Z wudaća: wutora, 10 oktobera 2017

Drježdźany (dpa/SN). Bywši šef sakskeho knježerstwa Kurt Biedenkopf (CDU) dósta za swój interview w nowinje Zeit tójšto kritiki. Minjeny tydźeń tam tuchwilneho sakskeho ministerskeho prezidenta Stanisława Tilicha (CDU) kritizuje. Mjez druhim Biedenkopf rjekny, zo nima Tilich hižo žane zrozumjenje kmanje knježić.

Serbski zapósłanc Marko Šiman (CDU) je so nětko słowa jimał a so wot wuprajenjow Biedenkopfa distancuje. „Sym čłowjesce přesłapjeny a zadźiwany“, 62lětny zwurazni. Unija a Stanisław Tilich trjebataj nětko podpěru, zo móhłoj politiske změny přesadźić. Nichtó, kotryž je prjedy raz zamołwitosć přewzał, njeměł so nětko wotwobroćić. Štó, hdyž-li nic Biedenkopf, móhł w tuchwilnej ćežkej situaciji strony zepěra być.

Zwjazkowy prezident Steinmeier Flensburg a FUEN wopytał

Flensburg (SN). Zwjazkowy prezident Frank-Walter Steinmeier a jeho mandźelska Elke Büdenbender staj zašły štwórtk zhromadnje ze schleswigsko-holsteinskim ministerskim prezidentom Danielom Gütherom (CDU) a jeho mandźelskej Anke Günther w běrowje Federalistiskeje unije europskich narodnych mjeńšin (FUEN) w Flensburgu pobyłoj. We wobłuku zahajenja swojeho zastojnstwa Steinmeier wšitke zwjazkowe kraje Němskeje wopyta. Běrow FUEN bě jedyn swojich cilow na sewjeru Němskeje, hdźež jeho prezident třěšneho zwjazka mjeńšin Loránt Vincze witaše. Tak spřistupnichu zamołwići přitomnym politiskim zastupjerjam projekt „Dom mjeńšin“ a z tym zwisowacu rólu jako „městno demokratije“, štož je zdobom hesło jězby zwjazkoweho prezidenta.

Mjenje rěčeć, a wjac skutkow rěčeć dać. To běchu prěnje mysle, jako čitach wo iniciatiwje Młodźiny europskich narodnych mjeńšin MENS, z kotrejž podpěruje wona wobydlersku iniciatiwu Federalistiskeje unije europskich narodnych mjeńšin FUEN. Tuta chce mjeńšiny škitać (Minority SafePack). Skupina 30 młodostnych bě wot 30. septembra hač do minjeneje njedźele z busom po wjacorych krajach Europy po puću a zbě­raše podpisma za iniciatiwu. Spore to dźěło, ale jenož tak pokazuješ, zo woprawdźe tež chutnje měniš. A to młodostni zawěsće činja, hewak njebychu sej tele dźěło scyła nabrěmjenili. Předewšěm mje zwjesela, zo su mjez čěrjacymi mocami teje­le akcije tež Serbja, mjenujcy čłonojo młodźinskeho towarstwa Pawk. Zdobom je derje, zo pobychu njedźelu tež w Chrósćicach, cyle po hesle: Widźeć a widźany być! Jenož tak ludźo wo tajkich akcijach zhonja. Tuž čińće dale tak! Tajke widźomne akcije su trěbne. Janek Wowčer

Mjeńšiny w Awstriskej žadaja sej wot přichodneho knježerstwa wjac kedźbnosće. To zdźěla tamniša nowinska agentura APA. W minjenych lětach njeje so nastupajo ponowjenje mjeńšinoweho zakonja ničo hibało, kritizuja zastupnicy mjeńšin. Tohodla sej woni nětko žadaja, spěchowanje narodnych skupin w kraju, kotrež je hižo dwaceći lět na samsnym niwowje zamjerznjene, znajmjeńša podwojić.

We wurisanju „Młodźina trenuje za olympiju“ wróćichu so koparki Serbskeho gymnazija Budyšin (SGB) ze zwjazkoweho finala w Berlinje ze 16. městnom. Wšitkim dźewjeć šulerkam 8. do 10. lětnika słuša wulke připóznaće za dotal najwuznamniši sportowy rezultat w stawi­znach serbskeho kubłanišća.

Po sensacionelnym dobyću krajneho finala w kopańcy w meji tutoho lěta (SN wo tym rozprawjachu), poda so wosom holcow Budyskeho Serbskeho gymnazija a wrotarka Nele Pjetašec (nětko SWŠ „Michał Hórnik“ Worklecy) do Berlina, zo bychu z dalšimi 15 dobyćerjemi tamnych zwjazkowych krajow wo najlěpše zaměstnjenje wojowali. Na nich čakachu koparki sportowych gymnazijow abo elitowych šulow sporta, mnozy z nich hrajo w młodźinskej zwjazkowej lize Němskeje. Někotre wusahowace 16lětne šulerki honja nětko hižo w žónskich wyšoklasowych mustwach za bulom. Nimo toho steji za kóždy gymnazij w pozadku mócne koparske zjednoćenstwo, kotrež młodych talentow spěchuje.

