Z wudaća: štwórtk, 08 februara 2018

Wo lajskeho sudnika so požadać

Budyšin. Za chłóstanske a młodźinske komory na hamtskich a krajnych sud­nistwach w Hornjej Łužicy kaž w cyłej Sakskej přisydnikow pytaja. Wobydlerjo w starobje wot 25 do 70 lět, kotřiž so za to zajimuja, móža so hač do 30. junija wo tele čestnohamtske zastojnstwo požadać. Sakske ministerstwo justicy z toho wuchadźa, zo trjebaja za 2019 zahajacu so hamtsku dobu 4 000 lajskich sudnikow.

Najlěpše naćiski wustajane

Choćebuz. Mytowane naćiski za wuhotowanje „Přistawoweho kwartěra Choćebuz“ při nastawacym wuchodnym jězoru sewjernje Choćebuza móžeš sej hišće hač do kónca měsaca w radnicy při Nowych wikach wobhladać. We wobłuku pla­nowanskeho wubědźowanja bě jury pod nawodom prof. Heinza Naglera dźěła pjeć planowanskich a architekturnych běrowow wuzwoliła.

Slědźić wo domiznje

3. zetkanje sobudźěłaćerjow słowjanskich muzejow w Němskej

Budyšin (CRM/SN). Zakónčiło je so dźensa třidnjowske zetkanje sobudźěłaćerjow słowjanskich muzejow w Němskej. Hosćicel běše spečhowanske towarstwo Serbskeho muzeja Budyšin. Nimo pra­šenjow wo dale so stabilizowacej syči tutych­ specielnych kulturnych zarjadnišćow w Němskej stejachu na žurli Serbskeho doma wědomostne přednoški w srjedźišću zajima. K zakónčenju zet­kanja podachu so muzejownicy na ekskursiju na Kopšinjanske hrodźišćo.

Berlin (SN/at). Z jednej sadu skedźbni wot CDU, SPD a CSU dojednane koaliciske zrěčenje na to, zo chce móžne nowe zwjazkowe knježerstwo narodne mjeńšiny w Němskej podpěrać. „Wuznawamy so k tomu škitać a spěchować štyri narodne mjeńšiny w Němskej – Danow, Serbow, Frizow kaž tež Sintow a Romow.“, rěka w dypku „Kulturna infrastruktura a kulturne spěchowanje“ kapitla „XIII. zwjazanosć a wobnowjenje – demokratiju wožiwić“.

Wobšěrniše su w koaliciskim zrěčenju wuprajenja k němskim ludowym sku­pinam a mjeńšinam. Mjez druhim rěka, zo su wone „dźěl našeje kulturneje a historiskeje identity a wobohaćeja kul­turnu mnohotu w jich krajach“. Unija a SPD matej je za wažny zwisk mjez Němskej a jeje partnerskimi krajemi. „Chcemy je dale spěchować a podpěrać.“

Budyski Rěčny centrum WITAJ přewjedźe lětsa w jutrownych prózdninach druhi ferialny kurs za dźěći. Přeprošene na njón su šulerjo zwonka serbskeho sydlenskeho ruma.

Budyšin (SN/MiR). Ferialny kurs RCW wot 2. do 6. apryla měri so na dźěći w zakładnošulskej starobje wot 1. do 4. lět­nika. W cyłku poskići zarjadnišćo lětsa štyr­naće zajimcam składnosć, so na kursu wobdźělić.

Dobyćerjo 3. wubědźowanja „Rěči při­chi­lena komuna – Serbska rěč je žiwa“ su mytowani. Wobdźělenje pak stagněruje. To zwěsći tež serbski krajny zapósłanc Hajko Kozel (Lěwica).

Budyšin (SN/at). Ze 14 wobdźělnikami bě ličba runje wotzamknjeneho 3. wu­bědźowanja „Rěči přichilena komuna – Serbska rěč je žiwa‘“ akuratnje samsna kaž w lětomaj 2010/2011. Zapodate požadanja pak su jeno zdźělnje niwow minjeneju wurisanjow docpěli. Za zapósłanca Sakskeho krajneho sejma Hajka Kozela (Lěwica) je měrjenje komunalnych wukonow na polu dwurěčnosće „pod patronatom prezidenta krajneho sejma dr. Matthiasa Rößlera zmysłapołne“. Wuraznje dźakuje so wón wobdźělnikam, a gratuluje dobyćerjam. Wosebje pak so wjeseli, zo su Wojerecy lětsa prěnje myto docpěli. „To je jasne poselstwo wšěm tym, kotřiž z taflemi ,Wojerecy su němske‘ wokoło běhaja“, Kozel zwěsći.

