Z wudaća: póndźela, 29 awgusta 2016

Za nju kaž za cyłu Andrickec/Hantušec wulku swójbu bě to njezapomnity wu­znamny podawk, jako wozjewichu swjatkownu póndźelu 2011 w Drježdźanach zbóžnoprajenje kapłana Alojsa Andrickeho, kiž bě 1943 w koncentraciskim lěhwje Dauchau jako martrar wěry zemrěł. Lětdźesatki bě Radworčanka Marta Hantušowa jako najmłódša sotra zbóžnoprajeneho zawostajene dopomnjenki na njeho swěrnje chowała. Nětko je wona 25. awgusta we wysokej žohnowanej starobje na prawdu Božu wotešła.

Narodźiła bě so 9. julija 1922 w Ra­dworju jako šeste dźěćo swójby kantora a nawody wjesneje šule Jana Andrickeho. Rady dopominaše so na wjesołe a zbožowne dźěćatstwo a na to, kak so bratr Alojs z njej hrajkaše a zaběraše. Marta Andrickec wopyta Budyski katolski gymnazij, je pozdźišo w Drježdźanach hač do lěta 1944 pedagogiku studowała a po tym w Rudnych horinach lěto wučeriła. Přez zbožowny připad njedojědźe sej 13. februara 1945 do Drježdźan, kotrež so po mócnym bombardowanju palachu.

Fortuna Trjebin – SJ Chrósćicy 3:1 (1:0)

Zestawa hosći: Králíček – Dórnik (80. J. Bogusz), Cyž, Šafář, Gries (72. Młynk), Henčl, Runt, Sentivan, Špitank, Domaška, Šmit (46. Šiman)

Srjedźna přećiwo Hornjej Łužicy – tak abo podobnje hodźi so rozprawa wčerawšeje hry koparjow Chróšćanskeje SJ zahajić. Při horcych temperaturach nastupichu woni pola Fortuny w Trjebinje, hdźež čakaše na nich wulkotny sportowy areal, sponserowany wot koncerna Vattenfall.

Prěni strašny wólny kop słušeše hosćom, wosta pak bjez wunoška. Lěpje sčinichu to w 7. min. pozdźišo domjacy. Flanka z praweho boka docpě De Souzu, kiž bul k nawjedowanju do saka zhłójčkowa. Hač do połčasa wobaj cyłkaj njepřestajnje nadběhowaštej. Jenički rozdźěl bě, zo měješe hosćićel wjace přihrawkow a wjele wjace třělwow na wrota. Chróšćenjo dowolichu sej w defensiwje přewjele zmylkow, na zbožo pak njebuchu chłostani.

Najwjetšu móžnosć w prěnim połčasu měješe nowopřichad Gries. Bu do ruma pósłany, přeběža wrotarja, z wótreho kuta pak njezamó přetworić.

Při chětro horcych temperaturach wotměchu serbscy triatleća Marian Žur z Lejna (na wobrazu naprawo), Beno Šołta z Miłoćic (na wobrazu nalěwo), Syman Žur z Budyšina a dalši wčera we a při Třižonjanskim jězoru we Łazu swój lětuši „domjacy triatlon“­ na olympiskej distancy (1,5km płuwanje, 40km kolesowanje, 10km běhanje). Wšitcy třo su cil bjez komplikacijow docpěli.­ Jana Wersch

