Z wudaća: póndźela, 13 januara 2020
póndźela, 13 januara 2020 13:00

Von der Leyen spřisahana

Luxemburg (dpa/SN). Šěsć tydźenjow po nastupje zastojnstwa su nowu prezidentku komisije EU Ursulu von der Leyen zhromadnje z jeje 26 komisarami dźensa oficialnje spřisahali. Na swjatočnosći před sudnikami Europskeho sudnistwa w Luxemburgu wona přilubi, zo chcyła zrěčenja EU dodźeržeć a w zajimje wšěch skutkować. Jedne z jeje předewzaćow je klimje přichileny přetwar europskeho hospodarstwa hač do lěta 2050.

Protest přećiwo knježerstwu

Teheran (dpa/SN). Hač do 3 000 ludźi je po informacijach iranskeje powěsćernje ILNA wčera wječor přećiwo postupowanju iranskeho knježerstwa w padźe wottřěleneho ukrainskeho pasažěrskeho lětadła protestowało. Demonstranća kritizowachu, zo bě knježerstwo fakty dołhi čas prěło. Pječa žadachu sej wobdźělnicy tež wotstup zamołwitych oficěrow wójska. Prezident USA Donald Trump je demonstrantow­ pohonjał, z protestami přećiwo knježerstwu pokročować.

Rakety na zepěranišćo

wozjewjene w: Politika
póndźela, 13 januara 2020 13:00

Hwězdźički-micki jasnje dobyli

Třeća domjaca hra za druhe zastupnistwo Hrajneho zjednoćenstwa Pančicy-Worklecy

Wobwodna wolejbulowa klasa žonow wuchodneje Sakskeje

1. Schönbachske VV 9 25 : 9 22

2. VV Žitawa 09 II 7 21 : 5 19

3. VV Žitawa 09 III 9 21 : 14 16

4. HZ Pančicy-Worklecy II 8 15 : 11 14

5. Módro-běłe Wojerecy II 8 11 : 16 10

6. MSV Budyšin 04 III 7 10 : 12 9

7. Viktoria Worklecy 8 3 : 21 3

8. Nysa Wolejs II 8 0 : 24 0


Wolejbulistki druheho zastupnistwa Pančicy-Worklecy kaž tež dorost Viktorije Worklecy zahajichu sobotny megahrajny dźeń ze serb­skim derbyjom. Dale­ wita­chu­ hwězdźički- micki młode­ za­stupnistwo Nysa Wolejs II na swój tře­ći domjacy hrajny dźeń we Worklecach.

HZ Pančicy-Worklecy II – Viktoria Worklecy 3:0 (25:10, 25:8, 25:3)

Domjace zastupnistwo hraješe w prěnjej partiji dnja přećiwo dorostowemu mustwu Viktorije Worklecy. Młode Worklečanki nastupichu optimistisce do der­by­ja. Sylna nadaćowa serija přećiwnika pak polěkowaše tomu, zo hrajne zjednoćenstwo zahe nawjedowaše. Přeswědčiwe nadběhi a klewernje połožene bule zawěsćichu jemu­ w prěnjej sadźbje spěšny komfortabelny předskok, kotryž móžeše z 25:10 wužić.

wozjewjene w: Sport
póndźela, 13 januara 2020 13:00

Z Nuknicy do dalokeje prerije

Jolka-swjedźeń wopytowarjow wospjet zabawjał

Nuknica (BŠ/SN). Mjeztym 22. raz je so Nukničanska Brězanec bróžnja čumpała. Wjesny klub prošeše sobotu na tradicionalnu jolku, lětsa pod hesłom „Sioux tepi bozanku“. Wjedro njebě cyle tajke, kajkež w domiznje jolki Ruskej runje maja. Přiwšěm běše bróžnja na najwjetšim serbskim zymskim wjesnym swjedźenju zaso kopata połna.

