Z wudaća: štwórtk, 21 septembera 2017

Z papjerjanej, přez hłowu sćehnjenej titu je 45lětny w Bardowicku pola Lüneburga nakupować šoł. Nochcyše spóznaty być, dokelž měješe zastup do wobchoda zakazany. Přiwšěm njeje so muž tež tónkroć zadźeržał. Wón dźěše runu smuhu k polcy spirituozow, hdźež hnydom wino z kartonka piješe. Personalej je maskěrowany lačny muž wězo napadnył. A tuž ma nětko jednanje na šiji: kaženja domjaceho měra a padustwa dla.

Tobołku ze 14 000 eurami w podzemskej železnicy zabyła je 78lětna žona, kotrejž napadny to hakle mjeńšiny pozdźišo, po tym zo bě hižo wulězła. Pjenjezy pak běchu po dołhim pytanju sobudźěłaćerjow wobchadneho předewzaća fuk. Hač bě bankowki něchtó pokradnył, njemóžachu tam rjec. Dóstała je je staruška potom tola zaso. 16lětna ćěkanča z Iraka bě tošku z pjenjezami namakała, a jeje mać dowjeze je na policiju.

New York (dpa/SN). Po kritice prezidenta USA Donalda Trumpa na Iranje njeje knježerstwo w Teheranje hišće wo přichodźe atomoweho zrěčenja rozsudźiło. „Zetkanje wonkownych ministrow w New Yorku wčera bě inoficialne, a tohodla njejsu tež žane rozsudy“, zdźěli iranski wonkowny minister Mohammed Dschawad Sarif. Zdobom wón kritizowaše, zo so USA na zrěčenje njedźerža, byrnjež su k tomu winowate. „Štož w USA wo zrěčenju praja, je absurdne. A štož we wobłuku wonkowneje politiki činja njewotpowěduje realiće“, diplomat potwjerdźi. Dokelž je Bjezstrašnostna rada UNO zrěčenje werifikowała ma so wot wšitkich čłonow dodźeržeć.

Barcelona/Madrid (ČŽ/K/SN). Wothłosowanje katalanskeje ludnosće 1. oktobra, hač chce njewotwisnosć Katalonskeje wot Madrida, ma so tak abo znak přewjesć. Za naprawu, wot awtonomneho parlamenta schwalenu, zasadźeja so wšitke wo wotwisnosć prócowace so strony a mocy z premierom Carlesom Puigdemontom na čole, byrnjež zasudźacych reakcijow ze stolicy přibywało. Tola tež opozicija referendum wotpokazuje, mějo jón nje­znjesliwy z wustawu. W Barcelonje su znowa tysacy za přewjedźenje ludoweho rozsuda demonstrowali, při tym wótře zwuraznjejo „njebojimy so“.

Organizatorojo akciskeho tydźenja přećiwo zabyću „Zhromadnje město sam“ su z jeho wuslědkami přewažnje spokojom. Přiwšěm móhłoj wobdźělenje na někotrych zarjadowanjach kaž tež medialna prezenca lěpšej być. Zo dyrbja wuhotowarjo za to zjawnostne dźěło rozšěrić, su sebjekritisce spóznali. Na tamnym boku wšak měli so woni runja dalšim angažowanym akteram prašeć, hač je zmysłapołne, tajke tematisce zdźěla kryjace so akcije takrjec w bloku přewjesć – akciskemu tydźenjej přizamknyštej so bjezposrědnje Interkulturnej tydźenjej a po tym slěduja „tydźenje demokratije“. A Budyšenjo, chcedźa-li woprawdźe wjace činić, hač so přez špatny image města w medijach huntorić, měli so prašeć, hač su přeco skupiny­ kaž Silbermond, pražena kołbaska a dosć piwowych wozow trěbnych, zo bychu raz we wjetšej ličbje na dróhu šli. Ignorowace wusydanje ani wobraz ani situaciju njepolěpši. Bosćan Nawka

Zhorjelski wokrjes w prěnim połlěće z minusom 5,5 milionow eurow

Zhorjelc (AK/SN). Etat Zhorjelskeho wo­krjesa je najprjedy dale blokowany. To podšmórny komornik Thomas Gampe wčera na posedźenju wokrjesneho sej­mika. Při tym zhladowaše wón na to, kak su aktualny etat w prěnim połlěće zeskutkownili. „Mamy wotchilenje wot plana we wysokosći minus 5,5 milionow eurow“,­ wón wuswětli.

