Hamor (AK/SN). Turistiska informacija na Hamorskim přibrjohu Bjerwałdskeho jězora je mjez wopytowarjemi přiběrajcy woblubowana. Tole podšmórny Hamorski wjesnjanosta Achim Junker (CDU) na wčerawšim posedźenju gmejnskeje rady. Wot wotewrjenja informacije spočatk junija 2014 je ju wjace hač 45 000 ludźi wopytało. Woni prašachu so hłownje za turistiskimi poskitkami. „Najwjetši dźěl hosći našeje gmejny chwali sej měr, rjanosće krajiny a derje wutwarjenu syć kolesowarskich šćežkow. Na druhim boku přeja sej woni mnohostronske poskitki kwalitatiwnych přenocowanskich móžnosćow a gastronomiskich zarjadnišćow“, rozłoži wjesnjanosta.
W prěnimaj lětomaj wobstaća turistiskeje informacije je ju po wjace hač 10 000 ludźi wopytało, w minjenych třoch sezonach po nimale 8 000. Tuchwilu, tak Achim Junker, přestaja sobudźěłaćerjo gmejny wšitke infrastrukturne zarjadnišća při jězoru na zymski čas. Hłownje su to zjawne nuzniki, parkowanišća a wobswětlenske připrawy.
Budyšin (CRM/SN). Kaž kóžde lěto wopominachu katolscy a ewangelscy křesćenjo w klóšterku Klarisow pogrom na židowskim ludźe, wotměwacy so přez nacionalsocialistow před 80 lětami. Minjenu sobotu wječor steješe na wołtarju město křesćanskich symbolow zaso menora, sydomručny swěčnik židowskeje liturgije. Zaklinči pak tohorunja židowska hudźba, z kotrejž přispori so cyle swojotna atmosfera hinašeje nabožneje kultury. Z tym dóstachu přitomni, mjez nimi tohorunja někotři serbscy, tež hinaši přistup k modlenju kadiša, židowskeje modlitwy za zemrětych.
Hodźij (CK/SN). Zwotkel maja wsy swoje mjena je přewšo zajimawe. Tole pokaza přednošk prof. dr. Bernda Koenitza minjenu sobotu w Hodźijskim towarstwowym domje. Bywši profesor na Lipšćanskej uniwersiće je so lětdźesatki ze słowjanskim pochadom wjesnych mjenow zaběrał. Hač so štyri zapřijeća w chronice Thietmara von Merseburga před tysac lětami woprawdźe na Hodźijski wjesny dźěl Žičeń poćahuja, tele prašenje jeho hižo dlěje zaběra. Jako Žičeń loni swoje tysaclětne wobstaće swjećeše, nawjazachu kontakt k dr. Koenitzej. Nětko sćěhowaše přeprošenje na přednošk w domizniskim towarstwje.
ST Marijina hwězda
– Wojerowski FC 1:2 (0:0)
Zestawa domjacych: D. Matik – R. Cyž, Škoda, Rab, Ch. Cyž, Pjetaš, Kuring, Hawš (49. Bělk), Peschmann, P. Schmidt (71. Winkler/80. Lipič)
Z dotalnej wuspěšnej seriju w chribjeće chcychu chowancy trenarja ST Marijineje hwězdy Erwina Kleinmanna faworitej ze Zusoweho města we wokrjesnym pokalnym kole paroli skićeć. To so tež přez dołhe fazy hry poradźi. Wobčuchanska faza na spočatku partije pak nastała njebě, dokelž mějachu hosćo po někotrych sekundach hnydom prěnju móžnosć. Nadběhowar pak třěli nimo wrotow, kotrež škitaše Dawid Matik. Wobaj cyłkaj sej wosebje w srjedźnym polu ničo njedarištej, škitaj steještej wěsće a tak nasta jenož mało móžnosćow. Wólny kop Jakoba Pakoßnicka w 13. min. ze zdalenosće 20 metrow bě hižo šibjeńcu wrotow docpěł, w poslednim wokomiku pak wrotar hosći Florian Rang bul z kuta škrabny. Najwjetšu šansu na nawjedowanje měješe w 24. min. Feliks Pjetaš, jako wón po přihrawce Pakoßnicka sam na wrota běžeše. We wrotarju Rangu pak namaka swojeho mištra.
CVJM Zhorjelc – Viktoria Worklecy 3:1 (25:21, 27:25, 22:25, 25:23)
Za Worklecy hrajachu: Marko Brězan, Jan Bětnar, Ludwig Eckert, Marcel Rjelka, Józef Krawc a Daniel Wałda
Na 4. hrajnym dnju bě druhi wobwodneje ligi pola třećeho nastupił. Předznamjenja za Worklečanow pak dobre njeběchu. Tři dny do duela zrani so hłowny nadběhowar Stephan Gedik a tež Clemens Eckert njesteješe k dispoziciji. Tak hraješe jenož šěsć Worklečanow z liberom Danielom Wałdu jako nadběhowarjom.
Aktualna tabulka wobwodneje ligi
1. Volleys Koblicy 7 21 : 4 21
2. CVJM Zhorjelc 7 18 : 9 17
3. Viktoria Worklecy 6 14 : 8 11
4. MSV Budyšin 04 II 6 11 : 13 8
5. Módro-běli Wojerecy II 5 8 : 9 6
6. TSV Niederoderwitz 5 6 : 12 5
7. OSSV Kamjenc 6 7 : 15 4
8. ST Wulka Dubrawa 5 5 : 12 3
9. TSV Kundraćicy 5 5 : 13 3
Jenož tydźeń po ćežkej wonkownej hrě w Zhorjelcu mějachu wolejbulisća ST Viktoria Worklecy dalši ćežki nadawk před nosom. Na tamnej stronje saka steješe zestupnik ze sakskeje klasy a aktualny načolnik wobwodneje ligi. Hač na libera Daniela Wałdu stejachu Worklečanam wšitcy hrajerjo k dispoziciji, tak zo móžachu hosćo z wosmjomi nastupić.
Kónc winowca wojowachu sakscy billardowcy wo titule krajnych mištrow. W Freibergu zetkachu so najlěpši sportowcy starobnych klasow U 17 a U 19 Vogtlanda, Lipska a Hornjeje Łužicy, zo bychu so w disciplinach pool a karambol wubědźowali. Wšitcy dobyćerjo zastupuja klětu w aprylu zhromadnje sakske mustwo na němskich mišterstwach w hessenskim Bad Wildungenje.
Za Budyske mustwo „MSV 04 BiGa Budyšin“ dojědźe sej 13lětny gymnaziast Janoš Nuk do Freiberga, kiž hraje swoju druhu aktiwnu sezonu. Wón chcyše so porno lońšim prěnim nazhonjenjam polěpšić a w najlěpšim padźe wo medalju w poolowymaj disciplinomaj na dźewjatku (9-Ball) a na dźesatku (10-Ball) wojować, hačkuli słuša k najmłódšim hrajerjam.