Dźesaćlětny jubilej woswjeći Žonopowy wobchod a manufaktura na Mjasowych wikach­ w Budyšinje. Nic jenož domoródnym, ale wosebje tež turistam je to powabna adresa. Jednaćel Falk Lorenz a prokurist Manfred Lüdtke staj dźensa wo tym infor­mowałoj, kak je so jeju projekt přez prěni lětdźesatk zwoprawdźił. Wšako­ poskić­eja wone wudźěłki marki „Bautz’ner“, kotrež na tradiciju bohata Małowjelkowska fabrika pod třěchu firmy Develey z Unterhachinga zhotowja. Wob lěto je to něhdźe 15 000 tonow Budyskeho žonopa, štyri na hodźinu. Foto: SN/Maćij Bulank

Budyšin (SN). Wot dźensnišeho je notowa kniha „Zaklinči-li pišćałka, zhrěje mi so wutroba“ w poskitku. Serbske pěsnje za blokowe flety z klawěrnym přewodom je Měrćin Weclich zestajał a z pomocu Załožby za serbski lud wudał. Wobdźěłał bě adwentne, serbske dźěćace a dalše pěsnički Malte Rogacki z Drježdźan. „Sym próstwu staršich jako nadawk přiwzał, zo móža dźěći na jednore wašnje w skupince tež serbske štučki na blokowej pišćałce hrać“, Měrćin Weclich praji. Na předań je kniha mjez druhim w Budyskej SKI, Smolerjec kniharni a w Ralbičanskej kwětkarni „Kostrjanc“.

Seoul (dpa/SN). Zwjazkowy prezident Frank-Walter Steinmeier je na swojim wopyće w Južnej Koreji zasłužby něhdyšeho kanclera Willija Brandta za znowazjednoćenje Němskeje wuzběhnył. „Z kóždym wopytom w Koreji znowa začuwam, kajke zbožo bu nam w Němskej ze znowazjednoćenjom darjene“, rjekny wón dźensa w stolicy Seoulu. Brandt je ze swojej „zmužitej politiku puć k zjednoćenju rubał“. Prezident Moon Jae In přija z rukow Steinmeiera portret Brandta. Južna a Sewjerna Korea dyrbjałoj z dialogom pokročować, Steinmeier rjekny.

Na etat so dojednali

Washington (dpa/SN). Po měsacy trajacej zwadźe su so Republikanojo a Demokraća w senaće USA na etat dojednali, kotryž je na dwě lěće zapołoženy. Paket předwidźi jasnje zwyšene wudawki za zakitowanje a druhe programy. Republikanojo a Demokraća njeběchu so minjene měsacy wo etaće dojednać móhli a schwalichu stajnje zaso jenož přechodne rjadowanja. W januaru dóńdźe samo k dospołnemu blokowanju dźěła knježerstwa.

Znowa rekordne lěto

Washington (dpa/SN). Wójsko USA je w Syriskej hłowne zepěranišćo Syriskich demokratiskich mocow z lětadłami nadpadnyło. Milica syriske knježerstwo podpěruje. Po informacijach z Washingtona su při „zakitowanskej akciji“ w dole rěki Euphrat wjace hač sto prosyriskich wojowarjow zmorili. Ruska, zwjazkar syriskeho knježerstwa, mjenowaše nalěty „akt agresije“. USA su minjeny čas wospjet syriskemu knježerstwu bliske mocy nadběhowali a stajnje twjerdźili, zo jedna so wo zakitowansku naprawu.

Strasbourg (dpa/SN). Dwělomny pólski wiceprezident Europskeho parlamenta Ryszard Czarnecki, kiž bě minjeny čas z nacistiskimi přirunanjemi a wosobinskimi ranjenjemi napadnył, dyrbi za­stojnstwo złožić. Zapósłancy parlamenta su narodnokonserwatiwneho politikarja wčera z trěbnej dwutřećinowej wjetšinu wotsadźili. Bě to prěni króć w stawiznach parlamenta EU, zo su zastojnika po artiklu 21 jednanskeho porjada wotwolili.

Czarnecki, politikar narodnokonserwatiwneje pólskeje knježerstwoweje strony Prawo a sprawnosć, bě so ze šćuwańcu přećiwo liberalnokonserwatiwnej pólskej zapósłanči Europskeho parlamenta Różi von Thun do kritiki dóstał. Wón bě ju ze „szmalcownikom“ přirunał. Zapřijeće wužiwaja w Pólskej za kolaboraterow, kotřiž běchu Židow nacijam přeradźili. Frakciscy před­sydźa wjacorych europskich stron sej nětko žadachu, Czarneckeho wotsadźić.