Něhdźe 1 100 wobdźělnikow w čerwjenym kabaće a z čapku na hłowje je wčera na mjeztym 10. Mikławšowym běhu w Michendorfje južnje Berlina startowało. To je nimale runje telko kaž loni, organizatorojo zdźěleja. Zajimcy móžachu so rozsudźić, hač chcedźa połtřeća, pjeć abo dźesać kilometrow zmištrować. Nimo toho bě stafla za sportowske swójby zarjadowana. Tež dźěći mějachu swoje wubědźowanje, wšako bě so 120 z nich přizjewiło. Mikławšowy kostim znajmjeńša bě za wšěch běharjow winowatosć.
Wosrjedź sławneho Španiskeho schodu w Romje stejo wostał je 27lětny ze swojim awtom. Kaž nowiny rozprawjeja, bě wón kontrolu nad wodźidłom zhubił a hakle na baroknych schodach stejo wostał. Awto bě chětro skóncowane, schód z 18. lětstotka bu hač na čornu smuhu borzdźidła lědma wobškodźeny.
Drježdźany (SN). Sakske ministerstwo za wobswět je minjene měsacy wobzamknjenju krajneho sejma jenož wahajo wotpowědowało. Dźe wo rehabilitaciju dweju sobudźěłaćerjow biosferoweho rezerwata Hornjołužiska hola a haty, kotrejuž běchu dospołnje njewoprawnjenje pušćili. Wahanje ma nětko konsekwency, kaž sćelak MDR rozprawja. Andreas Skomudek, bywši předsyda biosferoweho rezerwata, bě zhromadnje z 200 wobydlerjemi w meji 2016 Sakskemu krajnemu sejmej peticiju zapodał, zo by pušćenje sobudźěłaćerjow zjawnje předźěłać dał. Z peticiju sej žadachu, potrjecheneju dospołnje rehabilitować a wotpowědnje wotškódnić. To pak njeje so po měnjenju Skomudeka dosahajcy stało. Tuž so wón wo to prócuje, peticiju znowa na dnjowy porjad peticiskeho wuběrka zapisać dać.
Budyšin (SN/BŠe). Statistiska rozprawa Budyskeho hospodarstwa wo třećim kwartalu 2018 so jara derje čita. W žanym měsće po cyłej Sakskej njeje podźěl přistajenych tak wulki kaž w sprjewinym měsće. Na 1 000 wobydlerjow zličichu statistikarjo 665 k socialnemu zawěsćenju winowatych dźěłaćerjow. W Budyšinje zasydlene předewzaća registruja zdobom wjetše wobroty hač w Lipsku a Drježdźanach. Přerěznje docpěchu wone w lěće 2016 wobrot něhdźe 1,18 milionow eurow, z čimž leži město Budyšin jasnje nad sakskim přerězkom. Jenož w Kamjenicy su zawody w samsnym času wjace wobrota nadźěłali.
Zo so Budyšin na dobre hospodarske stejnišćo wuwiwa, pokazuje so tež na ličbje ludźi, kotřiž wšědnje do sprjewineho města na dźěło jězdźa. Cyłkownje 18 281 přistajenych je lětsa w juniju sem na dźěło dojězdźowało.
Ličba bjezdźěłnych so tohorunja pomjeńša. Bě-li jich w juniju před dźesać lětami 3 300, zličichu lětsa w samsnym měsacu jenož hišće 1 789 ludźi bjez dźěła.
Dale zwjesela, zo mjenje wobydlerjow Budyšin a wokolinu wopušća.
Jaseńca (RL/SN). Zhromadnosć mjez Serbami a hudźba stej młodostnu Judith Pjetašec z Pančic-Kukowa runje tak kaž wjace hač sto dalšich ludźi na spěwny wječork sobotu, 8. decembra, do Jaseńcy wabiłoj. Skupina PoŠtyrjoch bě mjeztym wosme lěto pospochi na beneficny koncert do bróžnje Floriana Rynča přeprosyła. Tónraz je hosćićel, kiž so wo wšu logistiku stara, zdobom sam jako hudźbnik w programje sobu skutkował, a to z dujerskej kapału Tuten und Blasen.
Zběrali su na koncerće za projekt biskopa Clemensa Pickela w ruskim Saratowje. Tam hižo wot 1990tych lět swójby mjez druhim z tym podpěruja, zo jim kruwu jako žiwjenski zakład přewostajeja. Moderator Jan Rjeda rozłoži, zo płaći jedna něhdźe 500 eurow. Wunošk wječora wučinja tysac eurow – takrjec dwě kruwje za swójbje w Ruskej.
