Dwě minuće žiwjenskeho časa za europsku wiziju
Zastupjerjo narodnych mjeńšin w Europskim parlamenće iniciatiwu Minority SafePack wot wšeho spočatka podpěruja. Do rjadu prěnich entuziastow słuša Pál Csáky, politikar Madźarow w Słowakskej. Wot 30. měrca 2007 běše wón předsyda strony madźarskeje koalicije SMK-MKP, wot lěta 2002 do 2006 naměstny ministerski prezident słowakskeho knježerstwa. Po wólbach w lěće 2006 zaćahny Pál Csáky wospjet jako zapósłanc do parlamenta. 13. junija 2010, dźeń po wólbach tehdyšeho słowakskeho parlamenta, wón wozjewi, zo njebudźe hižo jako předsyda strony SMK-MKP skutkować. W lěće 2014 wuzwolichu jeho za zapósłanca Europskeho parlamenta. Milenka Rječcyna je so z politikarjom wo iniciatiwje Minority SafePack rozmołwjała.
Kak docpěwa madźarska mjeńšina w Słowakskej, zo ludźo Minority SafePack podpěraja?
Minority SafePack podpisali
Zwickau/Berlin (RL/SN/JaW). Rada katolikow Drježdźansko-Mišnjanskeho biskopstwa podpěruje wobydlersku iniciatiwu Federalistiskeje unije europskich narodnych mjeńšin (FUEN) Minority SafePack. To je gremij jednohłósnje na swojej nalětnjej plenarnej zhromadźiznje minjenu sobotu w Zwickauwje wobzamknył. Čłonojo najwyšeho zastupnistwa lajkow w diecezy njejsu pak iniciatiwu jeno sami podpisali, ale pozbudźeja zdobom dalšich, so akciji přizamknyć a so tak sobu za prawa mjeńšin w Europje zasadźeć.
Radźe katolikow Drježdźansko-Mišnjanskeho biskopstwa přisłuša 40 ludźi. Su to woleni čłonojo z jednotliwych dekanatow a nadwosadnje skutkowacych katolskich towarstwow. Tež Towarstwo Cyrila a Metoda je w njej zastupjene. Dale su jednotliwe wosobiny do rady woleni, mjez nimi tohorunja zapósłanc Sakskeho krajneho sejma Marko Šiman (CDU).
Nahles: Nowe styki trěbne
Berlin (dpa/SN). Frakciska předsydka SPD Andrea Nahles ma pušćenje wonkowneho ministra USA Rexa Tillersona za „skerje iritěrowacy“ signal. Nětko su nowe sty- ki k administraciji we Washingtonje trěbne, zo by so hrožacej wikowanskej wójnje zadźěwało, rjekny Nahles telewizijnemu sćelakej n-tv. Tillerson bě prezidentej USA Donaldej Trumpej „přełahodny“ hladajo na Koreju abo Iran. Jeho wčerawše pušćenje je jej dopokaz, zo njemóžeš politiku Trumpa wobličić. Nowy wonkowny minister budźe šef CIA Mike Pompeo.
Ruska ultimatum ignoruje
London/Moskwa (dpa/SN). Ruska njeje na britiski ultimatum w padźe atentata z jědom na ruskeho agenta Sergeja Skripala reagowała. Hač ke kóncej wot britiskeje premierministerki Theresy May wukazaneho ultimatuma dźensa rano w jednej njeje žane stejišćo z Moskwy dóšło. Ruska bě zwoprědka připowědźiła, zo njewotmołwi, doniž probu jěda nima. May rozmysluje nětko wo móžnych sankcijach přećiwo Ruskej.
Kritizuja praksu spěchowanja
Angela Merkel znowa wuzwolena
Berlin (dpa/SN). Předsydka CDU Angela Merkel je znowa kanclerka Zwjazkoweje republiki Němskeje. Zapósłancy zwjazkoweho sejma su ju dźensa dopołdnja do zastojnstwa wuzwolili. 63lětna Merkel dósta 364 z cyłkownje 688 wotedatych hłosow, dźewjeć wjace, hač by trěbne było. Přiwšěm njejsu wšitcy zapósłancy noweje wulkeje koalicije CDU, CSU a SPD za nju hłosowali, wšako ma koalicija cyłkownje 399 mandatow. Bjezposrědnje po wozjewjenju wuslědka přez prezidenta sejma Wolfganga Schäublu wona zdźěli, zo wólby přijima. Merkel poda so na to direktnje k zwjazkowemu prezidentej Frankej-Walterej Steinmeierej, kiž jej na to wopismo pomjenowanja přepoda. Připołdnju je Schäuble kanclerku Angelu Merkel za jeje mjeztym štwórtu wólbnu dobu spřisahał.
