Z wudaća: wutora, 20 julija 2021

Bad Münstereifel (dpa/SN). Zwjazkowa kanclerka Angela Merkel (CDU) je so dźensa w Sewjerorynsko-Westfalskej wo połoženju po zahubnych zapławjenjach wobhoniła. Zhromadnje z ministerskim prezidentom Arminom Laschetom (CDU), kanclerskim kandidatom CDU/CSU, poby wona w Bad Münstereifelu. Město bě wot wulkeje wody wosebje po­trjechene a zapusćene. Merkel rěčeše tam ze zastupnikami pomocnych organizacijow, pomocnikami a potrjechenymi. Minjeny kónc tydźenja wopyta wona katastrofowy region w Porynsko-Pfalcy.

Podstupim (dpa/SN). Po wudyrjenju afriskeje swinjaceje mrětwy w plahowarni swini w Braniborskej chcedźa přenjesenje wirusa spěšnje rozswětlić a přepytować, kak je so wirus do wobstatka potrjecheneho ratarskeho biozawoda předrěć móhł. To rjekny Felix Prinz zu Löwenstein, předsyda Zwjazka ekologiskeho ­žiwidłoweho hospodarstwa, na napra­šowanje powěsćernje dpa. Pady mrětwy běchu minjeny pjatk w zawodźe z 200 swinjemi w Neiße-Malxetalu njedaloko Choćebuza zwěsćili.

Biozawod njeje na zakładźe hamtskeho wukaza hižo wot septembra 2020 swinje wjace pod hołym njebjom dźeržeć směł. „Plahowanje zwonka chlěwa njepřińdźe jako přičina infekcije tuž do prašenja“, praji Prinz zu Löwenstein. Zawod z 200 swinjemi je tež wšitke krute naprawy škita před infekcijemi dodźeržał. Z wida zu Löwensteina dyrbjeli na žórła myslić, kotrež móhli tež konwencionalnym planowarjam strašne być, kaž faktor čłowjek abo pica. „Je nuznje trjeba, šćěpiwo přećiwo mrětwje wuwić a zasadźić.“

Na turistiske regiony Sakskeje knježi lětsa zaso chětro wulki nawal

Lipsk (dpa/SN). Bjezposrědnje do lětnich prózdnin w Sakskej knježi wulki nawal skazankow w turistiskich kónčinach. Kaž hižo loni je koronapandemija zajim ludźi za dowol w Němskej sylniła. Dowolnicy, kotřiž so krótkodobnje rozsudźa, na­makaja přeco hišće nóclěh. „Wuběr pak wjace jara wulki njeje“, rěka mjez druhim z Rudnych horin. Wosebje přenocowanja blisko jězorow a rěkow su woblubowane. „Turizm w Němskej 2021“ je jara prašany, rjekny Kathrin Winkler, jednaćelka turistiskeho zwjazka Łužiska jězorina. „Naprašowanja su aktualnje jara dobre. ­Předewšěm do lětnich prózdnin mamy hižo nětko nimale stoprocentowske wućeženje. Tež we Łužicy su přenocowanja hišće móžne. Štóž pak pyta nóclěh blisko jězorow, ma jenož hišće mało móžnosćow.

Budyska wagonownja, pišćeletwarc Eule abo nowa wulce moderna płunowa tepjernja na Mužakowskej – čłowjek so stajnje zaso dźiwa, kelko wšelakich zawodow w Budyšinje eksistuje. Štož tudyše měšćanske zarjadnistwo kóžde lěto we wobłuku „pózdnjeje změny“ organizuje, je jara chwalobne. Dalše města kaž Wojerecy a Biskopicy Budyskemu přikładej mjeztym sćěhuja. Zajimawy je tež starobny přerězk wobdźělnikow. Poprawom wšak bě „pózdnja změna“ za to myslena, młodostnym móžnosće wukubłanja takrjec live předstajić a jich za powołanje zajimować. Ličba młodostnych, znajmjeńša tych, kotrychž sym sam widźał, pak je jara wobmjezowana. Za to su něhdyši sobudźěłaćerjo mjez wopytowarjemi, zajimowani rentnarjo abo swójby z dźěćimi. A cyle připódla so čłowjek praša, hač móhł sej předstajić ­tajke abo hinaše powołanje wukonjeć ­a wšědnje sam při mašinje stać. Na kóždy pad pak wopytowar, wšojedne kak stary je, něšto přiwuknje. Marko Wjeńka

