Sernjany (SN/mwe). Lětsa sedmy króć su serbscy seniorojo wčera popołdnju w Cyžec hosćencu w Sernjanach škotowali. Na turněrje so tónkróć 29 kartyplacarjow wobdźěli. Najwjace dypkow měješe Pawoł Mark z Brěmjenja. Druhi najlěpši běše Křesćan Weclich z Nuknicy a třeći bu Alojs Langa z Konjec.
Hižo wot 1. januara lěta 1995 Jan Macka z Chrósćic tute woblubowane zarjadowanje organizuje. „Ličba wobdźělnikow je lětsa jara dobra. To je přeco něhdźe 30 wuměnkarjow a předrentnarjow“, so wón nad wuspěchom wjeseli. Spočatk lěta sej wón ze wšěmi korčmarjemi terminy dorěči, a kóždy lubowar kartow hižo nětko wě, zo budźe přichodny seniorowy škot 30. awgusta pola Bizoldec w Haslowje.
Muž so při dźěle wopalił
Wětrow. We Wětrowje je so dźěłaćer wčera dopołdnja při wukonjenju asfaltowych dźěłow zranił. Walca, kotruž 62lětny wodźeše, so na nahłym městnje powróći, na čož muž do horceho bitumena padny. Wožahanja dla jeho do chorownje dowjezechu. Lěkar bě z helikopterom k městnu njezboža přilećał.
Kremserowy wóz pomórali
Kulowc. Dotal njeznaći su po zdaću wčera w nocy kremserowy wóz a murju ležownosće w Kulowcu pomórali. Při tym wužiwachu grafitijowu prsykawu. Wěcna škoda wučinja něhdźe 500 eurow. Kriminalna policija za skućićelemi slědźi. Pomóranje pak skerje wobsedźer kremsera a domskeho wotstroni.
Sportowy dźeń za dźěći
Wojerecy. Prózdninske dźěći su jutře wot 14 do 17 hodź. na Wojerowsku dźěćacu a młodźinsku farmu přeprošene. Na sportowym dnju móža so wone při pohibowanskich hrach zabawjeć.
Swójbna ekskurisja
Kamjenc. W přirodźe móžeš jenož mało dźiwiny wobkedźbować. K tomu słušeja tež njetopyrje. Kamjenski Muzej zapadneje Łužicy, Elemetarij, přeprošuje wosebje swójby pjatk, 29. pražnika, w 19.30 hodź. pod hesłom „Hońtwjerjo w nocy“ na ekskursiju. Přizjewjenja su pod čisłom (03578) 7 88 310 móžne.
Pućowanje po bahnu
Michałki. Lubowarjo přirody su přichodnu sobotu na pućowanje po bahnu přeprošeni. Zeznaće Dubrjenskeho bahna so w 9 hodź. při hosćencu „Zum Mühlengrund“ w Michałkach zahaji. Wudawki wučinjeja dwaj euraj.
Budyšin (SN). Ze zakónčenjom lětnich prózdnin 8. awgusta zahaji so za šulerjow a wukubłacych nowe šulske lěto. Za šulskich nowačkow, sobujědujcych w busu, železnicy abo tramwajce, to woznamjenja, zo podadźa so po njeznatych pućach k šuli. Tomu so tež wobchadne předewzaća kaž wobchadny zwjazk Hornje Łobjo (VVO) přiměrja a poskićeja staršim za tuńšu alternatiwu płaćizny jězdźenkow. Wužiwajo potuńšene tydźenske, měsačne a lětne lisćiki, trjebaja woni potom kartu kupcow. Tajku dóstanu bjezpłatnje pola VVO a dalšich wobchadnych předewzaćow.
Kładu nowe špundowanje
Biskopicy (SN). Wot dźensnišeho hač do pjatka kładu rjemjeslnicy w ambulancy za nuzne pady Biskopičanskeje chorownje nowe špundowanje. Z tym su wězo wobmjezowanja zwjazane. To rěka, zo měli so zranjeni w chirurgiskej praksy dr. Lehmann a dr. Viehriga w Biskopicach přizjewić. Zdobom měli so pacienća z chutnymi symptomami tež do Kamjenskeje chorownje maltezow, do Budyskeho kaž tež Wojerowskeho klinikuma podać abo nuzoweho abo domjaceho lěkarja zazwonić.
