Z wudaća: srjeda, 04 decembera 2019

Budyšin (CK/SN). Bjezdźěłnosć w Hornjej Łužicy je snadnje přiběrała. W nowembrje bě 16 094 ludźi bjez joba. To je 16 wjac hač před měsacom. Přiwšěm su dźěłowe wiki stabilne, kaž Ilona Winge-Paul zdźěli. Jednaćelka za operatiwne naležnosće Budyskeje agentury za dźěło poda za to tři přičiny: „Powšitkowne wožiwjenje nazymu dale postupuje, hodowne wikowanje je zahajene a twarske zawody su w kónčnym spurće, zo bychu do zymy poslednje dźěła zmištrowali.“ Kwota bjezdźěłnosće w zarjadniskim wobłuku Budyšin wučinja cyłkownje 5,7 procentow. W Hornjej Łužicy maja 4 672 swobodnych dźěłowych městnow.

W nowembru su firmy hižo prěnich ludźi­ w powołanjach, kotrež wot wjedra wotwisuja, pušćili. Z tak mjenowanej sezonowej přiražku za krótkodźěło drje móža tomu zadźěwać, wulkeho naprašowanja za fachowcami dla pak njemóže nichtó garantować, zo so nazymu pušćeni sobudźěłaćerjo nalěto zaso na swoje městno wróća. „Ze sezonowej přiražku za krótkodźěło dźěłowe poměry dale wobsteja, a předewzaća wostanu stabilne“, Ilona­ Winge-Paul potwjerdźi.

Podhladnych zwěsćili

Budyšin. Sakska policija je w zhromadnym dźěle ze zastojnikami z Čěskeje a Pólskeje móhła w naležnosći manipulowanych bankomatow w Budyskim a Zho­rjelskim wokrjesu štyrjoch podhladnych zwěsćić. Wšitcy štyrjo su z wuchodnych krajow. Wumjetuja jim manipulaciju bankowych awtomatow w znajmjeńša 22 padach, zdźěla Zhorjelska policajska direkcija. Kaž wottam dale rěka, su wšitcy štyrjo skućićeljo po wšěm zdaću tež w Lipsku a we wjacorych městach Braniborskeje podobne njeskutki skućili. Policija tuž dale přepytuje.

Młodej Serbowce stej ze swojim debitom hłowne myto wubědźowanja Łužiskeje filmoweje přehladki dobyłoj

Sofija Cyžec a Luisa Nawkec stej hłowne myto lětušeje Łužiskeje filmoweje přehladki dobyłoj. Jury přizna jimaj wuznamjenjenje za pask „Smy“. Dwanaće mjeńšin trajaca produkcija portretuje pjeć wosobinow, rozestajacych so z prašenjom za swojej identitu a što za nje rěka, Serb być.

„Wuznamjenjenje je naju njesměrnje překwapiło. Sprawnje prajene přeco hišće tak prawje njewěrju, zo smój myto dobyłoj. Wšako bě wubědźowanje woprawdźe sylne, telko rozdźělnych, dobrych filmow su tam pokazali! Sama njebych wědźała, kajku produkciju bych wuzwoliła“, Sofija Cyžec powěda.

Wot podawka k podawkej

Tabulka wokrjesneje wyšeje ligi

1. Póst Germania Budyšin 14 41 : 20 33

2. Drohotka Ramnow 14 38 : 21 32

3. LSV Hory 14 34 : 19 29

4. Módro-běli Kulow 14 28 : 17 28

5. ST Horni kraj-Sprjewja 14 38 : 20 26

6. ST Hnašecy-Dobruša 14 29 : 25 23

7. Sokoł Ralbicy/Hórki 14 29 : 27 23

8. TSV Wachau 14 32 : 29 18

9. SG Großnaundorf 14 26 : 29 17

10. TSV Połčnica 14 25 : 41 16

11. Wojerowski FC 14 35 : 34 15

12. ST Marijina hwězda 14 25 : 35 14

13. Natwar Němske Pazlicy 14 18 : 28 13

14. ST Kinspork/Łužnica 14 15 : 23 12

15. ST Porchow 14 11 : 41 9

16. Motor Kumwałd 14 27 : 42 7

TSV Połčnica 1920

– Sokoł Ralbicy/Hórki 1:3 (1:2)

Zestawa hosći: Schöne (46. Ch. Gloxyn) – M. Matka (36. G. Kurjat, 65. Nuk), Janca, K. Matka, D. Gloxyn, Šewc, Wałda, Bjeńš, Rawš, M. Kurjat, Šiman

38. sokołski wolejbulowy turněr wo pokal Domowiny budźe klětu 16. meje w Radworskej sportowej hali „Slavia“. Na po­prawnje planowanym terminje je w Radworju firmowanje. Cyłkowne wupisanje steji na internetnej stronje Serbskeho Sokoła.

Wobkedźbować mustwa maja, zo přisłuša kóždemu z nich znajmjeńša pjeć (wšitcy pjećo dyrbja na hrajnišću stać a hrać), maksimalnje dźesać hrajerjow, zo su měšane cyłki muži a žonow dowolene, zo smě jednotliwc w běhu turněra jenož w jednym mustwje nastupić a zo je zapłaćenje startoweho pjenjeza 20 eurow na konto Serbskeho Sokoła zdobom zwjazowace přizjewjenje mustwa (konto: Kreissparkasse Bautzen, IBAN: DE31 8555 0000 1000 0983 77 / SWIFT-BIC: SOLADES1BAT, mějićel konta: Serbski Sokoł z.t. / pod wužiwanskim zaměrom prošu zapisać: mjeno mustwa, zamołwity, mailowa adresa zamołwiteho). Šulerske cyłki žadyn startowy pjenjez njepłaća.

Wo ćělne derjeměće budźe postarane. Termin přizjewjenja je 29. februar 2020. Termin a městnosć wulosowanja budźetej hišće podatej, na kóždy pad do klětušich jutrownych prózdnin.

Milan Funka, starosta