Z wudaća: wutora, 26 meje 2020

Berlin (dpa/SN). Zwjazk a zwjazkowe kraje njemóža so dotal na to dojednać, wobmjezowanja kontaktow koronapandemije dla podlěšić. Wotpowědne jednanja dale traja, rozprawja powěsćernja dpa. Zastupnicy krajow maja so najprjedy raz ze swojimi knježerstwami dorěčeć. Šef kanclerskeho zarjada Helge Braun bě wčera ze šefami statnych kenclijow krajow telefonisce wuradźował, hač a kak měli hač do 5. junija płaćiwe wobmjezowanje kontaktow podlěšić. W naćisku knježerstwa rěča wo podlěšenju hač do 29. junija, po čimž smě so hač do dźesać wosobow w zjawnosći zetkać.

Nürnberg (dpa/SN). Bayerski ministerski prezident Markus Söder (CSU) je plany Durinskeje, wobmjezowanja přećiwo rozšěrjenju koronapandemije w dalokej měrje zaso zběhnyć, „fatalny signal“ mjenował. Wón zamołwitych w Durinskej prosy, hišće raz wo wotpohledźe rozmyslować, kaž rjekny Söder wčera na wopyće pěstowarnje w Nürnbergu.

Bayerska je po słowach jeje ministerskeho prezidenta wot wuwića infekcijow w susodnych krajach potrjechena. Dotal bě to předewšěm wuwiće w Awstriskej. „Nětko mamy aktualne połoženje, zo smy w Coburgu wot Sonneberga potrjecheni“, praji wón hladajo na susodny ­durinski wokrjes a připowědźi zdobom napřećiwne naprawy. „Dyrbimy hišće wo koncepće rozmyslować, kak na to rea­gujemy. Nochcu, zo so w Bayerskej hišće raz natyknjemy, njekedźbliweje politiki w Durinskej dla“, Söder wuzběhny.

Durinski ministerski prezident Bodo Ramelow (Lěwica) je swoje plany mjeztym zakitował, ale připowědźił, zo ludźo dale škit za hubu a nós trjebaja.

Wonkowne ministerstwo chce warnowanje před jězbami za EU zběhnyć

Berlin (dpa/SN). Zwjazkowe knježerstwo chce swoje warnowanje před pućowanjemi wot 15. junija za 31 krajow EU zběhnyć, dyrbjało-li to dalše wuwiće korona­pandemije dowolić. Nimo 26 partnerskich krajow Němskeje w Europskej uniji su to z EU wustupjena Wulka Britaniska a štyri dalše staty Schengenskeho ruma: Islandska, Norwegska, Šwicarska a Liechtenstein. To wuchadźa z naćiska směrnicoweho dokumenta „Kriterije zmóžnjenja nutřkoeuropskeho turizma“, kotrež móhło němske knježerstwo snano hižo jutře wobzamknyć.

Zmilinjenje brunicy w milinarnjach zakónčić, za čož rozjimuje zwjazkowy sejm naćisk zakonja zwjazkoweho knježerstwa, saha šěršo do žiwjenja ludnosće, hač sej to druhdy myslimy. Mjenje wustorka wuhlikoweho dioksida ma klimje tyć. Hdyž pak staj so delnjołužiskaj zapósłancaj wčera na zjawnym słyšenju w parlamenće nastupajo „pódlanske“ procesy wobhoniłoj, je so wukopało, štož často zakryte wostawa. Kóždy dźě njewě, zo w milinarnjach w Janšojcach, Hamoru a Čornej Pumpje wotpadki sobu spaleja. Prašenje, što so z nimi stanje, hdyž žane milinarnje wjace njebudu, je tuž cyle praktiskeho razu. Runje tak dalše, kak chcedźa přichodnje zastaranje z dalnoćopłotu zawěsćić. Bydlenja we Wojerecach, Grodku abo Picnju njemóža prosće bjez tepjenja być, hdyž bliska milinarnja hižo žanu ćopłotu njedodawa. Jasnej wotmołwje fachowcow wčera słyšeć njeběštej, stej pak jara trěbnej. Je tuž dawno načasu sej wo tym skónčnje hłójčku łamać. Axel Arlt

Wětrniki a časyŠćěpan Hanuš

Waršawa (dpa/SN). Pólski ministerski prezident Mateusz Morawiecki dyrbi ­tójšto kritiki znjesć, po tym zo je w hosćencu wukazane prawidła koronawi­rusa dla ranił. Rěčnik knježerstwa rěčeše wčera w telewizijnym sćelaku TVN24 wo njezrozumjenju a prošeše w mjenje narodnokonserwatiwneho politikarja wo wodaće. Wobdźěleni njejsu pječa wědźeli, zo nima wukaz strowotniskeje inspekcije kraja jenož „miły charakter“ poručenja, ale zo je za wšitkich zawja­zowacy.

