Z wudaća: srjeda, 17 oktobera 2018

Rěčicy (FAG/SN). Sta ludźi su minjenu njedźelu Rěčičanski Erlichtec dwór wo­pytali. Přiwabili njejsu jich jeno słónčne wjedro a kładźite domy, ale předewšěm nazymske zahrodowe wiki. Nimale tři­ceći sakskich wikowarjow je tam swoje twory poskićało. Jich paleta sahaše wot najwšelakorišich rostlin přez nazymsku pychu za domjacnosć hač k tójšto družinam jabłukow.

Prěni raz pódla bě Bärbel Wendler z Wósporskeje štomownje ze swojim sado­wym stejnišćom. Tam dyrbjachu kupcy mjez nimale 90 družinami jabłukow, krušwow a kwitow rozsudźić. Wězo sy je najprjedy woptać móhł, tak zo nje­trjebaše nichtó kóčku w měše kupić. Nimo­ toho móžachu ludźo swójske družiny jabłukow postajić dać. Zo bě Wendlerec stejnišćo stajnje derje wopytane, zale­žeše sobu na tym, zo móžachu wopytowarjo hnydom w susodstwje alpakaj z Kinsporskeje hole wobdźiwać. Jörg Fie­dler je so z nimaj hižo wosmy raz na nazymskich wikach wobdźělił.

Róžant. Wutworić přidatne žłobikowe městna w Smjerdźacej budźe jedna z temow přichodneho posedźenja gmejnskeje rady Ralbicy-Róžant jutře, štwórtk, we 18.30 hodź. w Róžeńčanskej sydarni. Nimo toho budźe rěč wo nowym hašenskim jězdźidle za Konječansko-Šunowsku wohnjowu woboru a wo kreditowym zrěčenju.

Wotrow. Tohorunja jutře, ale w 19 hodź. zetkaja so čłonojo gmejnskeje rady Pančicy-Kukow, tónraz na Wotrowskej starej šuli. Na jich dnjowym porjedźe steji mjez druhim třeći wotrězk ponowjenja Šule Ćišinskeho. Dale chcedźa wobzam­knyć, postawu swj. Bosćana w Swinjarni restawrować dać. Wobě posedźeni stej zjawnej, a wobydlerjo su přeprošeni.

Na slědach ptačkow

Rakecy. Přirodowědnu ekskursiju na slědach ćahatych ptačkow podłu hatow pola­ Kačeje Korčmy blisko Rakec přewjedźe Kamjenski Muzej zapadneje Łužicy njedźelu, 21. oktobra, wot 8 do 11 hodź. Wobdźělnicy wobkedźbuja tam sta kačkow a husow, kotrež na swojim nazymskim ćahanju přestawku zapołoža. Wobdźělenje płaći pjeć eurow. Při přizjewjenju pod telefonowym čisłom 0 35 78/ 7 88 30 zajimcy zhonja, hdźe so ekskur­sija započnje.

Nawijej pokradnyć chcył

Budyšin. Sobudźěłaćer wobchoda na Budyskich Žitnych wikach je so zawčerawšim paduchej do puća stupił, jako tón wobchod wopušći. 26lětny chcyše nawijej w hódnoće 460 eurow pokradnyć. Na­stro­jej bě wón w tobole schował, kotraž bě tak preparowana, zo njeby detektor při durjach alarm zahibała.

Što demonstranća wot strukturneje komisije Zwjazka wočakuja

Werner Koitschka chce skónčnje jasnosć. „Kóždy dźeń bjez njeje je zhubjeny dźeń“, rje­k­ny Miłoražan na demonstraciji minjeny štwórtk w Běłej Wodźe, jako witachu tam zwjazkowu komisiju za rozrost, struk­tur­nu změnu a dźěło. Z dalšimi Miłoraža­nami žada sej wón spěšne přesydlenje swojeje wsy. „Minjeny čas smy tójšto kompromisow na so brali, dwě dźělnej přesydleni sym hižo dožiwił. Nětko dyr­bi­my jednać.“ Proch, hara, střasenja a pobrachowaca dnowna woda hižo dlěje hač pjeć lětdźesatkow Miłoražanow poće­žuja. Wuhlowa jama Wochozy je dźě jenož něhdźe kilometraj wot wsy zdalena. Miłoraz – tam bě Koitschka 1960 z wotwodźenjom a 1968 z wotkryćom jamy započał – ma brunicowa jama po planach koncerna Łužiska energija a milinarnje (LEAG) prawdźepodobnje w lěće 2032 docpěć a wotbagrować. Tak dołho so mnozy wobydlerjo wsy na dočasny kónc nadźijeć a tež čakać nochcedźa. Přehłuboke, přebolostne a přewobćežne su dušine rany wuhloweje jamy dla.

Nimale cyłe žiwjenje z brunicu zwjazani

Wjacori serbscy běharjo na podestnych městnach stali

Kónc septemba přewjedźechu 18. raz běh po Biskopičanskej Butrowej horje – posledni to hódnoćenski z cyłkownje pjatnaće lětušeho tohorunja 18. Wo­pačanskeho cupa. Spočatk oktobra su w Biskopičanskej sportowni prěnich třoch kóždeje starobneje skupiny rjad­neje lisćiny počesćili. Tamnej hłownej rjadnej lisćinje w Sakskej a Braniborskej, Drježdźanska wobwodna serija (hišće dwě wubědźowani) a Łužiska běhanska serija (hišće pjeć běhow), skónčitej so srjedź nazymnika respektiwnje hakle posled­ni dźeń lěta, silwester w Oberlichtenauwje.

VFC Plauen – Budissa Budyšin 4:6 po třělenju jědnatkow (0:1, 1:1, 1:1)

Zestawa hosći: Ebersbach – Merkel (72. Treu), Bär, Hoßmang, Kral, Dartsch, Ciapa (84. Bönisch), Krawčik, Schmidt, Schlicht, Langr (100. Wockatz)

Za duel w Plauenje w 3. kole krajneho pokala pobrachowachu Budissy wjacori koparjo. VFC Plauen, hrajacy we wyšej lize­-juh, bě regionalnemu ligistej porjadny přećiwnik. Budyšenjo hru wot spočatka postajowachu. Prěnju dobru móžnosć měješe Jonas Krawčik. Plauenski wrotar pak třělwu popadny (7.). Po tym zo bu Mateusz Ciapa w šěsnatce potorhnjeny, Tony Schmidt jědnatku přetwori (27.).

Z mjezywuslědkom hosćićeljo spo­ko­jom njeběchu. Tak woni w 52. min. před 703 přihladowarjemi wurunachu. Po tym pak žane wrota wjac widźeć njeběchu. Při třělenju jědnatkow pře­two­ri­chu za Budissu najprjedy Philipp Dartsch, Daniel Bönisch a Niclas Treu. Patrick Grandner pak zwrěšći na wul­kotnje reagowacym Maiku Ebersbachu. Tež Michael Schlicht a Martin Hoßmang bě­štaj wuspěšnaj. Clemens Werner