Z wudaća: štwórtk, 22 oktobera 2020

Njeswačanska gmejnska rada sej lěpšu komunikaciju předewzała

Njeswačidło (JK/SN). Na swojim posedźenju w septembru běchu Njeswačanscy gmejnscy radźićeljo wobzamknyli nowe staršiske přinoški za pěstowarnju. Jich wysokosć měri so po wysokosći zawod­nych kóštow nošerja zarjadnišća, w tym padźe Čerwjeneho křiža. Tak ­maja starši wot oktobra płaćić za dźe­wjeć­hodźinske zastaranje w žłobiku ­mě­­sačnje 282,34 eurow, za pěstowarske městno 160,42 eurow a za šěsć hodźinow w horće 88,62 eurow.

Dohromady nimale 20 ludźi je so njedawno na swójbnym pućowanju Rěčneho centruma WITAJ wobdźěliło. Woni zetkachu so w Zdźarju (Sora) a nóžkowachu wot Małeho Pichowa k Čertowej klětce. Wjedro bě lěpje hač myslene, tak zo mějachu často rjany wuhlad na blišu wokolinu. Hłownje Budyske swójby su čas a pućowanje za to wužili, zo móžachu serbske dźěći mjezsobu serbować. Z krótkimi serbskimi informacijemi wo Zdźarju, Čornych Noslicach, Małym Pichowje a Čertowej klětce su wobdźělnicy tež tutón kónc našeje serbskeje Łužicy zeznali. Nawróćiwši so k wuchadźišću zakónčichu pu­ćowanje z hrami za dźěći a z kofejom, tykancom a bjesadu. Wšitcy wobdźělnicy su tež spušćomnje na wotstawk mjez sobu dźiwali a hygieniske postajenja dodźerželi. Tuž je nadźija wulka, zo móža přichodne pu­ćowanje kaž planowane 22. nowembra přewjesć. Lorenc Jankowsky

Šulerjo 9. lětnika Ralbičanskeje wyšeje šule su minjene dny žołdźe za plahowanje ­sadźenkow zběrali. K tomu zetkachu so při Łazkowskim lěsu. Tam je dowolene žołdźe za plahowanje sadźenkow za duby zběrać, dokelž je we Łazkowskim lěsu prastary přirodny lěs, kotryž je so započinał po poslednjej lodowej dobje w našich kónčinach a po cyłej srjedźnej Europje rozpřestrěwać. Na to skedźbništaj Ullrich Furchner jako lěsnistwowy fachowc klóštra Marijineje hwězdy (naprawo) a Ute Hänel wot krajnoradneho zarjada (nalěwo), kotraž akciju wobkedźbowaše. Foto: Michał Wornar

Młodostny trójce napadnył

Wojerecy. Z njepowučomnym paduchom dyrbješe so předwčerawšim poli­cija we Wojerecach hnydom trójce w běhu popołdnja zaběrać. 18lětneho lepichu najprjedy we wobchodźe na Curiejowej, hdźež chcyše žiwidła za dwaj euraj spakosćić. Hodźinu pozdźišo měrješe so wón w kupnicy na Łužiskim naměsće na słód­čizny za dwaj euraj. Něhdźe we 18 hodź. młodostny znowa na Łužiskim naměsće napadny, dokelž spytaše chipsy a napoje za 13 eurow pokradnyć.

Ćetu Hanku znaju ze swojich młodych lět sem. Z přećelom Janom Deleńkom smój sej jako młodostnaj předewzałoj, zo pojědźemoj z kolesom z Njebjelčic k přećelkam do Harrachova. Naju prěnja stacija běše po čěskej hranicy Varnsdorf. Wědźachmoj, zo je na tamnišej farje serbski katolski farar Michał Rab. A nadźijachmoj so, zo dóstanjemoj pola njeho nóclěh. Farar naju serbsce narěča, ale njeměješe za nas žane chwile a žadyn nóclěh. „Zaklinkajće pola Hanki Krawcec, kotraž tu na farje bydli, snadź wona wam pomha“, so wón z namaj rozžohnowa. Smój zaklinkałoj a po krótkim času zastupichmoj do bydlenja małeje, čiłeje staruški z wjesołymaj wočomaj.

„Njebjelčicy znám, mám tam dobrou kamarádku Cecilii Nawkec. Samozřejme, že tu múžete přenocovat“, wona wjesoła rjekny.

