Z třomi milionami eurow chce stat kóžde dźěłowe městno chipoweje fabriki Intela w Magdeburgu subwencionować. Telko přerězny dźěławy čłowjek w Němskej, kiž ze swojimi dawkami tute subwencije financuje, čas žiwjenja njezasłuži. Intel je nětk najebać to swoju inwesticiju wo (znajmjeńša) dwě lěće přestorčił – financielnych wušparanjow dla. Njedawno je druhi koncern, VW, bolostne skrótšenja připowědźił. Tu kaž tam je management wuwiće na wikach „zaspał“. Koncern je kaž wulki tankowc, druhdy njemóža so jeho kapitanojo sčasom zadźěwkej wuwinyć. W Sakskej je 3 650 předewzaćow mikroelektroniki z 81 000 dźěłowymi městnami. Z nich je 49 procentow w produkciji za software. Tworjenje clusterow, mjeńšich syćow, ale ćim bóle kreatiwnych producentow, je lěpši puć hač kormjenje dale a wjetšich koncernow. Nimo toho su strategiske partnerstwa na přikład z aziskimi krajemi zmysłapołniše hač „hospodarska wójna“ z ekstremnymi přiražkami stata. Bianka Šeferowa

Tupperware je insolwencu připowědźił. Fachowc tyzow za składowanje žiwidłow z USA chce najebać to dale dźěłać. Tupperware, pioněr na polu domjacych tyzow, bědźi so hižo dlěši čas z hospodarskimi problemami. Minjene měsacy su z pjenjezydawarjemi rěčeli, kotrymž dołži Tupperware hišće wjacore miliony dolarow. Z předaćom zawoda chcedźa mjeno zachować a zawod poněčim na moderne technologije přetwarić.

Při rězanju pjerizny je 71lětny w Rosenbachu w Zhorjelskim wokrjesu bróžnju zapalił. Twarjenje je so póndźelu popołdnju wotpaliło, policija zdźěla. Muž bě wosebity wósk zwohrěwał, z kotrymž chcyše pjerja skotu lěpje wotskubać. Při tym wósk w horncu přeběža a so na płunowych kachlach zapali. Policija trochuje škodu na 7 000 eurow a přepytuje lochkomyslneho zapalerstwa dla.

Wo wólbach Rady za naležnosće Serbow při Krajnym sejmje Braniborskeje kaž tež wo wólbach 2. Serbskeho sejma je „omnibus za direktnu demokratiju“ wčera a dźensa hač do 18 hodź. na Starym torhošću w Choćebuzu informował. Zajimcy móžachu so tam tež do wolerskeju zapiskow za wobě wólbje zapisać. Choćebuski wyši měšćanosta Tobias Schick (SPD) wabi za wobdźělenje na wólbomaj. „Demokratiju dyrbiš wuwojować a zakitować. Wona je žiwa wot toho, zo so wobdźěliš. Wólby su wažny, byrnjež jenički wuraz tohole wobdźělenja njebyli“, rjekny hłowa Schick wčera při wopyće „omnibusa za direktnu demokratiju“. Foto: Jan Gloßmann

Astana (dpa/SN). K zakónčenju swojeje jězby po centralnej Aziskej je so zwjazkowy kancler Olaf Scholz (SPD) dźensa z nawodami pjeć bywšich sowjetskich republikow regiona zetkał. Při rozmołwach w kazachskej stolicy Astanje chcyše Scholz strategiske partnerstwo Němskeje z Uzbekskej, Tadźikskej, Kirgiskej a Turkmenskej sylnić. Němska zajimuje so tež za wažne surowizny tutych krajow kaž zemski wolij, železnu rudu, kopor a złoto.

Israel hotuje so na nowu wónju

Tel Aviv (dpa/SN). Móžna wulka wójna mjez Israelom a libanonskej šiitiskej milicu Hisbollah so po wuprajenjach israelskeho knježerstwa w Jerusalemje bliži. Zakitowanski minister Joav Galant po zetkanju z posrědkowarjom USA Amosom Hochsteinom potwjerdźi, zo móže Israel jenož „z wojerskim zasadźenjom“ wěstotu wobydlerjow na sewjeru Israela zaručić. Diplomatiske rozrisanje njeje hižo móžne, dokelž so Hisbollah spjećuje, konflikt skónčić, tak Galant.

Podhladny wobskorženy