Z wudaća: štwórtk, 22 oktobera 2020

Karanteny sylnje přiběraja

Budyšin. 54 nowych inficěrowanych su we wokrjesu Budyšin jeničce w běhu wčerawšeho dnja zličili. Sylnje potrje­chena je starownja w Ottendorfje-Okrilli. Tam zwěsću 16 natyknjenjow, dalše testy hišće wuhódnoćeja. Z 1 078 je ličba karantenow wo 273 přiběrała. 77 tajkich móžachu mjeztym zběhnyć, a ze cył­kownje 627 ludźimi je so wosom dalšich wustrowiło. W Zhorjelskim wokrjesu je so ličba nowonatyknjenych porno wčera wo 57 na 272 zwyšiła.

Trěbna změna w předsydstwje

Budyšin. Předsydka Serbskeho šul­skeho towarstwa Ludmila Budarjowa, kotraž zastojnstwo mjeztym 30 lět wukonja, lětsa k wólbam hižo njenastupi. To je wona čłonam towarstwa w lisće, z přeprošenjom na hłownu a wólbnu zhromadźiznu zdźěliła. Ta wotměje so 21. nowembra w Chrósćicach. Mjeztym maja kandidatow za nowe předsydstwo.

Statuwu kejžorki wotkryli

Wjace hač 1 200 wuměłcow wužiwa kampanju „So geht sächsisch“, z kotrejž chce swobodny stat na mnohotnosć w Sakskej skedźbnić, za swoje projekty. Swobodnje skutkowacy filmowcy z Lipska wokoło režiserki-producentki Patricije Kaube su za krótkofilm „My Serbja“ dźensa w Žuricach wjacore sceny natočili. Foto: Feliks Haza

Choćebuz (SN/CoR). Dwě njedźeli do zahajenja 30. Choćebuskeho filmoweho festi­wala, kotryž wotměje so wot 3. do 8. nowembra nimo toho tež w Eisenhüttenstadće, Berlinje, Zhorjelcu, Zgorzelecu a Zielonej Górje, započnu nětko zastupne lisćiki předawać. Lětsa móžeš tikety ­jenož online přez internetnu stronu www.filmfestivalcottbus.de dóstać, a to jenož do započatka festiwala. Njebudźe móžno w festiwalowym času a na městnje hrajnišćow zastupny lisćik kupić. ­Dokelž steji koronapandemije a hygieniskich předpisow dla jenož třećina městnow w kinach k dispoziciji, poručeja zarja­dowarjo, sej sčasom tiket za film, kotryž chceš sej wobhladać, wobstarać. Tež za streamingowy poskitk su kapacity wobmjezowane. Prěni raz poskićeja wjace hač połojcu festiwalneho programa jako­ stream, a to wot 3. do 21. nowembra.

Gmejna chce srědki w zwisku ze strukturnej změnu zaměrnje zasadźeć

Slepo (AK/SN). Strukturna změna je za Sle­pjansku gmejnu wulka šansa, ale zdobom­ wužadanje. Tam chcedźa dołhodobne a kwalifikowane projekty zwoprawdźić. Runje wot hórnistwa direktnje po­trjechene gmejny, kaž stej to Trjebin a Slepo, trjebaja zaměrne spěchowanje. Tole je facit prěnjeho zarjadowanja pod hesłom „Strukturna změna. Šansy a móžnosće“, kotrež wotmě so minjenu póndźelu w Slepjanskim serbskim kulturnym centrumje. Zajimowani woby­dlerjo, wjesni předstejićerjo, gmejnscy radźićel­jo kaž tež zastupjerjo zarjadow a insti­tucijow su so na nim wobdźělili.

Jeje lubosć stej ručne dźěło a serbska narod­na drasta, předewšěm ta Delnich Serbow. Wšako je so wona w Bórkowach narodźiła, tam wotrostła a je dźensa aktiwna čłonka tamnišeje Domowinskeje skupi­ny. Měnjena je Christa Dziumblina, kotraž tohorunja w Bórkowskim domi­zniskim a drastowym towarstwje dźěła. Za jeje angažement su ju lětsa z Čestnym znamješkom Domowiny wuznamjenili.

Čas žiwjenja je Christa Dziumblina z Bórkowami a tuž z Błótami zwjazana. Jeno za wukubłanje je domiznu wopu­šćiła a w Choćebuzu powołanje šwalče nawuknyła. Jako tajka je nimo dźěła jako hortnerka w Bórkowskej šuli dźěłała. „Wušiwała je wona stajnje rady. A tuž nje­za­dźiwa, zo je mjez šulerkami a šulerjemi zajim zbudźiła, a zo chcychu woni bórze něšto serbskeho stworić. Zhromadnje z dźěćimi pytaše Christa tuž za starymi přikładami a originalnymi předłohami dźělow narodneje drasty. Tak nasta poněčim kružk wušiwanja drastowych dźělow“, rěka w hódnoćenju za počesćenje.