Praha (ČŽ/K/SN). Čěski prezident Miloš Zeman je na dźěłowym wopyće USA. Jeho hłowna naležnosć bě tam na wote­wrjenju hłowneje zhromadźizny UNO narěč, w kotrejž zaběra so z terori­zmom a migraciju. Zeman zetka so tež z generalnym sekretarom UNO Antónijom Guterresom a jeho naměstnikom, ruskim diplomatom Wladimirom Woronkowom, šefom noweho zarjada UNO za bój přećiwo terorizmej. Rozrěč wo wzajomnych poćahach měješe wón z južnokorejskim prezidentom Mondom Jae-inom a ze słowakskim wonkownym minis­trom Miroslavom Lajčákom.

Póndźelu bě so čěski prezident prestižneho počesćenja dočakał. Na wječeri nowiny The Allgemeiner spožči jemu ameriski židowska załožba Gershon Jakobson Jewish Continuity Foundation (GJCF) myto Warrior for Truth (Wojowar za prawdu). GJCF wuznamjenja wosobiny, kotrež maja zasłužby při hajenju zajimow židow. Priwatnje zetkał je so Zeman z ně­hdyšej mandźelskej nětčišeho prezidenta USA Donalda Trumpa, rodźenej Čechowku Ivanu Trump. Wo zetkanje z prezidentom njeje so čěska strona prócowała.

Budyšin (SN/bn). Akciski tydźeń přećiwo zabyću „Zhromadnje město sam“ je so minjenu sobotu z „wopominanskim wuchodźowanjom“ zakónčił. Mjez angažowanymi towarstwami a iniciatiwami běštej­ wosebje młodźinskej organizaciji SPD a Lěwicy za přewjedźenje akciskeho tydźenja zamołwitej.

„Cyłkownje smy jara spokojom z wotběhom a rezonancu“, měni Bruno Rössel, předsyda łužiskeje lěwicarskeje młodźiny solid. „Předewšěm zawodnej zarjadowani spočatk tydźenja běštej wuspěšnej. Wulki zajim wosebje młodźiny za europske temy a dobre rozmołwy su mje póndźelu wosobinsce jara zwjeselili. Wutorne zhromadne interkulturne warjenje je tójšto pasantow přiwabiło, štož běše cyle w našim zmysle. Při jědźi sej dźě cyle hinak mysle wuměnješ hač w formalnym ramiku. Přewažnje přihłosowacu wote­wrjenosć našim ćežišćam napřećo tohorunja pozitiwnje hódnoću.“

Ponowjenje Serbskeje kulturneje informacije so nachila. Po tym zo su tam špundowanje ponowili, sćěny wobarbili a nowu elektriku­ instalowali, staj sobudźěłaćerjej Sowrječanskeje Freundec firmy wčera nowe wohnjoškitne zachodne durje zatwariłoj. Přichodnu póndźelu, 25. septembra, ma kulturna informacija zaso wotewrjena być. Foto: SN/Maćij Bulank

Tema wohnjowa wobora steješe w minjenych měsacach hižo wjacekróć na dnjowym­ porjedźe Radworskeje gmejnskeje rady. Zawčerawšim bě tomu­ znowa tak.

Radwor (mdź/SN). Dobrowólna wohnjowa wobora w Radworju ma zaso nawodu. Je to znowa Rüdiger Schmidt. Na swojim posedźenju zawčerawšim su jeho ­Radworscy gmejnscy radźićeljo wobkrućili. Wón běše to tež hižo hač do kónca julija, po tym je wjesnjanosta Wincenc Baberška (CDU) zastojnstwo přechodnje wukonjał.

Rozdźělne měnjenja wo inwesticiji w Budyskim starym měsće

Budyšin (CK/SN). Staroměšćanski dźěl Budyšina móhł so z ryzy spanskej městnosću stać. Tónle strach widźi měšćanska radźićelka dr. Susanne Hozyna, by­dlaca sama ze swójbu hižo 14 lět w starym měsće. Zo ma na poslednjej hišće swobodnej, městu słušacej ležownosći twarjenje z bydlenjemi za starych ludźi nastać, tomu njemóže přihłosować. „Takle­ damy sej móžnosće wuwića z ruki wzać“, rjekny wona na zašłym posedźenju měšćanskeje rady.

Šěsć radźićelow předań ležownosće na Bórklinje wotpokaza,­ pjeć dalšich so hłosa wzda. Njeń­dźe wo to, staršich ludźi z města wućěrić, praji Claus Gruhl (Zeleni). ­W měsće pak je hižo na wšěch jědnaće zarjadnišćow za ­hladanje ­starych, dalše njetrjeba runje na tymle městnje być. Po jeho měnjenju by ­znajmjeńša šansa wobstała, wo ­parkowanju w starym měsće rozmyslować. Maik Hauschild (FDP) jemu znapřećiwi, zo parkowanski dom na Bórklinje tak a tak fungował njeby, dokelž by pře­drohi był.