Berlin (dpa/SN). Zwjazkowy sejm je dźensa dale wo etaće 2025 wuradźował. W tym zwisku rěčachu prěni króć wo nowym „wěstotnym pakeće“ amploweje koalicije. Wón wopřija naprawy, kotrež je koalicija po islamistiskim terorowym nadpadźe z nožom z třomi mortwymi w Solingenje předstajiła. Dźe w prěnim rjedźe wo změnu prawa na brónje, wo rozšěrjenje móžnosćow zamołwitych w boju přećiwo ekstremizmej a terorizmej kaž tež wo nowe rjadowanja nastupajo prawo přebywanja w Němskej.

Mjez druhim chcedźa dowolić, biometriske daty ze zjawnje přistupnych žórłow zběrać, na přikład z awtomatiskich kamerow w městach. Zaměr je, „pozdatnych teroristow a podhladnych identifikować a lokalizować“. Swój škitny status ma ćěkanc zhubić, hdyž so bjez wažneje přičiny nachwilnje do swojeje domizny nawróći, na přikład za dowol.

K zwyšenju wěstoty je předwidźane, nože w zjawnosći zakazać. Płaćić ma tole w busach, železnicach, na ludowych swjedźenjach a wulkozarjadowanjach.

Zražka Drježdźanskeho mosta zbudźa debatu wo trěbnych inwesticijach

Drježdźany (dpa/SN). Po dźělnym sypnjenju Carola-mosta w Drježdźanach zaběraja so přiběrajcy z prašenjom, kak wěste su mosty po wšej Němskej. W tym zwisku žadaja sej wyše inwesticije. W sakskej stolicy dyrbja nimo toho rozrisać, kak chcedźa za měšćanski wobchad přewšo wažny móst zaso natwarić. Pjenježne połoženje města je chětro napjate.

Fachowc za mosty Martin Mertens kritizuje špatny staw mnohich wulkich mostow w Němskej. „Zasadnje dyrbimy rjec, zo su wšitke wulke mosty, twarjene do lěta 1980, problemowi pacienća“, rjekny profesor Bochumskeje wysokeje šule nowinarjam. Wulkeho twarskeho rozmacha po Druhej swětowej wójnje dla potrjechi to bohužel najwjetši dźěl mostow, wón doda. Politika dyrbi na to reagować, sej Mertens žada a zjima: „Drježdźany jasnje pokazuja: Je pjeć mjeńšin po dwanaćich.“

Wobraz sypnjeneho Carola-mosta w Drježdźanach dopomina mje na wulětnisku łódź Costa Concordia, kotraž ležeše wot lěta 2012 na wšěch 18 měsacow powalena před kupu Giglio w Srjedźnym morju. Tež tehdy njeby sej nichtó předstajić móhł, zo so tajke njezbožo raz stanje. Tak kaž podadźa so tysacy kóždy lěto na tajku łódź, zo bychu rjany dowol na morju dožiwili, wužiwamy wšědnje mosty. Při wšěm pytanju za přičinami katastrofow a winikami twarskich njedostatkow dyrbjeli sej stajnje zaso wuwědomić, zo z kóždym betonowym abo woclowym mostom, z kóždej asfaltowanej awtodróhu a poprawom z kóždym twarjenjom přirodźe něšto nanuzujemy. Dyrbimy wjele dźěła a pjenjez nałožować, tute objekty wudźeržować. Hewak sej je přiroda zaso bjerje. Snano njejsu tole w Drježdźanach dosć derje činili. Mi je sypnjeny móst kaž hižo tehdy wona łódź nastork wo tym rozmyslować, kak z přirodu wobchadźamy a kak zachodne wšitko je. Marko Wjeńka

Z njewšědnej předewzaćelskej mysličku je so Martin Grunewald w Janšojcach ze­samostatnił: Wón je wjesny wobchod we wsy z runje 1 500 wobydlerjemi přewzał a poskićuje tam nimo tworow wšědneje potrjeby tež gastronomiju. Tradicionalny wjesny wobchod prosće dale wjesć, njeby dźensa wjace wuspěšne było. Tuž je zahority kuchar koncept wobchoda a hosćenca pod jednej třěchu zrodźił. W Janšojcach wari Martin Grunewald zdobom słódne jědźe, kotrež w swojej poliwkowej stwičce na Choćebuskich Starych wikach poskićuje. Foto: Michael Helbig