Mnichow (dpa/SN). Wysoke podruže, mało městna a nazhonjenja z koronapandemije – dźeń a wjace ludźi ma žiwjenje we wulkoměsće syte a chce je wopušćić. To je woprašowanje Mnichowskeho instituta Ifo wunjesło. Wjace hač kóždy wosmy wobydler (12,9 procentow) městow z wjace hač 500 000 wobydlerjemi chce město w běhu jednoho lěta wopušćić. Nimale połojca mjenuje koronu jako najwažnišu přičinu rozsuda, do wsy abo mjeńšeho města ­so přesydlić. Hač wšitcy swoje předewzaće zwoprawdźa, njeje přiwšěm wěste, praji zamołwity studije Mathias Dolls.

Napadne je, tak měni Dolls, zo nimaja ludźo zwonka wulkich městow žanu žadosć do nich ćahnyć. Wězo tež dale ludźo do wulkich městow poćahnu. Wobmjezowanjow koronapandemije dla pak su města na atraktiwnosći přisadźili. Hłowny zaměr wučerpanych wobydlerjow wulkoměstow su zwjetša mjeńše města abo kromy wulkoměstow. Wosebje swójby z małymi dźěćimi abo ludźo, kotřiž runje swójbu załožeja, chcedźa do nakromnych kónčin metropolow abo samo do wjesnych kónčin, studija zwěsća.

Budyšin (CS/SN). Mjeztym štwórty króć běchu ludźo minjeny pjatk popołdnju na „pózdnju změnu“ přeprošeni. Je to wot Budyskeho měšćanskeho zarjadnistwa organizowana jězba, kotraž zmóžnja dohlad za kulisy wšelakich Budyskich zawodow. Někotre z cyłkownje dźewjeć čarow běchu spěšnje wuknihowane, tak tež ­čara čo. 6, kotraž wjedźeše mjez druhim k zhotowjerjej pisakow Edding a do Wulkodubrawskeho zawoda za graty prasowanskich wudźěłkow.

Wosom hólcow a holcow wobdźěli so wčera w Budyskim hosćencu „Wjelbik“ na warjenskim kursu dźěćaceho časopisa Płomjo. Dwě hodźinje su woni zhromadnje z kucharjom Tomašom Lukašom wobšěrny meni nawarili. Starši abo dźědojo a wowki ­smědźachu sej skónčnje tomatowu solotej, nudle ze spinatom a rybu kaž tež šokolodowy mousse z jahodami słodźeć dać. Bě to ­mjeztym dźewjaty króć, zo je Płomjo warjenski kurs přewjedło. Foto: Pětr Šołta

Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často pak maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa hosćenc při lěsnej kupjeli w Nižej Wsy. (3)

Runje tak lóštne kaž zabawne popołdnjo dožiwi předwčerawšim něhdźe 40 Drježdźanskich Serbow wšěch generacijow. Hdźež so w sakskej stolicy hewak serbske kemše wotměwaja, zanjese młodym swójbam z dźěćimi a staršim wopytowarjam Spěwny consorcium seniorow na swoje njezaměnliwe wašnje sep serbskich ludowych a dalšich pěsnjow. Hižo před połdra lětom běchu spěwarjo Drježdźanskim Serbam koncert namjetowali, korony dla móžachu jón hakle nětko zwoprawdźić. Za spěwne poskićenja so Carla Šołćic w serbskej narodnej drasće mužam dźakowaše, publikum pak zanjese jim trójnu „Sławu“. Při zhromadnym kofeju knježeše na to lóštna bjesada. Foto: Jadwiga Pjacec

Sakska turistiska ministerka Barbara Klepsch w klóšterskej zahrodźe

Pančicy-Kukow (SN/MWj). Turizm we wjesnej kónčinje Sakskeje a w tym zwisku róla Křesćansko-socialneho kubłanskeho skutk (CSB) a krajneho kuratorija za wjesnu kónčinu stejachu w srjedźišću dźěłoweho wopyta sakskeje ministerki za turizm Barbary Klepsch (CDU) wčera připołdnju w zežiwjenskim a zelowym centrumje klóštra Marijineje hwězdy w Pančicach-Kukowje. Z njej rozmołwjachu so mjez druhim zapósłancaj Sakskeho krajneho sejma Patricia Wissel a Alojs Mikławšk (wobaj CDU), předsydka CSB Marja Michałkowa kaž tež jeho jednaćel Peter Neunert.