Z wudaća: wutora, 17 oktobera 2017

Wo wuskutkach alkohola

Kamjenc. „Zamołwitosć wot wšeho spočatka“ rěka hesło přichodneho zarjadowanja žónskeje unije CDU Budyskeho wokrjesa, kotrež wotměje so jutře, srjedu, w 19 hodź. w Kamjenskim hosćencu „Złoty jeleń“. Kaž předsydka žónskeje unije Marja Michałkowa zdźěli, chcedźa tam rozłožić, kotre strachi za strowotu dźěsća hroža, hdyž žony za čas samodruhosće alkohol pija.

Přednošuje wo permakulturje

Budyšin. Z ekologiskim a na přichod wusměrjenym přirodnym wobhospodarjenjom pódy zaběra so permakultura. We wobšěrnym přednošku předstaji ­geologa Thomas Noack, kiž so při Miłočanskej skale za permakulturu zasadźuje a ju tam tež praktikuje, etiske hódnoty, wuhotowanske zasady a planowanske pomocy. Zarjadowanje wotměje so štwórtk, 19. oktobra, w 19 hodź. w Budyskim yoga-centrumje „Sri Sai Prana“ za cyłotne derjeměće na Pawoła Njekowej 2e. Wšitcy, kotřiž so za přirodu, zahrodu, ratarstwo a ekologiju zajimuja, su ­přeprošeni.