Z wudaća: wutora, 11 februara 2020
Pjenjezy za wjesne wjerški zběrali
Přesłapjacy wukon Sokołow
ST Ćisk 1993 – Sokoł Ralbicy/Hórki 4:1 (1:0)
Za Ralbicy zasadźeni: Schöne – Kř. Matka, Schultz, Wałda, Materna, Šołta (46. Kobalc), Gloxyn, Šiman, M. Kurjat, G. Kurjat, Nuk (77. Ćěsla)
K poslednjemu testej dojědźechu sej Ralbičenjo do Wojerec a testowachu na tamnišim kumštnym trawniku přećiwo koparjam z Ćiska, kotřiž hraja klasu wyše. Někotři stajni hrajerjo Sokołam pobrachowachu. To pak běše zdobom šansa dalšim so poskićić. We Wojerecach wětřik mócnje přez trawnik duješe, přiwšěm pak dowoli wón, zo hru přewjedu. W prěnim połčasu mějachu Ralbičenjo dwě stoprocentowej šansy. Jónu předrě so młody Pius Šołta na prawej stronje a posłuži swobodnje stejaceho Měrćina Kurjata, kotryž pak na wrotarju zwrěšći. Krótko po tym bu bul rjenje do haski tyknjeny. Gabriel Kurjat sam před wrotarjom stejo pak njezamó jeho přewinyć. Hrajerjo z Ćiska mějachu tež tu a tamnu składnosć, ale traješe hač do 45. min., doniž bul z 22 metrow njedźeržomnje pod łatu zadyri.
Wonkowne dobyće pola Ochranowskich wolejfantkow
Započatk februara dźěše za prěnje zastupnistwo hrajneho zjednoćenstwa Pančicy-Worklecy k wonkownej hrě do Ochranowa. Po tym zo bě domjace zastupnistwo 3:0 přećiwo młodym holcam MSV Budyšina dobyło, dźěše za Pančanki a Worklečanki na parket. Nadaćowa serija na započatku prěnjeje sadźby bě hosći zahe do komfortabelneje pozicije přinjesła. Swój předskok zamóchu hač do kónca sadźby dźeržeć. Tak dźěše prěnja sadźba z 25:18 na hrajne zjednoćenstwo.
W druhim přechodźe hrajachu wobě mustwje na samsnym niwowje. Nichtó njemóžeše sej woprawdźe předskok nadźěłać. Hakle při dypkowym stawje 18:18 zamóchu so žony hrajneho zjednoćenstwa wotsadźić a sej tež druhe sadźbowe dobyće z 25:21 zawěsćić.
Hraja wo zaćah do połfinala
Wosom cyłkow je hišće we wokrjesnym pokalnym kole Zapadołužiskeho koparskeho zwjazka. Do dypkowych hrow druheje połserije, kotrež započnu so za dwě njedźeli, hraja wone wo zaćah do połfinala.
15.02. 13.00 TSV 90 Wjazońca
– TSV Wachau
16.02. 13.00 ST Kinspork/Łužnica II
– ST Kubšicy
16.02. 13.00 Sokoł Ralbicy/Hórki
– ST Horni kraj Sprjewja
16.02. 13.00 SZ Großnaundorf
– Drohotka Ramnow
Rjadne lisćiny běharjow zaso z mnohimi poskitkami
Po tradiciji budźe prěnje wulke wužadanje 7. měrca ćežke 21. nalětnje wokrjesne crossowe mišterstwo w Połčničanskim hrodowym parku. A kaž hižo loni zahaji so ze 26. tradicionalnym Mužakowskim parkowym běhom dźeń po tym, 8. měrca, tradicionalna a jara woblubowana rjadna lisćina Hornjeje Łužicy, wot lěta 2004 do 2018 pod mjenom Wopačanski cup běharjow a wot lońšeho ENSO-cup běharjow. Wona poskića dale 14 wubědźowanjow z regionalnym hódnoćenjom mjez Žitawu a Mužakowom, Wopakej a Połčnicu. Tak je časowy plan teju wurisanjow za nas aktiwnych, wosebje z Budyskeho wokrjesa, dale jara njezbožowny.
Koparjo ST Marijineje hwězdy prěnju testowu hru snadnje dobyli
ST Marijina hwězda – ST 1922 Radwor 4:3 (3:1)
Za domjacych zasadźeni: Matik – R. Cyž, Bělk, Rab, Hawš, Wróbl, Ch. Cyž, Pjetaš, Schmidt, Eldor, J. Pakoßnick, Zelnak, Peschmann, Čornak, Jurš, K. Pakoßnick
Za hosći zasadźeni: Ch. Šěrak – A. Schulze, F. Šěrak, T. Schulze, F. Wróbl, Paška, Kral, Hetaš, Wjacławk, Zähr, Petšak, Reineke, J. Wróbl, Sćapan
Po štyrjoch tydźenjach intensiwneho a wosebje na kondiciju specializowaneho treninga absolwowachu koparjo prěnjeho mustwa Marijineje hwězdy zašłu njedźelu skónčnje tež testowu partiju za přihoty na druhu połseriju wokrjesneje wyšeje ligi. Jako hosća witachu zastupnistwo z Radworja.