Wjace njezbožow
We Wojerecach dóńdźe loni k 968 wobchadnym njezbožam, 833 sta so direktnje w nutřkownym měsće. Z tym je ličba porno lětu 2014 z 933 njezbožemi snadnje přiběrała.
Wojerecy (AK/SN). „W zašłych pjatnaće lětach njeje so na wobchadnym wuwiću ničo bytostneho změniło. Spektakularnych kopjenjow hižo njeje“, Ingrid Stille, nawodnica Wojerowskeho wobydlerskeho zarjada, wčera na předstajenju lońšeje statistiki wobchadnych njezbožow podšmórny. „Měšćanska kónčina ma jasne strukturowanje. Wobdźělnicy wobchada so často z pomocu amplow wjedu.“
Smochćicy (CRM/SN). Do lětušeho Łužiskeho hudźbneho lěća je tež Smochčanski Dom biskopa Bena ze swojim parkom zapřijaty. Tak wodźeše njedawno zahrodniski inženjer Rudolf Schröder z Drježdźan jako wustojny znajer tohole w stilu baroka zapołoženeho parka po nim. Wón potwjerdźi, zo wobsedźi runje tónle historiski areal tohorunja wšitke wosebitosće zahrodniskeje kultury 18. do 20. lětstotka, a skedźbni na mnohotnosć žadnych štomow a rostlin, pokaza pak zdobom na wuznam skulpturow a pomnikow a na wažnu funkciju wodźiznow. „Elementy zemja, woda a powětr tworja jednotu“, wón wuzběhny. Zajimcy sej tak wujasnichu, zo wobsedźi Dom biskopa Bena a tak tež cyła wokolina z parkom woprawdźity juwel.
Podawizna Krabata je a wostanje wobkuzłaca, fascinuje młodych a starych a zaběra wuměłcow, spisowaćelow, dramaturgow, filmowcow a wjele druhich. Z jednoreje powědki ze 17. lětstotka pletu so hač do dźensnišich dnjow wšě móžne wuměłske žanry na najwšelakoriše wašnje w tu- a wukraju. W zašłej hrajnej dobje su hru Krabata tež w Gerharta Hauptmannowym dźiwadle w Žitawje pokazowali. Wobsah je nam dawno znaty. Wosebitosć Žitawskeje inscenacije bě, zo tu profije dźiwadła z młodostnymi, lajkami hromadźe hrajachu, štož pak njebě na škodu předstajenja. A někotři hrajerjo z Krabatowych młynskich hólcow kaž tež hrajerki z kantorkow a młodych žonow na hermanku běchu samo z Libereca. Tak dósta kruch wo chorwatsko-serbskim Krabaće chcyjo nochcyjo wěsty (słyšomny) słowjanski akcent. Čěscy młodostni su z Němskeje šule w Liberecu, Žitawscy młodostni přisłušeja tamnišemu dźiwadłowemu klubej.
Mjeztym kultowy status
Prěnja połserija 2016/2017
31.07. 14.05 Lok Lipsk – FC Energija
07.08. 13.30 FC Energija – RB Lipsk II
14.08. 13.30 FC Energija – Viktoria Berlin
26.08. 19.00 BFC Dynamo – FC Energija
04.09. 13.30 Schönberg 95 – FC Energija
10.09. 14.05 FC Energija – Meuselwitz
17.09. 13.30 Auerbach – FC Energija
25.09. 13.30 Energija Choćebuz – Budyšin
02.10. 13.30 Carl Zeiss Jena – FC Energija
16.10. 13.30 FC Energija – Fürstenwalde
23.10. 13.30 Neustrelitz – FC Energija
30.10. 13.30 FC Energija – Berlinski AK
06.11. 13.30 Hertha BSC II – FC Energija
20.11. 13.30 FC Energija – Babelsberg 03
27.11. 13:30 FC Energija – Luckenwalde
04.12. 13:30 Nordhausen – FC Energija
11.12. 13:30 FC Energija – Neugersdorf
Jurij Bjeńš