Z wudaća: srjeda, 13 nowembera 2019

Rowno (JoS/SN). Z přazu su minjenu sobotu w Rownom lětušu sezonu zjawnych zarjadowanjow na tamnišim Njepilic statoku­ zakónčili. Dokelž bě chětro mokre a chłódne wjedro, wostachu čłonojo Rownjanskeho towarstwa Njelipic dwór mjenje abo bóle mjez sobu. Wšako je mjeztym tež po wjedrje nazyma. Kołwróty pak so přiwšěm pospochi wjerćachu. Přaza dźě je z tradiciju, wšojedne što so wonka póćmje stawa.

Štyri kołwróty so lětsa wjerćachu; dalšej – kompletnje zasadźomnej – móžachu sej zajimcy dokładnje wobhladać. Wšitke słušeja towarstwu Njepilic dwór. Znowa natwarili a sporjedźeli su je na iniciatiwu čłona towarstwa Manfreda Richtera z pomocu Helmuta Kurja z Blunja. Tak móža předźěłanje lenu dźensa zaso pokazować: Na kołwrótach nitki přadu a je na historiskich krosnach na płat tkaja. Krosna sobu sporjedźał je tohorunja Helmut Kurjo ze swojej fachowej wědu.

Njeswačanska gmejnska rada sej rozsudy na dobro komuny lochke nječini

Njeswačidło (JK/SN). Hibićiwe a aktiwne Njeswačanske towarstwo přećelow domizny a kultury bě na wčerawšim po­sedźenju tamnišeje gmejnskeje rady sylnje­ zastupjene. Hnydom na spočatku skedźbni předsyda towarstwa Dieter Petschel­ na přičinu jich wulkeje prezency. W běhu dnjoweho porjada dźěše mjenujcy tež wo to, wobzamknyć wotnajenske zrěčenje gmejny z towarstwom wo ležownosći we Łuze njedaloko wětrnika. Tam chcedźa po planach towarstwa stajić tak mjenowany katowy dom, kotryž tuchwilu hišće na Lišej Horje steji, ale pomału rozpaduje. Towarstwo chce jón zachować a na nowym městnje znowa natwarić. Za to su zapodali próstwu wo spěchowanje regionalnemu běrowej Leader w Rakecach. Wuměnjenje za pjenjezy z programa pak je, zo ma tež ležownosć, na kotrejž chedźa spěchowany projekt natwarić, towarstwu słušeć.

Hodownu pyramidu pokradnyli

Budyšin. Tež paduši so na hody hotuja. To móhł sej myslić, čitaš-li aktualnu zdźělenku policije, w kotrejž steji, zo su so njeznaći namócnje do pincy na Budyskej Ericha Weinertowej zadobyli, ju dospołnje přeborkali a z njeje hodownu pyramidu­ spakosćili. Hódnotu trochuje policija na 200 eurow. Wěcna škoda wučinja něhdźe 50 eurow.

Budyšin (SN/mwe). 636. króć wotměja so wot 29. nowembra do 22. decembra Budyske Wjacławske wiki. Program a no­wosće je město jako zarjadowar po chronice najstaršich hodownych wikow Němskeje wčera nowinarjam z prezentaciju programoweho zešiwka předstajiło. Zapisane su do njeho mjez druhim kulturne programy.

Tak móža so wopytowarjo wikow 30. nowembra na serbski podźěl wjeselić. W 15.30 hodź. wuhotuje chór Budyšin na Hłownym torhošću hodowny koncert. Za 16 hodź. je na samsnym městnje Wojerowske dźěćatko přizjewjene. Na serbsko-němske adwentne spěwanje na Hłownym torhošću přeprosy njedźelu, 8. decembra, wobydlerjow a hosći wot 15 do 16 hodź. serbske towarstwo Škit Budyšin. Woknješko adwentneho kalendra chce tam rumpodich 16. decembra w 15 hodź. z dźěćimi Budyskeje Serb­skeje pěstowarnje „Jan Radyserb-Wjela“ wočinić. Serbski ludowy ansambl pla­nuje we wobłuku Wjacławskich­ wikow předstajenje rejwaneje bajki za dźěći „Hodowne potajnstwo“.

Budyšin (SN). W Budyskim parkowanskim domje „Centrum“ instaluja hač do soboty nowu techniku. W tym času njeje dom za krótkoparkowarjow wočinjeny, stajni parkowarjo móža jón dale wužiwać. W „Centrumje“ instaluja nowe kasowe awtomaty, zawěrowe připrawy a připrawy za parkowanske lisćiki. Inwesticija płaći něhdźe 65 000 eurow.

Přednošuje wo pućowanju

Ćisk (SN). Znaty krosnowar Achim Mič z delnich Sulšec je zajutřišim z hosćom w Ćisku. We 18 hodź. přednošuje wón na žurli ­ wohnjoweje wobory wo swojim pućowanju po šěsć krajach Afriki.

Na wosebite čitanje

Kamjenc (SN). Kamjenski Muzej za­padneje Łužicy přeprosy pjatk, 15. nowembra, w 15 hodź. na „dnju předči­tanja“ na wosebite čitanje „Haiko, módry žrawc“. W elementariju pokazuja k tomu tež wosebitu wustajeńcu wo žrawcach.