Z wudaća: štwórtk, 09 julija 2020

Kawsu Prožym prawje rjadować

Choćebuz. Zelena liga namołwja knježerstwo Braniborskeje, „planowanja kołowokoło jamy Wjelcej-juh hišće lětsa w lěću zahajić. Wuchowanje Prožyma měło ručež móžno prawniskeje zawjazliwosće nabyć“, w zdźělence towarstwa rěka. Nimo toho měli so zamołwići intensiwnišo rekultiwowanju wěnować.

Wo wuskutkach wuradźowali

Slepo. Regionalni rěčnicy a referenća Domowiny su wčera w Slepom wura­dźowali. Ćežišćo bě strukturna změna w brunicowym regionje. „Po zakónčenju hórnistwa so lětdźesatki trajace rozestajenja wo přesydlenju skónča. Nadawk wostanje, serbsku rěč wozrodźić a kulturu pod měnjacymi wuměnjenjemi wu­wiwać“, Domowina informuje.

Suchota wobwliwuje kulturu

Kóžde lěto krótko do wulkich prózdnin wikowarjam za dwukolesate jězdźidła wjele dźěła do rukow hlada. Tež Ronny Kutschke tele dny w swojim Šešowskim wobchodźe groćane koniki na wěstotu přepruwuje a, je-li trjeba, je zwuporjedźa. Druhdy wšak město reparatury jenož hišće nowy model pomha. Při wuběrje fachowc kupca rady poradźuje. Foto: Feliks Haza

Předwčerawšim je zapósłanc Zelenych w Němskim zwjazkowym sejmje Stephan­ Kühn mjez druhim redakciju Serbskich Nowin wopytał. Što bě wotpohlad wopyta serbskich institucijow, a kak zhladuje wón na tuchwilnu sylnu digitalizaciju tež medijow, to chcyše ­Janek Wowčer wot njeho wědźeć.

Čehodla sće serbske institucije wopytał?

Na Bartskej zakładnej šuli serbskorěčna wučba wohrožena

Budyšin/Bart (SN/MiR). Na Zakładnej šuli Bart, kotraž je Malešanskej přirjadowana, hrozy po aktualnym stawje planowanja přichodne šulske lěto njedostatk wučerjow za předmjet serbšćinu. Nimo wučby serbšćiny nałožuja rěč w předmjetomaj ručne dźěło a hudźba. W Bartskim kubłanišću orientuja so na kon­cepće 2plus. Tuchwilu maja tam jeničku wučerku, Angeliku Šołćinu. Wona šulerjam wot 1. do 4. lětnika wučbu serb­šćiny a dalše předmjety serbskorěčnje podawa. W 1. lětniku maja jich tuchwilu 18 šulerjow-serbšćinarjow, w druhim 22, w třećim 18 a w štwórtym štyrjoch. „Wšitcy šulerjo chcedźa serbšćinu dale wuknyć. Knjeni Šołćina pak ma tež w druhich předmjetach wuwučować, je zdobom rjadow­niska wučerka a tuž z hodźinami wućežena“, rozłožuje koordinator za serbske naležnosće w Budyskim wotrjedźe Sakskeho krajneho zarjada za šulu a kubłanje (LaSuB) Bosćij Handrik.

Dom zarjadniskeho zwjazka Při Klóšterskej wodźe w Pančicach-Kukowje změje dwurěčny napis. Serbšćina a němčina budźetej při tym runohódnej.

Pančicy-Kukow (SN/JaW). Hnydom dwě wurjadnej posedźeni zhromadźizny zarjadniskeho zwjazka bě jeho předsyda Měrko Domaška za wčera w awli Šule Ćišin­skeho zwołał. Na prěnjej dyrbjachu zastupnicy zwjazkej přisłušnych pjeć gmejnow wobzamknjenje ze zašłeho wura­dźowanja sporjadkować. Tak cofny gremij swój rozsud, na domje zarjadniskeho zwjazka dwurěčny napis tak připrawić dać, zo steji serbski nad němskim. Dyrbjachu tuž w naležnosći znowa rozsudźić, a to formalneho zmylka před­sydy zarjadniskeho zwjazka Měrka Do­maški dla. Tež gmejna Pančicy-Kukow bě spřećiwjenje zapodała. Wotpowědnje předpisam dyrbješe zhromadźizna tuž w běhu třoch tydźenjow wobzamknjenje znowa rozjimać.

