Womjelknu-li brónje dźensa wječor?

póndźela, 12. septembera 2016 spisane wot:
Damaskus (dpa/K/SN). Po dlěje hač pjeć lětach wobydlerskeje wójny w Syriskej ma dźensa k dalšemu pospytej dóńć, boje zakónčić. Kaž so słónco chowa, maja brónje womjelknyć. Wonkownaj ministraj USA a Ruskeje John Kerry a Sergej Lawrow běštaj kónc tydźenja wotpowědny plan zdźěłałoj. Wón předwidźi přiměr mjez wójskom knježerstwa Assada a jednotkami rebelow kaž tež pomoc ciwilnej ludnosći we wobkruženych městach. Wjacore skupiny zběžkarjow přiměrej přihłosuja, rebelojo Ahrar al-Sham jón wotpokazuja. Dyrbjał-li přiměr tydźeń dźeržeć, chcetej Washington a Moskwa hromadźe přećiwo teroristiskej milicy IS postupować.

dale čitać ...

Štyrjo kandidaća

póndźela, 12. septembera 2016 spisane wot:
Berlin (dpa/K/SN). Zeleni su wólbny bój zahajili. Za wólby zwjazkoweho sejma 2017 wustupichu na małym stronskim zjězdźe štyrjo načolni kandidaća. Šef strony Cem Özdemir při tym namołwi, jednotnje agěrować a „błudnych křidłowych bojow“ so pasć. Wo čorno-zelenej abo čerwjeno-čerwjeno-zelenej koaliciji móže so po wólbach rěčeć. Nimo Özdemira prócuja so wo načolnu kandidaturu šefina frakcije Katrin Göring-Eckardt, ko-šef frakcije Anton Hofreiter a schleswigsko-holsteinski minister za wobswět Robert Habeck. Hofreiter, kandidat stronskich lěwych, apelowaše, ofensiwnje zakitować wotewrjenu towaršnosć a wojować za runoprawosć homoseksualnych.

dale čitać ...

HDZ prědku

póndźela, 12. septembera 2016 spisane wot:
Zagreb (dpa/SN). Doprědka sćehnjene wólby najmłódšeho sobustawa Europskeje unije Chorwatskeje wujewichu wčera dwubój najsylnišeju stronow kraja. Socialni demokraća (SDP) změja přichodnje 54 zapósłancow w parlamenće a konserwatiwni ze strony HDZ 61 zapósłancow. Třeća najsylniša móc bu reformowa strona Most z třinaće zastupjerjemi. Tamne z cyłkownje 151 sydłow wulkeho parlamenta wobsadźa zapósłancy mjeńšich stron kaž tež mjeńšinow Južnych Serbow, Madźarow a Italčanow. Socialni demokraća su wot wólbneho wuslědka přesłapjeni, wšako běchu z wjace hač 60 městnami ličili. HDZ a Most stej porno tomu spokojom. Bórze zahaja koaliciske jednanja. Přiwšěm wočakuja domoródni fachowcy dołhe wuradźowanja, wšako nochcytej najsylnišej stronje zhromadne knježerstwo wutworić.

dale čitać ...

Přeńdźenja wobeju stron registrowali

póndźela, 12. septembera 2016 spisane wot:
Připowědźenej demonstraciji zašły pjatk wječor w Budyšinje wujewichu přeńdźenja wobeju stron. Na Žitnych wikach zeńdźe so skupina prawicarsce motiwowanych; blisko měšćanskeho muzeja běchu to přiwisnicy lěwicarskeho spektruma, kotrymž so ćěkancy přidružichu. Zastojnicy spytachu wobě stronje na distancu dźeržeć. Při­wšěm so ludźo mjezsobu prowokowachu. Lěwicarjo so z přewodom policije do Kamjentneho domu wróćo sćahnychu. Prawicarjo pak jich přesćěhowachu. Tež tule je policija stronje konsekwentnje dźěliła. Přiwšěm dóńdźe k rozestajenjam mjez woběmaj skupinomaj. Foto: SN/Maćij Bulank

dale čitać ...

Za zbrašene uralske dźěći pjenjezy zběrali

póndźela, 12. septembera 2016 spisane wot:

Wusydlency, potajkim Němcy z Ruskeje, přijědźechu sobotu z cyłeje srjedźneje Němskeje do Budyšina, zo bychu zetkawanski dźeń wusydlencow swjećili.

Budyšin (CS/SN). Na zahajenskej Božej słužbje w tachantskej cyrkwi wobdźělichu so duchowni wobeju konfesijow, mjez nimi tachantskaj fararjej Christian Tiede (ew.) a Wito Sćapan (kat.) kaž tež ewangelski krajny biskop dr. Carsten Rentzing a bywši Drježdźansko-Mišnjanski biskop Joachim Reinelt. Dźakny wopor bě postajeny za ewangelsko-luthersku propstownju Orenburg w Uralu, z kotrejž cyrkwinski wobwod Budyšin-Kamjenc wjelelětne styki haji. Pjenjezy dóstanje Diakoniski centrum Orenburg, kotryž podpěruje zbrašene dźěći.

dale čitać ...

To a tamne (12.09.16)

póndźela, 12. septembera 2016 spisane wot:

Lubosć k architekturje je 53lětneho muža pohnuła sej podrys bywšeho cistercienskeho klóštra Eberbach (Rheingau) pod kožu kałać dać. Kaž Joachim Träuptmann praji, je to znamjo jeho hłubokeje zwjazanosće. Jako bě wón skicu hrodu Neuschwanstein pola tattoowoweje wuměłče wuhladał, zrodźi wón ideju, sej klóšter na ruku tetowěrować dać. A to je dohromady sydom hodźin trało.

