Z wudaća: štwórtk, 29 julija 2021

Smjertny wopor kupanja

Běła Woda. Tragiske njezbožo při kupanju sta so wčera popołdnju w tak mjenowanym Twarožkowym haće w Běłej Wodźe. Tam njebě so 41lětny muž z kupanja wróćił. Wot swědka alarmowani policisća a wobornicy za nim zhromadnje z nurjerjemi a helikopterom pytachu. Něhdźe po hodźinje jeho z wody wućahnychu. Lěkar pak móžeše jenož hišće smjerć znjezboženeho zwěsćić. Bliše wobstejnosće nětko přepytuja.

Na Morawje so za serbsku pomocnu akciju dźakuja

Pisany serbsko-słowjanski podawk ze so­cialnym pozadkom dožiwi nimale 300 wopytowarjow minjenu njedźelu na dworje Chróšćanskeje fary. Wjacore serbske kulturne cyłki su jich ze swojimi poskićenjemi zawjeselili. Bě to beneficny koncert, na kotrymž zběrachu pjenjezy we wobłuku pomocneje akcije Towarstwa Cyrila a Metoda (TCM) „Łuži­ca pomha“.

BFC Dynamo –

FC Energija Choćebuz 2:1 (1:0)

Zestawa hosći: Stahl – Hofmann, Kauter, Hildebrandt, Borgmann, Eisenhuth (77. Kujović), Erlbeck, Putze, Kremer (64. Badu), Pronichev (90. Rahn), Engelhardt.

W jich tradicionalnym sportowym foru­mje je FC Energija koparjam BFC Dynama tónraz dobyće na tableće serwě­rowała. Jenož w prěnim połčasu bě BFC lěpši hač hosćo z Choćebuza a docpě hižo w 13. min. nawjedowanje 1:0.

Po přestawce pak Delnjołužičenjo domi­nowachu. W 54. min. woni wurunachu a wot toho časa partiju postajachu. Dosahało je přiwšěm jeničce za jedne wrota z jich strony. Wulkošansy njemóžeštaj Max Kremer (64.) a Erik Engelhardt – pjeć metrow před wrotowej liniju swobodnje stejacy (67.) – wužić. K tomu dósta BFC w druhej mjeńšinje podlěšenja před wrotami hosći hišće raz wólny kop. Wrotar Toni Stahl pak njetrjebawši swój kašćik wopušći, a Andor Bolyki njeměješe žane ćeže, bul do prózdnych wrotow zhłójčkować. Tak lochko docpěchu koparjo z Berlina-Hohenschönhausena swoje druhe sezonowe dobyće.

2. hrajny dźeń w regionalnej lize sewjerowuchod

Rathenow – Lokomotiwa Lipsk 0:3

BFC Dynamo – Choćebuz 2:1

Luckenwalde – Eilenburg 1:0

Chemija Lipsk – Halberstadt 0:2

Hertha BSC II – Meuselwitz 1:0

Lichtenberg – Tasmania Berlin 1:1

Tabulka regionalneje ligi po druhim hrajnym dnju

1. Germania Halberstadt 2 6 : 0 6

2. BFC Dynamo 2 6 : 2 6

3. Berlinski AK 2 4 : 1 6

4. Tasmania Berlin 2 3 : 1 4

5. VSG Altglienicke 2 3 : 2 4

6. FSV 63 Luckenwalde 2 2 : 1 4

7. Kamjeničanski FC 2 4 : 3 3

8. Union Fürstenwalde 2 5 : 5 3

9. Lok Lipsk  2 4 : 4 3

9. Tennis Borussia Berlin  2 4 : 4 3

11. ZFC Meuselwitz 2 1 : 1 3

12. SV Babelsberg 2 2 : 3 3

13. Hertha BSC II 2 1 : 4 3

14. FC Energija Choćebuz 2 2 : 3 1

15. FC Eilenburg 2 1 : 2 1

15. SV Lichtenberg 47  2 1 : 2 1

17. BSG Chemija Lipsk 2 1 : 3 1

18. Optik Rathenow  2 1 : 4 1

19. FC Carl Zeiss Jena 2 1 : 3 0

20. VfB Auerbach 2 3 : 7 0