Wot pózdnjeho popołdnja hač do połnocy je serbska rěč wčera w Budyskim Kamjentnym domje knježiła – wot wotewrjenja naročneje wustajeńcy „Krabat be­tween us“, přez hudźbne poskićenja sku­piny Berlinska dróha hač k zarjadowanju wo serbskim ludowym zastupnistwje. To so nawoda domu Torsten Wiegel jara wjeseleše. To wšitko wotmě so pod třěchu Budyskich tydźenjow demokratije. A wone maja narok, na najwšelakoriše wašnje ze sobu­ do rozmołwy přińć, tež hdyž měnjenje tamneho swójske njeje. Za sebje stej wotewrjenje wustajeńcy kaž tež pozdźiši forum tónle narok spjelniłoj. We woběmaj padomaj bě tež tójšto młodostnych do Kamjentneho domu přišło.

Přiwšěm wostawa přisłód. Lědma je wobdźělnik jednoho zarjadowanja přebytk w kulturnym centrumje z wopytom tamneho zwjazał. Tróšku zadźiwany bě z toho tež Torsten Wiegel. Axel Arlt

Po dźewjeć měsacach je so zhubjena kokoš w Hamburgu k swojemu wobsedźerjej zaso nawróćiła. Kaž wčera rěkaše, bě sobudźěłaćerka pěstowarnje kokoš na ležownosći kubłanišća našła. Přiwołani policisća so w susodstwje naprašowachu, komu trochu leděrowane pjerite skoćatko słuša. Při tym so wukopa, zo bě wone 87lětnemu starcej před třištwórć lětom z kurjenca twochnyło a wot toho časa jako­ „single“ na puću žiworiło.

80lětna žona je w poruhrskim Bottropje ze swojim awtom wonkownu murju parkowanskeho domu přełamała a tři metry hłuboko na dalše parkowace awto padnyła. Wobě jězdźidle so chětro wobškodźištej. Staruška pak wopokaza so jako přewšo robustna. Njezranjena zalěze wona­ z rěbla přiwołaneje wohnjoweje wobory. Tež 85lětnemu mandźelskemu so ničo njesta. Wón wšak njebě na zbožo hišće do awta zalězł.

Braunschweig (dpa/SN). Njeznaći su dźensa w nocy šěsć šulam w Braunschweigu z nadpadami hrozyli. Připowědźene hroženja běchu skućićeljo e-mailnje šěrili. Potrjechene běchu wjacore gym­nazije a zdźěla k nim słušace zakładne šule. Někotři šulscy nawodźa šulerjow tuž dźensa rano zaso domoj pósłachu. Policija tuchwilu hižo ze žanoho wohroženja njewuchadźa. Ewakuěrowanje domow je po słowach policije měrnje a bjez ćežow wotběžało. Za politiske njeskutki přisłušny statny škit nětko přepytuje.

Ličba jasnje rozrostła

Wiesbaden (dpa/SN). Ličba ludźi, kotřiž w Němskej jako azyl požadacy pjenjezy a wěcne wukony dóstawaja, je loni jasnje rozrostła. Kaž zwjazkowy statistiski zarjad dźensa zdźěli, bě loni kónc lěta 975 000 požadarjow azyla wotpowědnu podpěru dóstało. To je porno lětu 2014 přirost wo 169 procentow. Statne wudawki zwyšichu so wo 120 procentow na nimale 5,3 miliardy eurow.

Tornado zachadźał

Hangzhou (dpa/K/SN). Wjerškowe zetkanje statow G 20 w chinskim Hangzhouwje zaměrnje za wuslědkami pyta. China podpěruje nětko žadanje zapada, postupować přećiwo nadkapacitam w produkciji wocla a w druhich­ industrijnych hałzach, dokelž maja „negatiwne wuskutki we wikowanju a na dźěłowe městna“. Na kónčnym dnju wjerška za­běraja so wobdźělnicy z wužadanjemi, nastawacymi wot nawala ćěkancow a wot terorizma. USA a Ruska njejsu so dotal na kompromis za přiměr w Syriskej dojednać móhli. Dźensa zetkataj so prezident USA Barack Obama a ruski prezident Wladimir Putin. Na kromje wjerška wuradźowachu Obama, němska kanclerka Angela Merkel (CDU) a francoski prezident François Hollande wo ukrainskej krizy.