Morawiecki bě minjeny pjatk wobraz wo sebi na internetnym portalu Twitter wozjewił. Na nim bě widźeć, kak sedźi w kofejowni w Gliwicach z dalšimi wo­sobami za blidom – bjez škita za hubu a nós. Po krutych pólskich prawidłach smědźa jeničce swójbni abo čłonojo samsneje domjacnosće w hosćencu zhromadnje za blidom sedźeć.

W Pólskej je dotal 21 440 wobkrućenych in­fekcijow z koronawirusom, 996 ludźi je zemrěło. Po wudyrjenju pandemije su tam dosć razne naprawy přećiwo rozpřestrěću wirusa wukazali. Mjezy su wukrajnikam najprjedy raz dale zawrjene.

Praha (ČŽ/K/SN). Wot spočatka tohole tydźenja je so Čěska dalšu kročel žiwjenju do časa koronapandemije přibližiła, hódnoća medije kraja nětčiše połoženje. Wot wčerawšeje póndźele smědźa so hosćo w nutřkownych rumnosćach hotelow a hosćencow posłužować, je zaso móžno campingownišća wopytać a přenocowarnje wužiwać. Zhromadźowanje ludźi hač do 300 wosobow je nutřka a wonka dowolene. Po połtřećaměsačnej přestawce chodźa šulerjo prěnjeho schodźenka zakładnych šulow zaso na wučbu. Wšudźe płaća krute hygieniske a wěstotne prawidła. Ludźo nje­trjebaja wonka tež hižo žadyn škit za hubu a nós, dodźerža-li wotstawk dweju metrow. W twarjenjach kaž na přikład w kupnicach kaž tež we wobchadnych srědkach je pak tajki škit dale trěbny. Nowiny pišu, zo jón mnozy wobydlerjo přiwšěm ze skedźbliwosće wonka dale wužiwaja. Zjawnosći su nětko tež zaso ležownosće hrodow, zwěrjencow a botaniskich zahrodow přistupne.

W Biskopicach je wčera připołdnju nakładne awto na Hasy k měšćanskemu lěsej wisajo wostało. Šofer bě při ranžěrowanju dieselowy tank Lkw-ja rozdrěł. Něhdźe 40 litrow ćěriwa wuběža na ležownosć firmy, prjedy hač móžachu dobrowólni wohnjowi wobornicy z Biskopic dźěru tanka nachwilnje zatykać. Za překlumpanje zbywacych 200 litrow bě Budyska powołanska wohnjowa wobora z wosebitym gratom zasadźena. Po njecyłymaj hodźinomaj móžeše 17 kameradow dźěło zakónčić. Specialne předewzaće je hišće zajězd na ležownosć firmy wurjedźiło. Foto: Rocci Klein

Swjatki přeprošeja wuměłcy po wšej Sakskej zaso zajimcow do swojich ateljejow a dźěłarnjow. Mjez nimi je tež Helga Schönach w Nadróznej Hrabowce (Straßgräbchen), kotraž chce ludźom swoje mólby pokazać.

Nadrózna Hrabowka (WM/SN). Małe čaporowe wiki a molerstwo maja zajimcow do dźěłarnje Helgi Schönach wabić. Mjeztym 15. króć chce wona swój ateljej zjawnosći wotewrěć. Jako běše dźensa 77lětna před 22 lětami swoje dźěło zhubiła, wona wo tym rozmyslowaše, kak móhła wólny čas zmysłapołnje wupjelnić. Spěšnje rozsudźi so za nowy hobby molowanje, štož jej wulke wjeselo wobradźa. Swjatki njedźelu a póndźelu přeproša wona w „Garaži wuměłstwa“ na swojej zahrodźe na Sydlišćowym puću 3 w Na­dróznej Hrabowce wot 10 do 17 hodź. zajimcow na tradicionalnu akciju „Kunst: offen in Sachsen“ witać. Z njej chce, kaž mnozy dalši wuměłcy, zajim za wuměłstwo budźić. Helga Schönach wustaja wjace hač 60 wobrazow w technikach pastel, akryl a akwarel. Na swojich wobrazach zapopaduje rjanosć krajiny, městow a wsow Łužicy. Rady wuměłča wězo tež na prašenja hosći wotmołwja.

Podhladna wóń

Wojerecy. Njedźelu, krótko do połnocy, je policiji na Wojerowskej Hasy Käthy Niederkirchner Ford ze skóncowanym wobswětlenjom awtoweje znački napadnył. Jako zastojnicy Mondeo zadźeržachu a šofer wokno dele wjerćeše, stupaše z jězdźidła markantna wóń konopje. 38lětny Polak reagowaše pozitiwnje na test drogow. Wón njesmědźeše dale jěć a dyrbi nětko z chłostanjom ličić.