Nadpad na uniwersitu
To a tamne (25.08.16)
Wjace hač 17 000 zwěrjatow Londonskeje coologiskeje zahrody su wčera we wobłuku kóždolětneje wulkeje inwentury wažili a měrili. Zamołwići trjebachu wjele fantazije, zo bychu zwěrjata pohnuli so na wahu stupić. Pinguiny dyrbjachu přez wahu k swojej picy nóžkować. Lawam přiwjazachu mjaso na štom. Tak dyrbjachu so na zadnjej noze stupić, zo bychu picu dosahnyli. Na te wašnje móžachu jich wulkosć měrić.
Ze signalowej machawku policije, kotruž bě sej w interneće kupił, je so muž wčera přez połnu Berlinsku měšćansku awtodróhu předrěć spytał. Policistam muž w małym Smarće napadny, kiž wusko za druhimi awtami stejo tak dołho z machawku kiwaše, doniž jemu městno nječinjachu. Nětko dyrbi z tym ličić, zo sćazaja jemu jězbnu dowolnosć „charakterneje njekmanosće“ dla.
Wažne ćežišćo je rěč zachować
W Braniborskej dale wulke wužadanje
Na wulkim jewišću je braniborski ministerski prezident Dietmar Woidke (SPD) hromadźe z dalšimi čestnymi hosćimi swjedźenski ćah na Festiwalu serbskeje kultury minjenu njedźelu w Janšojcach sćěhował. Axel Arlt je so z nim po tym rozmołwjał.
Sće w tymle regionje doma. Kak wažny bě Wam dźensniši wopyt w Janšojcach?
D. Woidke: Sym přeco jara rady w Janšojcach, hdźež je žiwjenje intaktne. Wjesnjenjo hromadźe dźerža a dźěłaja, podpěruja so wzajomnje a organizuja předewšěm tež krasne swjedźenje. Tule knježi wuběrna nalada. Zo bychu widźenjahódny ćah pokazali, su wobdźěleni tójšto prócy nałožowali. Serbstwo w Braniborskej je žiwe. To njeje jenož fasada za turizm. Tule bije serbska wutroba wosrjedź towaršnosće. To mje jara zwjesela.
Je so Waš wid na serbstwo w Braniborskej snano změnił wot toho časa, zo sće ministerski prezident?
Koncept schwaleny
Berlin (dpa/SN). Zwjazkowy kabinet je dźensa diskutowany koncept ciwilneho škita schwalił a tak planowanjam w padźe teroroweho abo internetneho nadpada na puć pomhał. Knježerstwo reaguje z konceptom na změnu wěstotneho połoženja w Němskej. Mjez druhim dźe wo to, ciwilny katastrofowy škit a přihoty w padźe zakitowanja zjednoćić. Tak móža nětko wšelakore zamołwitosće Zwjazka, krajow a komunow lěpje koordinować.
Zapadne staty inkonsekwentne
Berlin (dpa/K/SN). Předsyda Towarstwa němsko-ruski forum Matthias Platzeck (SPD) zapadnym statam porokuje, zo su we wobchadźenju z Ruskej inkonsek- wentne a njesprawne. „Arabskich naftowych šajchow witamy jako přećelow, byrnjež w jich krajach ludźi kamjenjowali, čwělowali a wotprawjeli. To prajimy, što móžemy činić. Pola Ruskeje zapad porno tomu hinaše měritka nałožuje“, kritizuje bywši předsyda SPD a wjelelětny braniborski ministerski prezident.
Syrisku nadpadnyli
Italsku ćežke zemjerženje trjechiło
Rom (dpa/K/SN). Ćežke zemjerženje je srjedźnu Italsku trjechiło, žadajo sej tójšto smjertnych woporow a načinjejo njesměrne škody. Wosrjedź nocy je zemski stork wosebje hórsku prowincu Appennin mócnje třasł. Po dotalnych zwěsćenjach je znajmjeńša 38 ludźi zahinyło, zwjetša w swojich rozpadowacych twarjenjach. W znatym dowolnišću Amatrice samym su pjeć ćěłow našli. Jeho měšćanosta Sergio Pirozzi rjekny telewiziji RaiNews24, poł sydlišća hižo njesteji, rozpadanki su wjele ludźi pohrjebali, tež dźěći. Puće su zašlahane a milina wupadła. Naležnje prošeše wón wo pomoc z helikopterami. Jedyn z wobydlerjow sćelakej zadwělowany rjekny: „Wšitko je so nam skóncowało.“ Zemjerženje bě tež w regionomaj Latium a Umbria a bě samo pytnyć w 150 kilometrow zdalenej stolicy Romje. Po informaciji Podstupimskeho geofyziskeho instituta měješe zemjerženje sylnosć 6,1 a sta so dźesać kilometrow hłuboko.
