SJ Njebjelčicy – Lok Slepo 2:4 (0:1)

Zestawa domjacych: Matješk – Ričel, Kral, Gödig, Hanuza, Plaettner, Haška, Šołta, Čornak (46. Lejnart), Domš, Korjeńk

Po dwójnym treningu měrjachu zašłu sobotu Njebjelčenjo w prěnjej přihotowanskej hrě swoje mocy ze Slepjanskim koparskim mustwom. Mnohe lěta stej so cyłkaj prawidłownje w dypkowych partijach wubědźowałoj. Njebjelčanski trenar Handrij Krawčik nastaji poměrnje młode mustwo, a to hnydom ze štyrjomi nowačkami. To běchu Józef Matješk, kotryž je so zaso wot SJ Chrósćicy nawróćił, ­a Oliver Domš, kiž je w Njebjelčanskim dorosće hrał a so w Kamjencu pola Jednoty dale wukmanił. Nimo toho hrajetaj za mustwo SJN nětko Wiliam Plaettner z Kamjenca a Franc Gödig z Njeswačidła.

Partija běše ze wšeho spočatka poměrnje spěšna a bojowniska. Handrij Korjeńk zjewi so w spočatnej štwórć ho­dźinje dwójce před wrotami hosći, ale njezamó do wrotow trjechić. W 25. min. zadyri bul po wótrje třělenym róžku w krótkim kuće do Matješkowych wrotow k 0:1. Dalšu šansu přez Plaettnera wrotar wotpopadny.

Marian Žur z Lejna (nalěwo) a Beno Šołta z Miłoćic (naprawo) – triatletaj tri-teama-Serbja – staj so njedźelu w Lipsku na 35. Lipšćanskim triatlonje wobdźěliłoj. Žur bu na­ olympiskej distancy 98. a Šołta wobsadźi 128. městno. Interne serbske mocy­měrjenje Lejnjan potajkim znowa doby. Na wobrazu steja hišće Tilo Mayer a Sandro Besold (wobaj BLV čerwjeno-běli 90 Budyšin) a Torsten Müller (OSSV Kamjenc).

Foto: Marian Žur

5. turněr w třělenju jědnatkow w Sulšecach

„Jako tu 2014 prěni raz stejachmy, bě Němska čerstwy swětowy mišter a my witachmy na prěni turněr 14 mustwow. Nětko, štyri lěta pozdźišo, su Němcy drje blamabelnje zwrěšćili, za to pak sće so wy z dohromady 28 přizjewje­njemi wo to postarali, zo přewjedźemy tu dźensa jedyn z najwjetšich turněrow Sakskeje w třělenju jědnatkow – wutrobny dźak wam!“, tak powita sobotu popołdnju hłowny organizator Stephan Prucha wšěch wobdźělnikow w delnich Sulšecach. W dohromady sydom staflach wojowachu tam cyłki ze susodnych wjeskow wo zaćah do wosmifinala. Cyłkaj z Hermsdorfa abo Choćebuza měještaj najdlěši přijězd.

ST Kinspork/Łužnica

– SJ Chrósćicy 2:3 (1:3)

Zestawa hosći: Králíček – Dehn, Püschel, Sentivan, Lešawa, Špitank, G. Zahrodnik, Henzel, Beneš, Baldeh, Młynk

Prěnje mustwo Chróšćanskeje SJ nastu­pi minjeny pjatk w prěnjej testowej hrě noweje hrajneje doby we Łužnicy. Mustwo hraje we wokrjesnej wyšej lize a bě w zašłej hrajnej dobje 12. městno wobsadźiło. Chróšćenjo nastupichu ze ze­stawu, kajkaž dotal tak hišće dawała njeje. Nowi hrajerjo ze swójskeje młodźiny běchu­ sobu, kaž na přikład Nick Lešawa, kotryž hraješe wot započatka sem. Tež Tadej Špitank steješe po nimale dwěmaj lětomaj zaso raz na hrajnišću, po tym zo bě so ćežko při kolenu zranił. W ofensiwje stejachu z Filipom Henzelom a Jakubom Benešom tež nowi koparjo na hrajnišću.