Politiska debata na Hrodźe
Budyšin (SN/bn). Na přepjelnjenej małej žurli Budyskeho Dźiwadła na hrodźe su wčera we wobłuku rjada Friedricha Ebertoweje załožby „Přichod Budyšin“ prašenje „Kak budźe štó tu žiwy“ rozjimali. Diskutanća na podiju běchu intendant Němsko-Serbskeho ludoweho dźiwadła Lutz Hillmann, dr. Birgit Wolter z Berlinskeho Instituta za gerontologiske slědźenje a twarska měšćanostka Budyšina Juliane Naumann. Redaktor a korespondent dźenika Süddeutsche Zeitung za srjedźnu Němsku Cornelius Pollmer je rozmołwu wospjet moderěrował.
Wjac zašłosće hač přichoda
Łužiski forum w Běłej Wodźe wočakowanja spjelnił?
Budyšin/Běła Woda (SN/BŠe). Sakski ministerski prezident Michael Kretschmer (CDU) je minjeny štwórtk na prěni Łužiski forum do Běłeje Wody přeprosył. Něhdźe 300 ludźi je přišło, mjez nimi fachowcy z hospodarstwa, wědomosće a slědźenja, ale tež zastupjerjo wšelakich iniciatiwow a towarstwow. Pisana měšeńca potajkim, kotraž móhła wjele jednanskich polow wobswětlić.
To a tamne (14.03.18)
Njewjestu w ručnych putach wotwjedli su policisća w USA, a to po puću na kwas. 32lětna steješe po tukanju policije pod wliwom alkohola abo drogow a bě do toho w měsće Marana na juhu stata Arizona do wobchadneho njezboža splećena była, kaž medije rozprawjeja. K městnu njezboža přichwatani zastojnicy žonu zajachu a dowjezechu ju na policajski rewěr, zo bychu jeje krej přepytowali. Arizona ma sobu najrazniše zakonje nastupajo alkohol a drogi za wodźidłom.
W škleńčanej witrinje steji wot najnowšeho blido, za kotrymž bě bywši prezident USA Barack Obama lěta 2016 we vietnamskej stolicy Hanoiju něšto jědł. Nudlowy hosćenc „Bun Cha Huong Lien“ je so wot toho časa na hotowe kultnišćo wuwił. Mjeztym poskićeja tam „Obama-meni“: nudle z grilowanym swinjacym mjasom a zelowu poliwku z chilijom.
Ma zrozumjenje za Spahna
Berlin (dpa/SN). Społnomócnjeny zwjazkoweho knježerstwa za wuchodnu Němsku Christian Hirte ma zrozumjenje za dwělomne wuprajenja Jensa Spahna (CDU) w zwisku z podpěru Hartz IV. Hirte sam drje njeby to tak formulował, na druhim boku njejsu słowa Spahna „dospołnje wopačne“, rjekny wón rozhłosej RBB. Spahn bě ze swojim přispomnjenjom, zo ma z Hartzom IV „kóždy to, štož za žiwjenje trjeba“, z mnohich stron kritiku na so sćahnył.
Město Afrin wobkružene
Istanbul (dpa/SN). Nimale wosom tydźenjow po zahajenju swojeje ofensiwy přećiwo milicam kurdiskeje organizacije YPG na sewjeru Syriskeje su turkowske jednotki město Afrin wobkružili a je nětko woblěhuja. To zdźěla turkowska powěsćernja Anadolu, powołaca so na informacije wójska. Syriska wobkedźbowarnja za zachowanje čłowjeskich prawow pisa, zo je 300 000 ciwilistow zawrjenych. Knježerstwo w Ankarje zastopnjuje YPG jako teroristisku organizaciju a twjerdźi, zo wojerske zasadźenje Turkowskeje w Syriskej mjezynarodne prawo njerani.
Bomba pódla kolony premiera