Na jolce njeńdźe wo naročny kulturny program, ale skerje wo lóštnu zabawu. A tajku mějachu zaso hnydom na spočatku z chórom indianow pod nawodom Michała Cyža. Ze znatej štučku „Maja“ Karela Gotta – a to ze serbskim tekstom – mějachu publikum hnydom w horšći. Tež tekst běše jasnje rozumić, čemuž minjene­ razy stajnje tak njebě.

wozjewjene w: Lokalka
póndźela, 13 januara 2020 13:00

Spřećiwja so Trumpej

Washington (dpa/SN). Po zaměrnym morjenju wodźaceho iranskeho generala Ghassema Soleimanija přiběraja dwěle na wopodstatnjenju prezidenta USA Donalda Trumpa za dwělomnu akciju. Kaž zakitowanski minister Mark Esper sćelakej CBS rjekny, nima wón žane dopokazy za twjerdźenje Trumpa, zo je Soleimani pječa planował wjacore ameriske wulkopósłanstwa nadpadnyć. „Njejsym nastupajo wulkopósłanstwa žane dopokazy widźał.“ Trump je minjeny pjatk sćelakej Fox News rjekł, zo bě Soleiman „najskerje“ wulkopósłanstwo USA w Bagdadźe nadpadnyć chcył. Prezident bě morjenje z „bjezposrědnim wohroženjom Američanow“ wopodstatnił. W tym padźe by postupowanje jako „antiterorowa akcija“ woprawnjene było.

wozjewjene w: Politika
póndźela, 13 januara 2020 13:00

Postupuja „njeposłušnje“

Pjekarjo Budyskeho wokrjesa maja winowatosć, bon wućišćeć, za šicofrenu

Budyšin (SN/BŠe). Winowatosć, kóž­demu kupcej cedlu elektroniskeje kasy wućišćeć, ma wjetšina pjekarjow za nje­zmysł. Předsyda pjekarskeho zjednoćenstwa Budyskeho wokrjesa Lutz Neumann trochuje, zo měni to něhdźe 95 procentow. Zwjazkowe knježerstwo chce z wi­nowatosću dawkowemu wobšudnistwu zadźěwać. „Kasy dźě kóždy podawk registruja, čehodla měli tuž wšitke kwitowanki wućišćeć?“, so Budyski pjekarski mišter praša. W swojim wobchodźe tuž hižo wšitke cedlki njewućišća, wuznawajo so tak k ciwilnej njeposłušnosći. Neumannej přizamkuje so tež Njedźichowski pjekar a prezident Sakskeho rjemjesl­niskeho zwjazka Roland Ermer (CDU). „Mam za šicofrene, něšto wućišćeć a to hnydom zaso preč ćisnyć“, wón podšmórnje. Kupcy, kotřiž sej kasowy bon přeja, jón wězo dóstanu, wobaj prajitaj.

wozjewjene w: Hospodarstwo
póndźela, 13 januara 2020 13:00

Zetkawać so a so derje čuć

Wojerowčanka Dagmar Steuer angažuje so za dotal jónkrótny projekt w regionje. Pod hesłom „Město sadźa“ nastawa we Wojerecach na něhdźe 1,3 hektary wulkej priwatnej ležownosći předewzaćelki přirodna drohoćinka, na kotrejž su hižo 250 sadowcow sadźeli. Ze štomami a jich płodami ma wona tójšto předwidźane. Silke Richter je z iniciatorku projekta rěčała.

Byšće-li swoje předewzaće z jeno třomi wopřijećemi wopisać měła, kak by to klinčało?

D. Steuer: Wutrobna naležnosć, lubosć k přirodźe, regionalny sad.

Inwestujeće nimo swojeho dźěła tójšto časa a pjenjez do tohole čestnohamtskeho projekta, štož njeje samozrozumliwe ...

