Krajny zjězd Rolanda Ermera za wólby Zwjazkoweho sejma nastajił

Połčnica (SN/MkWj). Budyski wokrjesny zwjazk CDU sćele Rolanda Ermera do klětušeho wólbneho boja za Zwjazkowy sejm. 52lětneho su minjenu sobotu na wokrjesnym wólbnym zjězdźe w Połčnicy nominowali. Cyłkownje štyrjo kandidaća běchu nastupili. Ermer bě so w druhim wólbnym kole přećiwo zapósłanči Sakskeho krajneho sejma Patriciji Wissel přesadźił. Serbska zapósłanča Marja Michałkowa,­ kiž Budysku kónčinu dotal w zwjazkowym sejmje zastupuje, bě w lěću připowědźiła, zo ke klětušim wólbam hižo njenastupi.

Roland Ermer, pjekarski mišter z Njedźichowa a zdobom prezident sakskeho rjemjeslniskeho zwjazka, chcył so w zwjazkowym sejmje na dobro srjedźnych worštow towaršnosće zasadźeć.

Nimo Ermera běchu serbska žurna­listka Bogna Korjeńkowa (51) z Pančic- Kukowa, wědomostnik Peter Schierack (48) z Kulowa a 41lětna Patricia Wissel z Wjazońcy k wólbam nastupili.

Flensburg (SN). Federalistiska unija europskich narodnych mjeńšin (FUEN) dóstanje tež klětu wot Zwjazka znajmjeńša 500 000 eurow spěchowanskich srědkow. Tole su etatowi fachowcy zwjazkoweho sejma w Flensburgu zaměstnjenej organizaciji zdźělili. „Spěchowanje w tutej wysokosći smy lětsa prěni króć w parlamentariskim procesu přesadźić móhli. Je to wuslědk wjelelětneho prócowanja FUEN a jeje čłonskich organizacijow“, zdźěli Susann Šenkec, generalna sekretarka organizacije, medijam. Nowy prezident FUEN, Lorant Vincze, bě so spočatk julija na swojim prěnim wopyće pola zwjazkoweho knježerstwa za dalše spěchowanje mjeńšinoweje organizacije zasadźował.