ST Marijina hwězda – VV Biskopicy 2:1 (25:18, 22:25, 15:4)

W swójskej hali wočakowachu volleyballisća ST Marijineje hwězdy najprjedy přećiwnika z Biskopic a na to MSV Budyšin IV. Prěni duel přećiwo Biskopicam bě kaž hižo minjene lěta stajnje wurunany, a to hač do 10:10. Norbert Wahlicht postara so w dobrej formje wo tójšto dypkow za Marijinu hwězdu. Gerald Bachmann, nowopřichad Marko Smoła (naposledk pola ST Viktorije Worklecy) a Metod Šołta swoje šansy zymnokrejnje wužiwachu a přećiwniski nadběh derje blokowachu. Pančičenjo so wosrjedź prěnjeje sadźby wotsadźichu a ju z 25:18 dobychu. Druha sadźba bě kopija prěnjeje, jeno zo nětko akterojo z Biskopic lěpje blokowachu a swójske nadběhi mócnje do Pančičanskeho pola bijachu. Zasłužbnje dźěše tuž druha sadźba na hosća (25:22). W tiebreaku bě spěšnje wšitko jasne. Po sylnych nadawkach Marka Smoły hosćićeljo z 9:1 wjedźechu a předskok hač do kónca (15:4) tež zakitowachu. Wjeselo bě wulke.

ST Marijina hwězda – MSV Budyšin IV 1:2 (21:25, 25:22, 12:15)

Krajny pokal

FSV Krostitz – Budissa Budyšin 0:4 (0:2)

Lok Lipsk – FV Eintracht Niesky 7:2 (5:1)

ST Ćisk – Chemija Lipsk 1:4 (0:0)

Taucha – FC International Lipsk 1:2 (1:1)

Radebeuler BC – VFC Plauen 2:0 (0:0)

Concordia Schneeberg – Lößnitz 1:3 (0:1)

For. Chemnitz – Hohenstein-E. 1:4 (0:2)

SG Weixdorf – Auerbach 0:4 (0:2)

SV Naunhof – Neugersdorf 0:9 (0:7)

SV Olbernhau – VfB Zwenkau 4:3 (2:2)

Lok Zwickau – Chemnitzer FC 0:3 (0:2)

FC Eilenburg – Jednota Kamjenc 1:0 (1:0)

SJ Chrósćicy – FSV Zwickau 0:5 (0:3)

Nowosólc-Hródk – Biskopicy II 1:3 (1:1)

SV Bannewitz – FC Stollberg 3:2 (3:1)

BSC Freiberg – FSV Oderwitz 3:5 (1:2)

TTV 97 Kamjenc

– DJK TTV Konjecy 7:9

W prěnjej wokrjesnej lize dyrbješe prěnje blidotenisowe mustwo DJK Konjecy přećiwo sylnemu mustwu TTV Kamjenc nastupić. Derby njehodźeše so na drama­tice přetrjechić a blidotenisća z Delan radowachu­ so skónčnje nad snadnym dobyćom 9:7.

Pola dwójkow móžeše jeničce duwo Matijas Kokla/Alojs Ćóška dypkować. W hrach jednotliwcow běštaj tónkróć na Konječanskej stronje Pětr Bejma a Michał Elstner najlěpšej a dobyštaj wobě hrě. Jedyn dobyty duel w kategoriji jednotliwcow zapisachu sej Dierk Šewc, Matijas Kokla a Alojs Ćóška. Tuž dyrbješe při stawje 8:7 za Konjecy štwórta dwójka derby rozsudźić. Tu měješe­ duwo Kokla/Čóška lěpše čuwy hač Kamjenčanskej hrajerjej a duel jasnje z 3:1 doby. Tak móžachu so serbscy blidotenisća nad snadnym dobyćom wje­selić.

Někotre dalše wuslědki z wokrjesnych klasow: Worklecy III – Radwor II 4:10, Radwor IV – Njeswačidło V 4:10 a Radwor III – Bukecy II 7:7. W dorosće dźělichu so Worklečenjo a Njeswačanscy blidotenisća njerozsudnje 7:7. Franc Nowak

Budissa Budyšin

– Berlinski AK 1:1 (1:1)

Zestawa domjacych: Ebersbach – Barnickel, Hoßmang, Patka, Kunze, Krauwčik (36. Mack), Pfanne, Weiß, Gehrmann, Bönisch (63. Milde), Schmidt

Po poražce 0:5 pola Berlinskeho FC chcyše Budissa doma zaso dypkować. Hrajersce sylny Berlinski AK z něhdyšim wrotarjom Budissy Jakubom Jakubovom pak chcyše tomu zadźěwać a sej ličaki sobu domoj wzać. Berlinjenjo započachu chětro koncentrowani a nadźěłachu sej někotre šansy. Třělwa ze zdalenosće prasny do łaty wrotow Maika Ebersbacha (8.), na to hosćo ćišć zwyšachu. Enes Küc pruwowaše Ebersbacha, tón pak njeda so přewinyć. Po dwaceći mjeńšinach bě prěni wulki nadběh hosći zakónčeny. To wuži Max Gehrmann z dalokej třělwu do třiróžka wrotow k 1:0 (26.). Jenož tři mjeńšiny pozdźišo wuruna Küc. Po tym dyrbješe Jonas Krawčik hrajnišćo zranjenja dla wopušćić.

termin turněra: 10. měrca 2018

městnosć: Sportowa hala

  na Budyskim Třělnišću

čas:   8 do 16 hodź.

zarjadowar:  Serbski Sokoł z.t.

wuhotowar:  Sokoł Budyšin z.t.,

  Škit Budyšin,

  Mustwo 1296

kontaktna adresa:

zaměr turněra: Pod sokołskim hesłom „Sportej a narodej – zdar!“ chcemy so zetkać k lóštnemu sportowanju a wjesołej zabawje. Zdobom chcemy styki mjez serbskimi volleyballistkami a volleyballistami a dalšimi sportowčemi a sportowcami skrućić a k popularizowanju Serbskeho Sokoła přinošować.

přeprošene mustwa: Na turněr su witani mustwa dotalnych turněrow a nowačcy. Volleyballowe cyłki z wukraja pře­prosyć njebudźemy. Kóždy volleyballist, kotryž so do jednoho mustwa zarjaduje, njech so w swójbje sportowcow derje čuje­.