Lóšt na parlament budźili
Čiła diskusija w Budyskim Kamjentnym domje wo zaměrach a kompetencach Serbskeho sejma
„Myslachmy sej při planowanju, zo so derje hodźi zarjadowanje Domowiny a iniciatiwy Serbski sejm samsny dźeń wotměć. A što so stanje? Po wotewrjenju wustajeńcy ‚Krabat between us‘ woteńdu nimale wšitcy Domowinjenjo – hačrunjež přizamknje so forum, na kotrymž dźe wo bytostne zajimy Serbow. To njemóžeće žanomu zwonkastejacemu rozkłasć, to nichtó njerozumi“, dźiwaše so nawoda Kamjentneho domu Torsten Wiegel wo pačenju serbskeho swěta po zarjadowanju „Na demokratiju so zwažić: Serbski sejm – prěni parlament Serbow“ minjenu póndźelu. „Wužiwajće šansu a njewospjetujće zmylki němskeho parlamentarizma, hdźež frakcije zakładnje namjety druheje strony wotpokazuja“, bě sej zapósłanc Sakskeho krajneho sejma Hajko Kozel (Lěwica) do toho w plenumje nastupajo Serbski sejm přał. Lózysce móhł rjec, zo Serbja tež bjez parlamenta hižo hłownu strategiju politiskeho mjezsobneho wobchadźenja wobknježa – hačkuli najšpatnišu, mjenujcy ignorancu.
W iniciatiwje aktiwnje sobu dźěła
41lětny dr. Měrćin Krawc z Delnjeho Wunjowa wuprudźa wulki elan. Wón je muž iniciatiwy a dobrych idejow. Tole pokazuje so hižo w tym, zo je sej na staršiskim burskim statoku bróžnju na moderny dom wutwarił. W nim bydli z mandźelskej a ze synomaj w starobje sydom a pjeć lět.
Po tym zo bě Hodźijsku šulu wuchodźił a 1993 na Budyskim Schillerowym gymnaziju wuspěšnje maturował, studowaše wón po ciwilnej słužbje mašino- twarstwo na Drježdźanskej techniskej uniwersiće. Studij zakónči 1999 jako diplomowy inženjer a w lěće 2003 wón promowowaše. Hač do lěta 2009 dźěłaše w Drježdźanach, na to poda so do swobodnopowołanskeho předewzaćelstwa na polu energijoweje techniki. Nětko zdźěłuje inowaciske a energijowe koncepty.
Hižo jako młodźenc bě aktiwny w Hodźijskej ewangelskej cyrkwinskej wosadźe we wobłuku młodeje wosady a w pozawnowym chórje. Lěta 2012 je Serbski wječork sobu iniciěrował, z kotrehož wutwori so rozmołwne koło Bjesada. A jeho čłonojo serbšćinu wuknu.
Přećiwo zniženju dawkow
Berlin (dpa/SN). Zwjazkowy minister za hospodarstwo Sigmar Gabriel (SPD) je wotpohlad, dawki znižić, jasnje wotpokazał. Stupace danje a płaćizny surowiznow móhli z plusa hospodarskeho plana spěšnje minus sčinić, wuswětli wón dźensa w zwjazkowym sejmje. Město toho měło so bóle do ludoweho hospodarstwa inwestować. Zwjazkowy financny minister Wofgang Schäuble (CDU) bě připowědźił, dawki we wobjimje 40 miliardow eurow znižić.
Wopyt İncirlika tola móžny
Berlin (dpa/SN). Turkowske knježerstwo je w rozkorje wo planowanu jězbu němskich zapósłancow k stejnišću Zwjazkoweje wobory w turkowskim İncirliku skónčnje zelenu swěcu dało. Tam je něhdźe 250 wojakow zasadźenych, kotřiž podpěruja nalěty na stejnišću teroristiskeje milicy Islamski stat. Po armenskej rezoluciji zwjazkoweho sejma bě turkowske knježerstwo wopyty wojakow zakazało.
Wosebity etiket přetrjebarjam
Bayerska strona CSU ma drastiske žadanja
Rada muslimow zakituje kanclerku
Njesměmy mjelčeć!
Jörg Bernig 3. Kamjensku narěč z wulkej politiskej brizancu dźeržał
Kamjenc (HS/SN). Mjeztym třeća Kamjenska narěč je wčera mnohich připosłucharjow do cyrkwje swj. Hany přiwabiła. To wšak njezadźiwa, tež narěči předchadnikow běštej hižo wulki zaćišć zawostajiłoj. Lěta 2014 bě farar Friedrich Schorlemmer přednošował, loni Turkowčan Feridun Zaimoğlu, kiž je sej wot Němcow wjace tolerancy napřećo ćěkancam žadał. Runje tak pak namołwi wón ćěkancow, wuwědomić sej kulturu kraja, w kotrymž přebywaja.