Awtor dźensa Tomaš Faska

Statistiski su druhdy komplikowane. A kak smy w NDRskim času z posměwkom rjekli: Njewěr žanej statistice, kotruž njejsy sam sfalšował. Ale chutnje, woprawdźe komplikowane su prawidła za wuhódnoćenje wuslědkow, kotrež europski koparski zwjazk UEFA prawidłownje přewjeduje. Měnju tabulku,­ hódnoćacu wukony koparskich mustwow europskich krajow a stajacu je do wěsteho slěda. Tele dny bu statistika zašłych pjeć lět wozjewjena. Po njej – a to njezadźiwa – steji Španiska ze swojimi klubami přeco hišće na čole. Ale wotstawk k Němskej je mjeńši, dokelž bě hrajna doba 2011/2012 z hódnoćenja wupadnyła. Tehdy běchu španiske kluby statistisce wuspěšniše hač w sezonje 2015/2016 – njehladajo na to, zo rěkaše finale mišterskeje ligi we wonym lěće FC Chelsea – Bayern Mnichow, dokelž běštej so wobaj španiskej połfinalistaj w tymle kole z wubědźowanja rozžohnowałoj.

Pod smužku maja Španičenjo nětko 20 hódnoćenskich dypkow mjenje hač při lońšim ličenju. Němska, druha tabulki, ma 15 dypkow a runje telko tež Jendźelska, kotraž steji dale na třećim městnje.

FV Ottendorf-Okrilla 05 – Sokoł Ralbicy/Hórki 4:2 (3:0)

Zestawa hosći: Chr. Gloxyn – Lulak, Schultz, Domaška, von Köding, S. Bjeńš, Wałda, Korjeńk, Šewc, D. Gloxyn, Kurjat( 46. B. Bjeńš)

Pola postupnika w Ottendorfje-Okrilli chcychu koparjo Sokoła Ralbicy/Hórki poprawom přichodne tři dypki žnjeć. To pak so jim njeporadźi, dokelž su w škiće tójšto zmylkow worali a njejsu kopicu šansow wužiwali. Při horcych temperaturach njesmaleše jeno słónco, ale tež kumštny trawnik. Sokoljo prócowachu so wo kontrolu hry, tola prěnja šansa poskići so domjacym, jako Denny Gloxyn bul ze šěsnatki njedósta. Prěnju móžnosć na wrota mějachu hosćo w 13. min. Gloxyn bě Wałdu na prawej stronje pósłał, jeho nisku přihrawku pak sadźi Kurjat wyše wrotow. Po štwórć hodźinje nadběhowar domjacych zymnokrejnje přetwori a po poł hodźinje zwyšichu woni na 2:0. Do přestawki docpěchu samo hišće třeće wrota.

FSV Budissa Budyšin – TSG Neustrelitz 3:1 (1:0)

Zestawa domjacych: Wohlfeld – Heppner, Pfanne, Patka, Hänsch, Hoßmang, Müller, Milde, Šisler (85. Kloß), Salewski (75. Herrmann), Němec (70. Barnickel)

Při tropiskich temperaturach chcychu koparjo Budissy před 400 přihladowarjemi dobyć. Najebać horcotu so woni wot prěnjeje sekundy do hry klakachu a mějachu přećiwnika pod kontrolu. Štož hišće optimalne njebě, je wužiwanje šansow. Hoßmang (2.), Salewski (20.), Hänsch (28.) a Němec (30.) mějachu dobre móžnosće, njedóstachu pak bul do wrotow. Hosćo mějachu wulke ćeže, jim paroli skićić. Wšitcy ličachu hižo z 0:0 k połčasej, Němec pak docpě po přihrawce Salewskeho wažne wrota (45.). Wjeselo fanow bě wězo wulke.

Po přestawce měješe najprjedy Milde dobru šansu wuslědk zwyšić (47.), po tym zhłójčkowa Němec po flance Šislera k 2:0 (52.). Třeće wrota w 66. min. docpě Patka. Štwórć hodźiny do kónca hry dóstachu hosćo po foulu w šěsnatce jědnatku, kotruž pak Wohlfeld wotwobara (74.). Čestne wrota 1:3 docpě Celari po zmylku w škiće w 89. min., a to z jednym mužom mjenje, dokelž bě sobuhrajer do toho žołto-čerwjenu kartu dóstał.