wozjewjene w: Rozmołwa
póndźela, 13 januara 2020 13:00

Prosće wopačny signal

Chcemy sej to lubić dać? Wójsko USA přihotuje najwjetši manewer minjenych 25 lět w Europje, a Łužica ma za to nastupna kónčina być. Hrózbna to mysl: Třištwórć lětstotka po zakónčenju suroweje Druheje swětoweje wójny dyrbi so bywši zwjazkar antihitlerskeje koalicije z mocu swojich bróni w našej domiznje błyšćić, zo by tamneho­ zwjazkarja, Rusku, wužadał. Tajki hoberski manewer wotputanju njepolěkuje, skerje nawopak. Nowe napjatosće njejsu žadyn kmany grat, zo by bjezmócna zdawaca so hłuboko šćěpjena „Europa“ zaso­ z jednym hłosom rěčała. Za chribjetom wojerskeje sylnosće USA so chować zdobom rěka pasiwny wostać. To pak zdawa so přeco hišće lóšo być, hač wizije za měrniwy kontinent wuwić a tajke hromadźe z Ruskej zeskutkownić. Wótry wukřik hišće žadyn słyšał njejsym, prěnje hłosy tola. Njeje-li nas zapadne derjeměće hišće dospołnje zamućiło, mamy so wobarać. Ameriske jednotki we Łužicy su prosće wopačny­ signal w lěće 2020. Axel Arlt

wozjewjene w: Politika
póndźela, 13 januara 2020 13:00

Zjawne hody wupadnyli

Bagdad (B/SN). Chaldejsko-katolska cyrkej w Iraku, jedna z najwjetšich kře­sćanskich zhromadźenstwow kraja, njeje žane zjawne hody swjećiła. Kaž bě jeje patriarch kardinal Louis Raphael I. Sako w hodownym poselstwje pisomnje wozjewił, respektowachu tak ludźi, kotřiž běchu při protestach přećiwo irakskemu knježerstwu žiwjenje přisadźili abo so zranili. „Njezmějemy wupyšene hodowne štomy w cyrkwjach a na dróhach žane swjedźenje a žane přijeće w patriarchaće“, zdźěli Sako krótko do hód. Chaldejsko-katolska cyrkej w Iraku je z Romom zwjazana cyrkej wuchodosyriskeho ritusa a skutkuje w cyrkwinskim zhromadźenstwje z bamžom w Romje.

Wliw křesćanstwa woteběra

wozjewjene w: Cyrkej a swět
póndźela, 13 januara 2020 13:00

Knježerstwo bjez wjetšiny

Erfurt (dpa/SN). W Durinskej so dźeń a bóle wotbłyšćuje, zo dóstanje kraj mjeńšinowe knježerstwo Lěwicy, SPD a Zelenych, kotrež nima w parlamenće žanu wjetšinu. Wšitke tři strony maja hromadźe 42 z cyłkownje 90 mandatow. Tak pobrachuja jim štyri hłosy. Z teje přičiny je so ministerski prezident Bodo Ramelow (Lěwica) wčera wječor z bywšim zwjazkowym prezidentom Joachimom Gauckom a stronskim a frakciskim předsydu CDU Mikeom Mohringom zetkał. Nowinarjam Ramelow rjekny, zo prócuje so z CDU wo zhromadne, „na projektach orientowane knježerstwowe dźěło“. Krajny šef durinskeje FDP Thomas Kemmerich to zasadnje wotpokazuje.

wozjewjene w: Politika
póndźela, 13 januara 2020 13:00

Haute couture něhdy a dźensa

We wobłuku wosebiteje wustajeńcy „Sorbian Street Style“ je Budyski Serbski muzej wčera tři wosebite zarjadowanja wuhotował. Swójbne popołdnjo pod hesłom „Pu­ćowanje přez modowe doby“ kaž tež publikum zapřijaca přehladka historiskeje drasty­ „Moderne časy“ běštej wašnju zwoblěkanja něhdy a dźensa wěnowanej. Mjez druhim pokaza Anja Köhler ze Šlesko-Hornjołužiskeho zwjazka muzejow modu lěta 1872­. W kreatiwnej dźěłarničce „Petticoat a Sorbian Street Style“ móžachu so přitomni sami na polu designa wuspytać. Foto: Carmen Schumann

wozjewjene w: Kultura

nawěšk

SERBSKE NOWINY podpěruja:

Novi Sad – kulturna stolica Europy

nowostki LND