Budyšin (CRM/SN). Před 75 lětami, njeposrědnje po zakónčenju Druheje swětoweje wójny, jako ležeše jeho ródny Koslow runje tak w rozwalinach kaž Róžeńčanska cyrkej, w kotrejž běše wón jako cistercienski rjadnik přez 30 lět skutkował, zemrě wón w starobje 76 lět: Romuald (Mikławš) Domaška. Tele žiwjenske daty mjenowaše wčera wječor dramaturgowka Serbskeho ludoweho ansambla Jěwa-Marja Čornakec, wopytowarjow na pokročowanje rjadu „Zynki a linki“ witajo. Dźiwadźelnik Jurij Šiman čitaše wujimki z 1961 wušłeje antologije „Wokoło sta­re­ho młyna“. Běše to krótkoproza, kotraž drje je žortniwa a z tym wosebje zabawna, ale tola tež poselena ze socialnej kritiku.

Berlin (dpa/SN). Ličba dopokazanych nowych­ infekcijow z koronawirusom w Němskej dale přiběra a je mjeztym mjezu 10 000 překročiła. Strowotniske zarjady su Roberta Kochowemu institutej dźensa rano 11 287 nowoinfekcijow w běhu 24 hodźin přizjewili. To je dotal najwyša ličba w Němskej po wudyrjenju pandemije. Direktor instituta Lothar Wieler je w tym zwisku hišće raz na wobydlerjow apelował, so za škit před in­fekciju zasadźować a prawidła hygieny a wotstawka mjez ludźimi dodźeržeć.

Ke kompromisam zwólniwi

Podstupim (dpa/SN). Do dźensa so za­hajaceho rozsudneho koła tarifowych jednanjow za zjawnu słužbu je społnomócnjeny komunalnych dźěłodawarjow, Lüne­burgski wyši měšćanosta Ulrich Mädge, zwólniwosć ke kompromisam signalizował. „Wěrimy, zo móžemy so dojednać, to je naš zaměr“. Mädge je sej wěsty, zo su dźěłodawarjo ze swojim poskit­kom jasny signal sadźili. Woni poskićuja 3,5 procentow wjace mzdy. Dźěłarnistwo ver.di žada sej 4,8 procentow.

Habeck kritizuje dojednanje

Z hnujacej žarowanskej swjatočnosću su so wčera w Parisu z morjenym wučerjom Samuelom Patyjom rozžohnowali. W swojej narěči namołwješe francoski prezident Emmanuel Macron (srjedźa) swobodu zakitować. 18lětny skućićel bě 47lětneho wučerja minjeny pjatk brutalnje morił, po tym zo bě tón we wučbje karikatury profeta Mohammeda wobjednawał. Foto: dpa/ABACA

Zhubjenu mólbu w bydlenju susodki namakała je wopytowarka New Yorkskeho Metropolitan Museum. Žona bě sej tam wustajeńcu ameriskeho wuměłca Jacoba Lawrenca (1917–2000) wobhladała a zwěsćiła, zo so mólba susodki perfektnje k tematice hodźi. Wona móžeše susodku přerěčeć, so z muzejom skontaktować. Fachowcy jej wobkrućichu, zo je wobraz, kotryž 60 lět w bydlenju žony wisaše, dźěl serije Lawrenca a jara drohotny.

Swoju mandźelsku na awtodróhowym parkowanišću zabył je Norwegčan nje­daloko Göttingena. Žona bě so z toalety wróćiła a dyrbješe zwěsćić, zo je muž ze synom hižo wotjěł. Swójba bě ze Španiskeje po puću domoj. Připadnje přitomny cłownik so wo žonu staraše a informo­waše policiju. Zastojnicy awto 50 kilometrow dale zadźeržachu. Muž a syn twjerdźeštaj, zo žona na zadnjej ławce awta spi.

Berlin (dpa/SN). Zwjazkowe knježerstwo je wčera naćisk zakonja schwaliło, kotryž ma dźěći lěpje před splažnej namocu škitać­. Naćisk zwjazkoweje ministerki za ju­sticu Christine Lambrecht (SPD) předwidźi razniše chłostanja, efektiwniše přesćě­howanje skućićelow a lěpšu pre­wen­ciju. „Zo móhli přećiwo tutym gra­wo­ćiwym njeskutkam ze wšej mocu wojo­wać a dźěći lěpje škitać, smy tutón wobšěrny paket wobzamknyli“, rjekny Lambrecht w Berlinje. Tak ma so po na­ćisku zakonja rozšěrjowanje dźěćaceje pornografije přichodnje jako złóstnistwo wobhladować a z lětom jastwa chłostać. Splažnu namóc přećiwo dźěćom chcedźa přichodnje z hač do 15 lětami jastwa chłostać. Dotal předwidźi zakoń najwjace dźesać lět jastwa.