Běły Chołmc (AK/SN). Do kóždeje wjetšeje hłubokotwarskeje naprawy maja archeologojo składnosć, potrjecheny areal přepytować. Tak dźěłaja woni tuchwilu pola Běłeho Chołmca, hdźež přichodnje wysokonapjaty milinowód do zemje składu. Tohodla tam Veronika Büttner a Mario Steinbach po dołhosći 750 metrow slědźitaj, hač je teren archeologisce zajimawy. Z jednorym gratom so wonaj centimeter po centimetru do zemje dźěłataj. „Kóžde wurywanje je hinaše. Njewěmy do toho, što nas wočakuje“, Veronika Büttner rozłožuje.
Třěchikryjerski skład wopor wohenja
Hornja Hórka. Tójšto dźěła mějachu wohnjowi wobornicy kónc tydźenja w Hornjej Hórce. Pjatk wječor wołachu jich na Šulsku, hdźež so skład třěchikryjerskeje frimy paleše. Kaž policija zdźěli, běchu w něhdźe 40 x 40 metrow wulkej hali wjetše mnóstwa palneho drjewa a twaršćizny składowane kaž tež twarski kran wotstajeny. Wšitko sta so z woporom płomjenjow. Tež twarska substanca hale je wohenja dla chětro poćerpjeła. Wosoby so njezranichu. Škodu trochuje wobsedźer na wjac hač 150 000 eurow. Kaž w rozprawje policije dale rěka, zwěsćichu wohnjowi wobornicy wjacore městna, na kotrychž bě woheń wudyrił. Kriminalna policija pad tuž nětko přepytuje.
ST Marijina hwězda
– ST Nadrózna Hrabowka 3:0 (2:0)
Zestawa domjacych: O. Schmidt – Ch. Cyž, Rab, Škoda, R. Cyž, P. Schmidt (68. Zelnak), Pjetaš, Bělk, F. Peschmann, J. Pakoßnick (83. Čornak), Eldor (74. Melnyk)
Na derje přihotowanym twjerdym hrajnišću su koparjo ST Marijineje hwězdy swoju poslednju domjacu partiju prěnjeje połserije přewjedli. Hakle po 14 mjeńšinach mějachu prěnju mału móžnosć. Po přihrawce Jakoba Pakoßnicka wot zakładneje linije k Falkej Peschmannej stłóči naposledk mjenowany bul nimo wrotow. Po prěnjej składnosći hosći (26.) poradźi so chowancam trenarja Erwina Kleinmanna nawjedowanje. Křesćan Bělk bě so w srjedźnym polu přesadźił a z tróšku zbožom docpě kulowata koža noze Peschmanna. Jeho třělwa ze zdalenosće 20 metrow zadyri na to w delnim, prawym kuće (27.). Jeno tři mjeńšiny pozdźišo klóšterscy koparjo na 2:0 zwyšichu. Wólny kop Feliksa Pjetaša přizemi we wrotach přećiwnika.
Zestawa domjacych: Matješk – D. Kral, Haška, Šołta, Hanuza, Pawlik, Domš (69. Hrjehor), Plaettner, Hoelzel, Wagner (59. Ričel), Korjeńk (84. Lejnart)
„Hej, pój, to njesměmoj na žadyn pad skomdźić“, wona rjekny, torhny mje do taksy, a po někotrych kilometrach stejachmoj při starće. Bjez rěčnych kmanosćow, něhdźe 8 000 km zdalenaj wot Łužicy. Sportowu drastu njemějachmoj, ani prawe běhanske črije. Za mjenje hač wosom hodźin dźěše hižo lět wróćo do Němskeje. Běše to posledni wječor naju jězby po kupje Sri Lanka. Tři njedźele połne impresijow ležachu za namaj. Tři njedźele, w kotrychž běchmoj so nimale wšědnje do noweho regiona podałoj a sej kóždy druhi dźeń hinaši nóclěh pytałoj. Pomału ze swojej partnerku ani předźěłać njemóžachmoj, što wšo běchmoj dožiwiłoj. A nětko? A nětko wobdźělichmoj so spontanje na nócnym běhu „Colombo night run“ w stolicy Sri Lanki. Hodźinu do toho bě moja přećelka zarjadowanje w socialnej syći namakała, wačoki běchmoj w hospodźe wostajiłoj. A što dyrbju rjec? Akcija běše idealne zakónčenje naju jězby. Njebě tak, zo mějach přebywanje w cuzbje syte, ale kusk mučny běch přiwšěm.