Muž je spad swojeho awta z dźewjateho poschoda parkowanskeho domu w ameriskim Austinje bjez zranjenjow přetrał. Kaž wohnjowa wobora zdźěli, bě wón do wobhrodźenja zajěł, při čimž awto w groće wisajo wosta. Jězdźidło wisaše na to padorunje z parkowanskeho domu: Šoferej pak so poradźi přez wokno na třěše jězdźidła wulězć a so do domu wuchować. Wohnjowej woborje so zešlachći awto­ z wysokosće na zemju sćahnyć.

dale čitać ...

W Španiskej ćah znjezbožił

pjatk, 09. septembera 2016 spisane wot:

Pontevedra (dpa/SN). Při znjezboženju ćaha na sewjeru Španiskeje su dźensa dopołdnja znajmjeńša štyri wosoby žiwjenje přisadźili, mjez nimi portugiziski lokomotiwnik. Mnozy sobujěducy so zranichu. Tole zdźěla měšćanske zarjadnistwo w O Porriño. Njezbožo je so stało, jako ćah z kolijow skoči a do mosta zrazy. Po wšěm zdaću bě w tym času něhdźe 60 ludźi w ćahu.

Dijsselbloem žada sej reformy

Bratislava (dpa/SN). Šef euroskupiny Jeroen Dijsselbloem je Grjeksku namołwił, za nowe pomocne kredity spěšnišo reformy zawjesć. „W lěću je so přemało stało“, potwjerdźi wón dźensa na schadźowanju financnych­ ministrow europasma w Bratislavje. Grjekska bě hakle w juniju wot mjezynarodnych pjenje­zy­da­warjow 7,5 miliardow eurow dóstała. Dalše 2,8 mrd. ma so nazymu wupłaćić. Pomocny program wopřijima dohromady 85 mrd. eurow.

Wjac ludźi so zatepiło

dale čitać ...

Wo šulstwje rěčeli, nic pak wo demokratiji

pjatk, 09. septembera 2016 spisane wot:
Budyšin (SN/MiR). Sakski ministerski prezident Stanisław Tilich (CDU) nadźi­ješe so čiłeje diskusije wo demokratiji w Sakskej. To bě poprawna tema połdrahodźinskeje idejoweje konferency młodźiny dźensa dopołdnja w Budyskim Melanchthonowym gymnaziju we wobłuku 1. tydźenjow demokratije w sprjewinym měsće. Na zarjadowanje běchu so młodostni z tamnišeho kaž tež Schilleroweho a Serbskeho gymnazija a dalši ze wšelakich wyšich šulow přihotowali. Šulscy nawodźa runje tak kaž Budyski financny měšćanosta dr. Robert Böhmer (njestronjan) wočakowachu tuž mnohostronsku diskusiju. Třo zastupjerjo Schilleroweho a Melanchthonoweho gymnazija pak koncentrowachu so w swojich prašenjach na jeničku temu – šulstwo. Při tym dótkachu so temow kaž wabjenja za wučerski dorost, narunanja wupadnjenych wučbnych hodźin, wyšeho płaćenja wučerjow kaž tež toho, zo měli so sakscy wučerjo zarjadnicy stać. Tilich skedźbni młodostnych na to, zo njeleži ćežišćo w tym, měć po ličbje dosć wučerjow, ale w tym, za kotre předmjety su wukubłani.
dale čitać ...

Sewjerna Koreja dale atom testuje

pjatk, 09. septembera 2016 spisane wot:
Seoul (dpa/K/SN). Sewjerna Koreja je dalši atomowy test přewjedła. Seismogra­fojo su střasenje zemje sylnosće 5,0 na sewjerowuchodźe kraja registrowali. Komunistiski stat je tak znowa mjezynarodny zakaz nuklearnych testow igno- rował. Južna Koreja zwoła Bjezstrašnostnu radu UNO. Japanska je tohorunja wulce znjeměrnjena a chce so na nju wo­broćić, dyrbjało-li so wobkrućić, zo bě to woprawdźe nuklearny test. Prezident USA Barack Obama warnuje Sewjernu Koreju před „chutnymi konsekwencami“. Mjeztym je so wón z premierku Južneje Koreje a ze šefom japanskeho knježerstwa telefonisce konsultował. Tež ruski wonkowny minister Sergej Lawrow atomowy test zasudźa.

dale čitać ...

Srjedźomórske staty prěni raz hromadźe

pjatk, 09. septembera 2016 spisane wot:
Athen (dpa/K/SN). Prěni raz w stawi­znach Europskeje unije schadźuja so dźens šefojo knježerstwow najwažnišich ze Srjedźnym morjom susodźacych statow. Při tym njeńdźe wo žanu frontu přećiwo sewjerej EU, rěka z kruhow grjekskeho knježerstwa, hosćićela zarjadowanja. Statnicy wobjednawaja temy migracija a wěstota, antieuropske populistiske hibanja w rjedźe statow EU kaž tež připowědźeny wustup Wulkeje Britaniskeje ze zhromadźenstwa. Z Athena skedźbnjeja na to, zo dwaj stataj njejstej „ryzy južnej krajej“. Italska a Francoska matej wjele zhromadneho ze sewjerom. Hižo to wujewja, zo njeńdźe wo blok skeptikarjow nastupajo Europu abo wo zhromadźenje přećiwo Angeli Merkel.

dale čitać ...
strona 466 wot 559
dźěłowe městna w LND

aktualne wupisanja

nowostki LND