Inter Lipsk – Budissa Budyšin 1:4 (1:1)

Regionalna koparska liga

1. Jena 5 12 : 0 15

2. Lok Lipsk 5 8 : 5 10

2. Hertha BSC II 5 8 : 5 10

4. RB Lipsk II 5 6 : 5 10

5. FC Viktoria 5 10 : 4 9

6. Nordhausen 5 10 : 5 9

7. Babelsberg 03 5 9 : 8 9

8. BFC Dynamo 5 11 : 5 7

9. Schönberg 4 8 : 5 7

10. Auerbach 5 4 : 6 7

11. Energija Choćebuz 4 4 : 3 6

12. Berlinski AK 5 3 : 5 6

13. Fürstenwalde 5 3 : 10 5

14. Budissa Budyšin 5 5 : 6 4

15. Neugersdorf 5 7 : 9 3

16. Meuselwitz 5 1 : 6 2

17. Neustrelitz 5 2 : 11 1

18. Luckenwalde 5 2 : 15 1

Najebać horce wjedro je 5. dworowy swjedźeń Dubrjenskeho hosćenca wčera přewšo dobry wothłós žnjał. Prěni raz přewjedźechu tam wubědźowanje konjacych zapřahow.

Dubrjenk (HH/SN). Wopytowarjow z cyłeje blišeje wokoliny je wčera 5. dworowy swjedźeń Dubrjenskeho hosćenca přiwabił. Jeho šef Michał Krječmar měješe tuž ruce połnej dźěła. „Na tajkim dnju sej přeješ, zo maš tři abo štyri ruki“, hosćencar rjekny. Wjace hač 500 ludźi mějachu wón, jeho swójbni a dalši pomocnicy zastarać. Kaž kóžde lěto poskićachu k wobjedu serbsku kwasnu poliwku a chrěn z howjazym mjasom. Hižo dopołdnja móžachu so zajimcy na jězbu z konjacym zapřahom po Dubrjenskim bahnje podać abo słuchachu na zahrodźe hosćenca na dujersku hudźbu.

Přirodne wudźěłki tysacy ludźi k baroknemu hrodej přiwabili

Ramnow (BW/SN). Cyle w znamjenju lena a najwšelakorišich wudźěłkow z tejele rostliny steješe kónc tydźenja Ramnowski barokny hród. Tam přewjedźechu mjeztym hižo 21. raz mjezynarodne lenowe dny. Štož bě so 1995 z małej horstku wikowarjow a něšto stami wopytowarjow započało, je dźensa hotowy magnet z něhdźe 200 wikowarjemi. Po tysacach přijědźechu ludźo do Ramnowa, a kaž awtowe znački přeradźeja nic jeno z Łužicy, ale tež z Berlina, Drježdźan, Riesy, Durinskeje, Saksko-Anhaltskeje a wot dru­hdźe. Publikum pak je stajnje móhłrjec trochu wuběrany, přetož hdyž dorosćeny najprjedy dźesać eurow zastupa płaći, žno dyrbi so wón chětro za lenowe wudźěłki zajimować.

Štož pak na wopytowarjow čaka, móžeše so sobotu a njedźelu widźeć dać. Hudźbna zabawa na dwěmaj jewišćomaj z bigband a dalšej kapału za rejwansku hudźbu, dudlowar, dźěćaca zaběra, klankodźiwadło a wjele dalšeho skićachu w parku a před hrodom samym dosć wotměny. K tomu bě dosć móžnosćow sej něšto słódneho popřeć, a to nic jenož kołbasku a piwo.

Z tradicionalnej modlitwu kadišom je wčera popołdnju 15 wobydlerjow Budyšina a wokoliny na zamordowanych a wuhnatych čłonow Budyskeje židowskeje wosady spominało. Liturgiju nawjedowaše znowa kantor Praskeje židowskeje kongregacije Bejt Simcha Michal Foršt. K wopominanju mortwych su wčera znowa kamjenje na rowy zemrětych kładli. Kadiš wotmě so wčera 27. raz. Foto: Carmen Schumann