Z wudaća: póndźela, 06 apryla 2020

Do bydlenja so zadobyli

Pěskecy. Njeprošeny wopyt mějachu w nocy na sobotu w jednoswójbnym domje w Pěskecach. Tam běchu so cuzy na dotal njeznate wašnje zadobyli. Na delnim poschodźe přepytachu wšitke rumnosće a pokradnychu pjenjezy, laptop kaž tež ručnu tobołku z wupokazami. Škoda wučinja 700 eurow.

Jako Sewjerowuchodoněmski koparski zwjazk (NOFV) wšitke dypkowe hry swojich towarstwow wotsrjedź měrca hač do 19. apryla w zajimje zahaćenja koronapandemije wotpraji, bě kóždemu jasne, zo změje to wulke wuskutki na treningowe wotběhi a na winowatostne koparske duele.

Tak bě spěšnje jasne, zo njezměje na přikład tež FC Energija dypkowe hry pola BFC Berlina (22.3.), pola Chemije Lipsk (12.4.), a njepřewjedźe tež domjacej par­tiji přećiwo Wackerej Nordhausen a Babelsbergej. Wonej běštej za 5. a 19. apryl předwidźanej. Hač a wosebje kak dale póńdźe, je tučasnje chětro wotewrjene prašenje. Wosebje, dokelž je zhromadny trening na sportowych arealach FCE tuchwilu zakazany. Tak dóstachu wšitcy hrajerjo wosebite časniki za měrjenje pulsa a k nim hodźace so treningowe plany za indiwidualne zwučowanje. Te přewjeduja nětko doma, a to pod stajnej kontrolu trenarjow. Modus móhli tohorunja do kategorije „homeoffice“ sunyć.

Korona! Tele słowo tele dny a tydźenje wo wjele bóle prezentniše hač wšo druhe. Tučasnje je naš wšědny dźeń hinaši, snano tež komplikowaniši. Kóždy z nas ma swoje ćeže z koronu a z njej­ zwisowacymi wobmjezowanjemi. Sportowe zarjadowanja su wotprajene. Nichtó njezamóže rjec, hdy so zaso normalita započnje, hdy budźe na zjawnych kopanišćach zaso za bulom honjene, hdy zaso při wysokim saku wojowane, hdy so wu­bědźowanja wotměja a hdy změja fitnesowe centery zaso wočinjene.

W tajkej wosebitej situaciji je ćim wažniše, zo sy wurunany, a zo maš hłowu swobodnu. Ale kak to docpěć? Ja mam so lochko, ja jogguju. Běham sama po Łazkowskim lěsu a po delanskich pólnych pući­kach. Žadyn zakaz mje wot toho njewotdźerži. Nawopak, čerstwy powětr mi, mojemu ćěłu a mojej duši tyje. Běhanje sylni imunostny system, zahnawa depresiwne mysle a će zwjesela. W socialnych medijach wuhladaš dale a wjac ludźi, kotřiž móžnosć běhanja wužiwaja a so energije a motiwacije za wšědny dźeń nasrěbaja. Tak je Instagram połny wobrazow běharjow a wšelakorych hashtagow.

Regionalna liga muži po 24. hrajnym dnju sezony 2019/2020

1. VSG Altglienicke  24 59 : 31 47

2. Lok Lipsk  24 43 : 24 47

3. FC Energija Choćebuz  24 53 : 32 45

4. Union Fürstenwalde  25 45 : 32 40

5. Hertha BSC II  24 59 : 42 38

6. BFC Dynamo  24 35 : 29 37

7. Berlinski AK  23 47 : 35 33

8. FC Viktoria Berlin  23 20 : 17 29

9. VfB Auerbach  23 37 : 46 29

10. ZFC Meuselwitz  23 33 : 39 25

11. SV Lichtenberg 47  23 27 : 36 25

12. BSG Chemija Lipsk  24 20 : 26 23

13. Optik Rathenow  24 20 : 48 20

14. Wacker Nordhausen  21 44 : 36 19

15. Germania Halberstadt 24 24 : 40 19

16. SV Babelsberg  23 22 : 38 17

17. Biskopičanske KT  21 16 : 53 11

18. Čerwjeno-běli Erfurt  19 0 : 0 0

Sakski koparski zwjazk (SFV), kotryž dóstawa kóžde lěto na polu sudnikow podpěru wot DEKRA a wot Němskeho ko­parskeho zwjazka, je refereejow tež lětsa zaso na zarjadowanje „Dźakuju so, sud­niko“ do Lipska přeprosył. Počesćenje sudnicow a sudnikow z cyłeje Sakskeje přewza prezident SFV Herrmann Winkler zhromadnje z Christinu Weigelt, kotraž sudźi hry w zwjazkowej lize žonow. Wšitcy wuznamjenjeni dóstachu mały sponsorski paket a zastupny lisćik za načolnu partiju zwjazkoweje koparskeje ligi muži RB Lipsk – Bayer 04 Leverkusen.

Mjez 40 mytowanymi refereejemi běchu­ tež třo Zapadołužiskeho koparskeho zwjazka. W kategoriji žonow wuznamjenichu Svenju Rumler. Wona je wot decembra 2014 mjeztym 140 hrow sudźiła. Sven Dankhoff je wot lěta 2003 562 hrow nawjedował. Dankhoff bu w kategoriji U 50 počesćeny. Na 5 500 hrow přińdźe wot lěta 1975 Klaus Heiduschke. Budyšan bě raz 168 koparskich zetkanjow w běhu jedneje hrajneje doby jako hłowny sudnik nawjedował abo jako asistent­ při pobóčnej liniji stał.

Kilian Hrjehor

Vatikan (B/SN) Bamž Franciskus swjeći jutry 12. apryla a je njepřestorči. Wone tworja wutrobu liturgije lěta a njehodźa so přesunyć. Myće nohow zeleny štwórtk pak wupadnje. Biskopam a měšnikam Vatikan poruča, wot zeleneho štwórtka hač do jutrow tež „bjez fyziskeho wobdźělenja“ wěriwych koronapandemije dla Bože mšě swjećić. Tak namjetuje, wosady wo słužbnych časach přez Twitter informować a wšelake materialije poskićić, zo móhli ludźo swjatočnosće doma sćěhować a sobu swjećić. Ćichi pjatk modli so bamž wosebity paćer za zemrětych a tych, kotřiž su na koronawirus schorjeli. W jutrownej nocy chce wón křćenski slub po zwučenym wašnju wobnowić.

Žada sej wjace angažementa