Lětsa je Serbski ludowy ansambl swoje nazymske koncertowanje do sakralneho ruma přepołožił. Zdobom je program w dalokej měrje wotpowědnje wusměrił. Prěni koncert 18. winowca w Budyskej Marje Marćinej cyrkwi wopyta něhdźe 70 hosći. Dalši je na pokutnym dnju w Bukečanskej cyrkwi planowany.

Hosćo w Budyšinje radowachu so nad dobrej zestawu a wězo tež nad zdokonjanym přednošowanjom wokalnych a instrumentalnych twórbow profesionalnych wuměłcow pod dirigatom Andreasa Pabsta. Poradźi so jim, tež pod ćežu tuchwilnych hygieniskich postajenjow dosć homogeny chórowy zwuk docpěć.

Sokoł Ralbicy/Hórki

– Zeleno-běli Hórki 2:1 (2:0)

Za Sokoł zasadźeni: Měškank – Rychtar, Schultz, Brězan, M. Žur, Brückner, Šołta, Zynda, Obst, Statnik, S. Žur, Krawc, Mi. Serbin, Ma. Serbin, Jakubaš

za Hórki zasadźeni: Matik – Bětka, Budar,­ Hartrumpf, Pannasch, Matješk, T. Čornak, Šmit, Šram, Handrik, Młynk, Bjedrich, Šołta, Domaška, R. Čornak

W Konjecach zjednoćichu so 7. nowembra 1975 koparjo z Delan a Hórkow do noweje jednoty „Traktor Ralbicy/Hórki“. Předsyda bu Jurij Frencl, wjednistwu přisłušachu Franc Młynk, Jan Wornar, Rudi Koch, Alojs Langa, Jakub Šołta, Joachim Ryćer, Měrćin Štrawba, Marja Krawcec a Beno Młynk. Najebać zjednoćenje před nimale 45 lětami maja Ralbičenjo a Hórčenjo swójske mustwo starych knjezow. Zašły pjatk běše zaso tak daloko, cyłkaj měrještej mocy pod swětłomjetakami w Ralbicach. W rjadach Hórčanow wuhladaš znatej mjezwoči Daniela Matješki a Clemensa Bětki, kotrajž běštaj za Sokoł wuspěšnje kopački we wobwodnej lize šnórowałoj.

Kopańca, wokrjesna liga, stafla 1

Frankenthal – ST Budyšin 4:2 (0:2)

Wjazońca – Lomn.-Großnaund. II 5:0 (3:0)

Kubšicy – Kinspork/Łužnica II 4:0 (1:0)

Huska/Hodźij – Wjernarjecy wupad

Arnsdorfske KT – Sepicy 2:0 (0:0)

Ottendorf-Okrilla – Wjelećin 8:1 (3:1)

Bretn.-Hauswalde – Haselbachtal 3:1 (1:0)

wokrjesna liga, stafla 2

Hórnik. jězor – Wulka Dubrawa 2:3 (2:1)

Wojerowski FC II – Łuty 5:2 (5:1)

Wósl./Skaskow/Kul. II – Njebjelč. wupad

Radwor – Rakecy IIwupad

Nadrózna Hrabowka – Malešecy 1:2 (1:2)

Minakał –Mały Wjelkow 4:1 (2:1)

Hlinowc – Chrósćicy II 5:2 (0:0)

1. Traktor Malešecy 5 11 : 5 12

2. ST Hlinowc 6 18 : 10 11

3. ST Radwor 4 14 : 2 10

4. ST 1896 Wulka Dubrawa 4 14 : 7 10

5. Módro-běli Minakał 5 9 : 4 10

6. HZ Wojerowski FC II 5 16 : 12 9

7. HZ Lubuš/Bluń 5 10 : 6 7

8. HZ Hórnikečanski jězor 5 12 : 9 7

9. HZ Rakecy II 4 6 : 10 6

10. ST Nadrózna Hrabowka 6 5 : 12 6

11. SJ Njebjelčicy 5 8 : 9 5

12. SJ Chrósćicy II 5 9 : 11 5

13. FSV Łuty 5 5 : 10 4

14. HZ Wóslink/Sk./Kulow II 4 10 : 9 3

15. ST Mały Wjelkow 6 4 : 35 0