prosyła.
Kopcińska doda: „Praktikujemy jara restriktiwnu azylowu politiku a ju tež njezměnimy.“ Pólska so dotal raznje spjećuje dalšich ćěkancow přiwzać.
Posledni pospyt CDU a CSU so dojednać
Berlin/Mnichow (dpa/SN). W raznej zwadźe w uniji azyloweje politiki dla chce CSU dźensa posledni króć spytać so z CDU tola hišće dojednać. Za to planuje wječor rozmołwu z wodźacymi zastupnikami CDU, na kotrejž chcedźa tež wo politiskim přichodźe předsydy CSU a zwjazkoweho ministra za nutřkowne naležnosće Horsta Seehofera rozsudźić. Tón bě wčera wječor njewočakowano připowědźił, zo wobě zastojnstwje złoži. Po intensiwnym wuradźowanju z nawodnistwom CSU w Mnichowje pak pozdźišo rjekny, zo chcył tola hišće raz z CDU rěčeć. Njedyrbjała-li rozmołwa žane wuslědki wunjesć, chcył Seehofer w běhu přichodnych třoch dnjow wotstupić, kaž připowědźi.
CDU bě minjenu nóc zwólniwosć k tajkej rozmołwje signalizowała. Zwjazkowy minister za hospodarstwo Peter Altmaier (CDU) pak je sej wěsty, zo njeje CDU połoženje přiwótřiła. „Mamy čiste swědomje“, rjekny Altmaier po nimale wosom hodźin trajacym wuradźowanju wodźacych gremijow CDU w Berlinje. „Smy wšitko činili, zo bychmy mosty twarili, a činimy wšitko, zo by unija hromadźe wostała.“
Rozsudna rozmołwa
Stara politiska zasada praji: Štóž připowědźi, zo chcył wotstupić, tón je faktisce hižo wotstupjeny. W tej njepřijomnej a chětro słabej poziciji pojědźe Horst Seehofer (CSU) dźensa do Berlina, zo by so ze zwjazkowej kanclerku Angelu Merkel (CDU) tola hišće dojednał. Wuslědk rozmołwy budźe rozsudny za přichod knježerstwa a za prašenje, hač dyrbimy hižo bórze zaso wolić hić abo nic.
Při tym njeńdźe tola hižo wo prašenje, štó ma lěpšu azylowu politiku: Merkel abo Seehofer. Merkel je swoju politiku ćěkancam napřećo dawno dospołnje změniła. Problem, wo kotryž so nětko wadźa, je skerje pódlanski, dokelž wón ani tysac ludźi wob měsac njepotrjechi. Hłowne prašenje je, štó so přesadźi: Wony bayerski law z Mnichowa abo kanclerka, kotraž wot lěta 2005 zastojnstwo wukonja a je minjene lěta hižo tójšto hubatych a hejatych kontrahentow „wotstroniła“. Seehofer budźe přichodny. Marko Wjeńka
To a tamne (02.07.18)
Do jastwa póńdu třo młodostni, kotřiž běchu loni w juhočěskim měsće Třinec-Guty starožitnu drjewjanu cyrkwičku zapalili. Po wusudźe Ostravskeho wobwodneho sudnistwa změja woni třiapoł, wosom a dźewjeć lět wotsedźeć. Najwyšu pokutu dósta naškarak zapalerstwa. Woheń načini škodu 20 milionow krónow. Historiska škoda njeje ani wobličomna. Prašani za motiwom njeskutka su wobskorženi zwjetša z ramjenjemi sukali.
Sto porow sněhakow su njeznaći z wupožčowarnje w badensko-württembergskim Blausteinje pokradnyli. Nimo toho wzachu tež hišće třiceći porow sněhakowarskich čriji a dalše wuhotowanje sobu. Policija trochuje škodu na 50 000 eurow. Dokelž porjedźernju w lěću lědma wužiwaja, njemóža ani rjec, hdy su paduši tam pobyli. Wobsedźer bě to hakle kónc tydźenja zwěsćił.
Dalše tři miliardy za ćěkancow
Brüssel (dpa/SN). Turkowska dóstanje wot EU dalše tři miliardy eurow, zo móhła syriskich ćěkancow zastarać. Na to su so statni a knježerstwowi šefojo wčera w Brüsselu dojednali, po tym zo běchu měsacy dołho wo tym diskutowali. Prěni pomocny paket třoch miliardow eurow je přetrjebany. Europska unija bě Turkowskej šěsć miliardow přilubiła.
Žadaja sej asistent wotbočenja
Berlin (dpa/SN). Zo by strach smjertnych njezbožow při wotbočenju woteběrał, chcył zwjazkowy sejm tak mjenowany wotbočenski asistent do wšitkich nakładnych awtow zatwarić dać. W frakcije přesahowacej próstwje so zapósłancy za to wuprajeja, elektronisku nowosć ručež móžno zasadźić. Tak chcedźa zwjazkowe knježerstwo namołwić, to w Němskej wukazać, dyrbjało-li so rozrisanje na europskej runinje dlijić. Na dróhach Němskeje stajnje zaso ludźo smjertnje znje- zbožeja, dokelž jich šoferojo nakładnych awtow při wotbočenju prosće njewidźa.
Pjećoch w redakciji zatřělił
EU azylowu politiku přiwótřa – Pro Asyl kritizuje
Brüssel (dpa/SN). Po dołhich a wobćežnych jednanjach su so statni a knježerstwowi šefojo Europskeje unije na swojim wjerškowym zetkanju minjenu nóc w Brüsselu na to dojednali, azylowe prawo přiwótřić. Přichodnje chcedźa na morju wuchowanych ćěkancow we wosebitych zawrjenych lěhwach we wobłuku EU zaměstnić. Hač zarjaduja podobne lěhwa tež w sewjernej Africe, dyrbja pruwować. Mjezy škitacu agenturu Frontex chcedźa zesylnić a wonkowne mjezy Europy lěpje škitać. Lěhwa maja na zakładźe dobrowólnosće krajow nastać.
Zwjazkowa kanclerka Angela Merkel (CDU) mjenowaše dojednanje 28 statnikow na zhromadny tekst „dobre poselstwo“. Runjewon euforisce reagowaše italski ministerski prezident Giuseppe Conte. Tón bě hrozył wjeršk blokować, njedyrbjała-li EU Italskej hladajo na ćěkancow skutkownišo pomhać.