Harig: Přemało křesćanstwa
Forum „Politika zetka so z cyrkwju“ za Budyski wokrjes so wotměł
Budyšin (SN/MkWj). Wo islamje, muslimach a integraciji ćěkancow su dźensa w Budyskim krajnoradnym zarjedźe debatowali. Stało je so to we wobłuku diskusijneho foruma „Politika zetka so z cyrkwju“. Něhdźe sto ludźi, zastupnicy katolskeje a ewangelskeje cyrkwje, komunalni zamołwići a sobudźěłaćerjo krajnoradneho zarjada, je na forum přišło. Mjez nimi bě tójšto serbskich duchownych, ewangelski superintendent Jan Malink runje tak kaž dekan Wito Sćapan, fararjej Šćěpan Delan, Gabriš Nawka a dalši. Serbske gmejny zastupowaštaj mjez druhim Radworski a Chróšćanski wjesnjanosta Wincenc Baberška a Marko Kliman (wobaj CDU). Diskusijne koło přihotowała bě Sakska krajna centrala za politiske kubłanje w Drježdźanach z nawodu Frankom Richterom na čole, kiž je zarjadowanje na žurli zarjada moderěrował.
To a tamne (24.08.16)
Kóčka je po wšěm zdaću rozbuchnjenje we Wittenbergskim domskim zawiniła. Kaž policija zwěsći, bě zwěrjo elektroniske kachle, kotrež so přez dótknjenje wodźa, zašaltowało. Na kachlach stejaca plastikowa škla so zapali a sćopli blisku sprayjowu dozu, kotraž na to rozbuchny. Na zbožo so nichtó njezrani, rozbitki woknoweje škleńcy pak wobškodźichu před domskim parkowace awto.
Koleso na wuměłskej twórbje „Molecule Man“ w Berlinje dyrbjachu industrijni krosnowarjo wotstronić. Akcija, při kotrejž lězechu woni na třiceći metrow wysoku postawu, traješe połdra hodźiny. Čehodla a štó bě koleso tam powěsnył, njeje jasne. Pječa dyrbješe tež to wuměłstwo być. Wuhladali su kolesa tež na druhich městnach, hdźež poprawom njesłušeja, jedne wisaše na přikład na sćežoru ample.
Iniciatiwa ma referentku
Drježdźany (B/SN). Drježdźanski Ekumeniski informaciski centrum je z Annu Groschwitz přistajił referentku za křesćansku iniciatiwu „Hinak rosć“. 32lětna socialna pedagogowka chce z modelowymi wosadami wokoło Drježdźan hromadźe dźěłać. „Zo mamy naše wašnje žiwjenja změnić, zmóžnjejo přichodnym generacijam a našim bratram a sotram po cyłym swěće dobre zhromadne skutkowanje a žiwjenje, njeje dawno hižo žane potajnstwo“, wona rjekny.
Ženje hišće telko ćěkancow
Skóržba wotpokazana
Düsseldorf (dpa/SN). Wikowar awtow, kiž je Audi z manipulowanej software předał, njetrjeba kupcej awta pjenjezy wróćić. Tole je Düsseldorfske krajne sudnistwo dźensa rozsudźiło, wotpokazujo tak skóržbu kupca. Tón bě sej žadał, zo wikowar awtow kupne zrěčenje z nim zběhnje a jemu pjenjezy wupłaći. Wikowar bě jemu porno tomu poskićił software wuměnić. To pak muž nochcyše.
Nowe mejlki Clinton našli
Washington (dpa/SN). W aferje w zwisku z wužiwanjom priwatneho mejloweho konta za słužbne naležnosće něhdyšeje wonkowneje ministerki Hillary Clinton su 15 000 dalšich powěsćow namakali. Zwjazkowa policija FBI je powěsće mjeztym wonkownemu ministerstwu dale posrědkowała. Clinton ma hižo dlěši čas mjerzanja, dokelž je swój čas słužbne a zdźěla tajne informacije přez priwatny server dale pósłała. FBI jej w tym zwisku lochkomyslnosć wumjetuje.
Bosbach hižo njekandiduje
Symbol dobrych poćahow
Financowanske zrěčenje za Pücklerowy park podpisane
Mužakow (dpa/SN). Dźěło załožby Wjercha Pücklerowy park Mužakow je hač do lěta 2020 zaručene. Nowe financowanske zrěčenje staj zwjazkowa kulturna statna ministerka Monika Grütters a sakski ministerski prezident Stanisław Tilich (wobaj CDU) wčera podpisałoj. Zrěčenje předwidźi, zo Zwjazk a Sakska kóžde lěto kaž dotal stajnje dobry milion eurow přewostajitej. Pjenjezy trjebaja, zo móhli objekt zachować a dale wobhospodarjeć. Dotalne zrěčenje kónc lěta wuběži.