Wudźerska sezona při Lejnjanskim jězoru je zahajena. Wotnětka je tam oficialnje dowolene ryby łójić. Zo by popad zaručeny był, su zastupjerjo krajneho wudźerskeho zjednoćenstwa wčera w přitomnosći Budyskeho krajneho rady Michaela Hariga (CDU, nalěwo) symbolisce wjacore liny do wody pušćili. Na te wašnje chcedźa wob­statk­ rybow přichodnje a prawidłownje wobchować. Wězo so nadźijeja, zo so nimo­ linow mjez druhim tež wuhorje a wijule (Muränen) w jězoru zadomjeja. Wudźerjo měli wobkedźbować, zo smědźa swój hobby jenož­ z obligatoriskim wopismom a we wosebje woznamjenjenych wobłukach pěstować. Foto: Gernot Menzel

Rakecy (SN/BŠe). Leaderowy region Hornjo­łužiska hola a haty (OHTL) chce 390 000 eurow wudać a zjawnje přistupne zarjadnišća kaž tež naměsta a swobodne płoniny porjeńšić. Za inwesticije do zarjadnišćow planuja cyłkownje 140 000 eurow, za wróćozdobyće płonin chcedźa 120 000 eurow wudać a za nowowuhotowanje ležownosćow něhdźe 86 000 eurow.

Hač do 7. awgusta smědźa priwatne wosoby, předewzaća, komuny a dalše swoje spěchowanske próstwy regionalnemu mana­gementej w Rakečanskim Leaderowym běrowje zapodać. Projekty měli zaměram a kriterijam wuwićoweje strategije wotpowědować. W běrowje regionalneho ma­nagementa smědźa so zajim­cy po­radźować dać, štož je tež te­lefonisce móžno.

Tuchwilu ma towarstwo OHTL 48 sobu­stawow, kotřiž regionalne wuwiće a turizm w regionje podpěruja. Prawi­dłownje wobhonjeja so woni wo zwoprawdźenju naprawow. Tak budu to tež lětsa činić a přewjedu 7. septembra ekskur­siju k projektam. Do toho změja swoju zhromadźiznu.

Saarbrücken (dpa/SN). W diskusiji wo noworjadowanje nadróžneho wobchadneho zakonika přewjedźechu wobchadni ministrojo zwjazkowych krajow dźensa widejowu konferencu. Mjeztym w 14 z cyłkownje 16 zwjazkowych krajow zaso stary katalog chłostanjow nałožuja, zdźěli rěčnik posaarskeho wobchadneho ministerstwa w Saarbrückenje. Zwjazkowe wobchadne ministerstwo bě minjeny tydźeń zdźěliło, zo ma nowe chětro razne postajenja za njepłaćiwe.

Seehofer rozprawu předstajił

Berlin (dpa/SN). Zwjazkowy nutřkowny minister Horst Seehofer (CSU) je dźensa w Berlinje rozprawu wustawoškita za lěto 2019 předstajił. Poprawom chcyše to hižo kónc junija činić, termin pak běchu wotprajili. W swojej kóždolětnej rozprawje wustawoškit wuwiće ekstremizma w Němskej a z nim zwjazane strachi za wšu towaršnosć posudźuje. Seehofer bě hižo před dnjemi rjekł, zo ma prawicarski ekstremizm za najwjetše wohroženja němskeje towaršnosće.

Warnuja před sćěhami blokady

Policija je dźensa na Rigaskej dróze w Berlinje wjacore bydlenja alternatiwneho bydlenskeho projekta přepytała, zwoprawdźejo tak wotpowědny sudniski wukaz. Při tym bě 200 zastojnikow zasadźenych. We wokolinje Rigaskeje dróhi w měšćanskim dźělu Friedrichshain wobydlerjo domu stajnje zaso policistow na najwšelakoriše wašnje nadběhuja. Foto: dpa/Paul Zinken

W běhu widejoweje konferency dušował je měšćanski radźićel w Španiskej, zabył je pak kameru hasnyć. Dokelž bě jemu konferenca z kolegami, žurnalistami a wobydlerjemi po wjace hač štyrjoch hodźinach wostudła, rozsudźi so Bernardo Bustillo w sewjerošpaniskim měsće Torrelavega za multitasking: dušować a druhim dale připosłuchać. Za to móžachu wšitcy přihladować, kak wón nahi pod dušu steji. Bustillo je mjeztym poskićił wotstupić, štož pak su wotpokazali.

Zhubjeny wupokaz bě paduchej w durinskim Sömmerda ze zahubu. 22lětny je we wobchodźe twory za 450 eurow zapakował a ćeknył, ale zhubi swój wupokaz. Jako so na to do wobchoda wróći, běžeše wón mjeztym přiwołanym policistam direktnje do rukow. Rubiznu namakachu zastojnicy w kerku.