Z wudaća: póndźela, 29 awgusta 2016

Budyšin. Twarske dźěła na Budyskej Bebelowej so nachileja. Wot dźensnišeho jězdnju z asfaltom pokrywaja. Wona wostanje tuž na wotrězku wot Walskeje hač k Tuchorskej hač do 5. septembra dospołnje zawrjena. Tež wobydlerjo njemóža w tym času z awtom na swoje ležownosće. Po tym zatwarja hišće indukciske sekle za amplu k Walskej. 12. septembra ma puć hotowy być.

Wo stawiznach rěče

Budyšin. Klub wuchowarjow rěče wotwjedźe wopytowarjow swojeho přichodneho zarjadowanja jutře, wutoru, do stawiznow rěče. Ines Adler ze Załomja po­rěči na temu „Stara a nowa Budyska łaćonšćina – teksty Kaspara Peukera“. Zarjadowanje w Budyskim hosćencu „Sprjewina pensija“ započnje so w 19 hodź. Zastup je darmotny.

W skale so zatepił

Häslich. 64lětny muž je so sobotu popołdnju w skale pola Häslicha w gmejnje Haselbachtal zatepił. Ze swojim dźesaćlětnym wnučkom so tam muž kupaše, nadobo pak so hižo na powjerch wody njewróći. Wnučk a dalši kupacy za podnurjenym pytachu, bohužel bjez wuspěcha. Mjeztym alarmowachu wohnjowych wobornikow, kotřiž sobu pytachu. Hakle hobbyjowaj nurjakaj, kotrajž běštaj připadnje na městnje, muža z ně­hdźe jědnaće metrow hłubokosće wućahny­štaj. Jeho reaniměrować so njeporadźi, tak zo móžeše přiwołany nuzowy lěkar jenož hišće smjerć 64lětneho zwěsćić. Dokładne přičiny njezboža policija nětko přepytuje.

Přistup znowa rjadować

Drježdźany. Přistup k dalewjeducym šulam po 4. lětniku dyrbja w Sakskej po wšěm zdaću znowa rjadować. Tole wuchadźa z wobzamknjenja Drježdźanskeho zarjadniskeho sudnistwa. Sudnicy maja kubłanske poručenje za njedosa­hacy zakonski zakład. Skoržiłoj staj staršej holcy, kotraž njebě žadany přerězk 2,0 w předmjetach matematika, němčina a wěcna wučba docpěła.

Wo zmysle dawkow zhonili

Drježdźany. Sobudźěłaćerjo financneho zarjada su w běhu jednoho lěta na wjac hač 200 zarjadowanjach we wyšich šulach a gymnazijach šulerjow wo zmysle dawkow informowali. Tak dóstachu wuknjacy zrozumjenje za to, zo su dawki za žiwjenski zakład bytostne, hódnoćeše dźensa sakski financny minister Georg Unland (CDU) zaměr projekta.

Mjenje jězbow po Łobju

Bad Schandau. Trajneje suchoty dla móža łódźe jenož hišće we wobmjezowanej měrje po Łobju jězdźić. Tak sakske parne łódźnistwo zdźěla, zo su jězby mjez Drježdźanami a Bad Schandauwom redukowali. W Drježdźanach je pegel Łobja­ jenož hišće 70 centimetrow, normalnej stej dwaj metraj.

Na swjatočnej Božej mši w Drježdźanskej Dwórskej cyrkwi su sobotu dopołdnja Heinricha Timmereversa do zastojnstwa jako biskopa­ diecezy Drježdźany-Mišno zapokazali. Chór 1. serbskeje kulturneje brigady je kemše hudźbnje wobrubił. Serbowki w katolskej drasće wužiwachu składnosć, so z nowym biskopom rozmołwjeć. 64lětny chce sej tule nowu domiznu namakać. Foto: Rafael Ledźbor

40 wobdźělnikow wšěch generacijow poda so sobotu na kubłansku jězbu župy „Michał Hórnik“ do Prahi. Jězbu je župne předsydstwo z pomocu hibićiweho tamnišeho Towarstwa přećelow Serbow (Společnost přátel Lužice) organizowało.

Chrósćicy/Praha (KJu/SN). Zastupjerjo „Společnosće“ z předsydu Lukášom Novosadom su wopyt Praskich zajimawostkow zestajili, kotrež hewak na programje njesteja. Prěnja stacija wuprawnikow bě jedne z najznaćišich hrodźišćow Čěskeje Vyšehrad, hdźež pobychu w cyrkwi swjateju Pětra a Pawoła. Wobhladachu sej tež znaty kěrchow. Tam su wuznamne wosobiny Čěskeje pochowane, kaž Bedřích Smetana a Antonín Dvořák.

Wučomnikow zelenych powołanjow wuwjazali

Pančicy-Kukow (SN/BŠe). Powołanje ratarja je najstarše swěta a je so runje minjene lěta nastupajo techniku razantnje dale wuwiło. Wone zmóžnja dobry poměr mjez přirodu a čłowjekom. Tole wuwědomi managerka sakskeho krajneho zarjada za přirodu, ratarstwo a geologiju Kerstin Lässig na wuwjazanju wučomnikow zelenych powołanjow zańdźeny pjatk popołdnju w Pančicach-Kukowje. 31młodostnych móžeše so nad dobrymi wukonami w zakónčacych pruwowanjach wjeselić. Tak ležeše censurowy přerězk ratarjow pola 2,57, skótnych hladarjow pola 2,87, ratarskich pomocnikow pola 2,5 a wobdźělnikow modeloweho studijneho projekta Ebba pola 1,75. Štyrjo wotzamknychu swoje wukubłanje z jara dobrym wukonom.

Gmejna Njebjelčicy a towarstwo Kamjenjak stej sobotu prěni raz na filmowy wječor a přizamkowacu so diskusiju z čłonami iniciatiwy Serbski sejm do Miłočanskeje­ skały přeprosyłoj, a to pod hesłom „Serbja, Samojo a zakleće zemskich pokładow“.

Miłoćicy (SN/CoR). „Je rjenje tu, byrnjež hewak wjace ludźi na předstajenju filma było“, komentowaše młody syn Hamburgskeho režisera Renéja Hardera. Nimo njeho a moderatora Mirka Schwanitza, žurnalista rozhłosoweho sćelaka Deutsch­landfunk, móžeše Njebjelčanski wjesnjanosta Tomaš Čornak něhdźe 40 ludźi sobotu wječor witać. Zarjadowanje runje tak kaž dokumentariski film „Hüter der Tundra/The Tundra Tale“ (2013) bě Roberta Boschowa załožba spěchowała.

Wojerecy (UH/SN). Ze swójbnym ­popoł- dnjom na zahrodźe Wojerowskeho Domowinskeho domu su sobotu ­z woblubowanej tradiciju Domowinskeje župy „Handrij Zejler“ pokročowali. Jónu wob lěto w lěću přeproša předsydstwo župy hromadźe ze serbskej přiradu měšćanskeje rady na zabawne zetkanje. Regionalna rěčnica Christina Šołćina jako hłowna organizatorka kaž tež zamołwita města za serbske naležnosće Gabriela Linakowa­ a Werner Sroka so wjeselachu, zo je najebać hor­cotu nahladna ličba wopytowarjow­ přichwatała­.