Lětsa běše Jörg Bernig z Radebeula hósć. Jako syn swójby čěskeho pochada wě wón wo horju ćěkańcy a wuhnanstwa. Nimo toho je znaty spisowaćel, basnik a dźiwadźelnik, kotremuž spožči Swobodny stat Sakska w lěće 2005 spěchowanske Myto Lessinga.
Po lětomaj koalicije
Budyšin (CK/SN). Za bój přećiwo dołhodobnej bjezdźěłnosći chce Swobodny stat Sakska wosebity program we wobjimje 13 milionow eurow nastorčić. Takle steji to znajmjeńša w naćisku knježerstwa za přichodny hospodarski plan. Při rozrosće hospodarstwa wo 1,5 procentow w Sakskej je bjezdźěłnosć tuchwilu tak mała kaž hišće ženje po politiskim přewróće. Najebać to je 68 000 ludźi hižo dołhi čas bjez dźěła. „Někotrych z nich njebudźemy ženje do dźěłoweho poměra posrědkować móc“, rjekny sakski statny sekretar Stefan Brangs (SPD) wčera na forumje ze zawodnymi a personalnymi radami z Drježdźan a wuchodneje Sakskeje w Budyskim hotelu Best Western. 3 000 bjezdźěłnym pak chce knježerstwo dźěło zmóžnić.
To a tamne (08.09.16)
Dokelž hrožeše konopej z woknom padnyć, su starosćiwi wobydlerjo Běłowodźanskeho domu policiju wołali. Skónčnje so wukopa, zo chcyše 36lětny wotnajer bydlenja ze swojimi přećelemi konopej přez wokno dele pušćić. Tón pak bě trochu přešěroki, zo njedóstachu jón ani tam ani sem. Pomocnicy běchu muža z problemom samoho wostajili. Hakle wohnjowej woborje so poradźi, konopej wróćo do bydlenja bugsěrować.
Nimale milion eurow by čěski žurnalist płaćić dyrbjał, chcył-li naprašowanje ke kriminalnej statistice wotmołwjene měć. Policija zdźěli, zo měła za trěbne informacije 1 543 485 njeskutkow přeńć, štož woznamjenja 1 543 485 x 4 = 6 173 940 minutow, to rěka 102 899 hodźin. Přeličene na mzdu by to 956 100 eurow było. Wón měł zličbowanku w běhu 60 dnjow zapłaćić abo naprašowanje cofnyć.
Nochcedźa ničo změnić
Mnichow (dpa/SN). W rozkorje wo namrěwstwowy dawk wostanje zwjazkowa CSU kruta a žada sej wot SPD podwolenje. Do jutřišich wuradźowanjow posrědkowanskeho wuběrka zwjazkoweho sejma a Zwjazkoweje rady zwurazni bayerski financny minister Markus Söder (CSU), zo nochcedźa w Mnichowje žane zwyšenje dawka. SPD a krajni šefojo-Zeleni pak prócuja so wo změnu zakonja.
Tež Bosch pod ćišćom
Hamburg (dpa/SN). Nastupajo wotpłunowy skandal jězdźidłoweho koncerna Volkswagen dóstawa so tež dodawaćel Bosch pod ćišć. Kaž rešerše rozhłosoweju sćelakow NDR, WDR a nowiny Süddeutsche Zeitung wujewjeja, bě Bosch masiwnje do wotpłunoweje afery splećeny. Tak su jeho inženjerojo na wobšudniskej software sobu dźěłali. Dodawarjej měło jasne być, zo je to zakazane. Medije poćahuja swoje informacije z dotal njespóznajomnych čornych wotrězkow wobskóržby USA, kotrež su nětko přistupne.
Na agrarnej konferency
Womłodźeja wuwozny móst
Po ponowjenju móža z nim dalše 40 lět we wuhlowej jamje dźěłać
Wochozy (dpa/SN/JaW). Energijowy koncern Vattenfall je dźensa nowe machace pjerowanje (Große Schwinge) na wuwoznym mosće F 60 we Wochožanskej brunicowej jamje montować započał. Hakle wčera su 315 tonow ćežki kolos přiwjezli, a wulkej kranaj stej jón skónčnje na jeho poprawne městno stajiłoj. Hromadu stwarili běchu hoberski mašinowy dźěl dwaj kilometraj wot F 60 zdalene. Z modulom za ćežkotransporty dowjezechu jón hač do jamy, za čož trjebachu nimale połdra hodźiny, wšako při spěšnosći šěsć kilometrow na hodźinu jenož pomału doprědka dźe. Přiwšěm su sobudźěłaćerjo specialneho wozydłownistwa tak spěšnje jěli kaž bě jim móžno, rjekny šofer René Wermke.
