Z wudaća: wutora, 30 nowembera 2021

Erfurt (dpa/SN). We wjacorych městach Sakskeje a Durinskeje su wčera zaso tysacy ludźi na njepřizjewjenych demonstracijach přećiwo wobmjezowanjam koronawirusa dla protestowali. W Erfurće wobdźěli so 650 ludźi. K protestam dóńdźe po informacijach policije tež w Drježdźanach, w Nowym měsće, Pirnje, Sebnitz, Riesy a Großenhainje. Policija ludźi namołwješe městnosć wopušćić, dokelž su tuchwilu koronapandemije dla jenož zarjadowanja z maksimalnje dźesać wosobami dowolene. W Freibergu bě so něhdźe 700 ludźi na „přechodźowanje“ zhromadźiło. Policija demonstrantow hač na kromu města přewodźeše.

Karlsruhe (dpa/SN). W aprylu 2021 wukazane zwjazkowe nuzowe borzdźidło ze zakazami, dom w nocy wopušćić, z kontaktnymi wobmjezowanjemi a ze zawrjenjom šulow koronapandemije dla je wustawje wotpowědowało. Tole je zwjaz­kowe wustawowe sudnistwo dźensa wobzamknyło, wotpokazujo wjacore skóržby. Naprawy su drje wobšěrnje do wšelakich zakładnych prawow ludźi zasahnyli, „běchu pak hladajo na wulke wohroženje přez pandemiju“ zakonske. Hladajo na zawrjenje šulow připózna­waja sudnicy prěni króć scyła „prawo ­na šulske kubłanje dźěći a młodostnych napřećo statej“.

Wusud je wažny zakład dźensnišich wuradźowanjow zwjazkoweho knježerstwa ze zastupjerjemi zwjazkowych krajow wo móžnych nowych naprawach. W někotrych krajach wo tym rozmysluja, nuzowe borzdźidło znowa wukazać.

Drježdźany (dpa/SN). Nowe tarifowe zrěčenje za zjawnu słužbu zwjazkowych krajow woznamjenja za swobodny stat Saksku za přichodnej lěće přidatne wudawki nimale 200 milionow eurow. Financne ministerstwo w Drježdźanach planuje po wčerawšich informacijach klětu něhdźe 85 milionow a 2023 něhdźe 112 milionow eurow wjace hač lětsa. Klětuše přidatne pjenjezy su hižo składowane, wudawki za 2023 chcedźa w přichodnych wuradźowanjach wo etaće kraja zaplanować, ministerstwo zdźěla.

„Tarifowe zwyšenja su stajnje trajace brěmjo do přichoda, a to při hižo nětko wobstejacym deficiće w etaće za přichodnej lěće“, rjekny financny minister Hartmut Vorjohann (CDU) powěsćerni dpa. Dołhodobne poćežowanje dale přiběra a zniža móžnosće kraja nastupajo wudawki na druhich městnach. Personalne kóšty wučinjeja hižo nětko 38 procentow. Po tarifowym dojednanju dóstanu přistajeni zjawneje słužby wot decembra 2022 wo 2,8 procentow wyšu mzdu a w měrcu 2022 premiju 1 300 eurow korony dla.

Sakske uniwersity mjez wukrajnymi studentami nadal woblubowane

Lipsk (dpa/SN). Woni pochadźeja z Chiny, Kanady, Awstralskeje, Italskeje a dalšeho wukraja: Najebać koronapandemiju su sakske wysoke šule mjez studowa­cymi dale wob­lubowane. Přirunujo z lětom 2020 zajim za studij w swobodnym staće na mnohich městnach zaso při­běra, kaž naprašowanje powěsćernje dpa wujewja. Při­wšěm wostawa imatrikula­cija wukrajnych studentow koronakrizy a płaćiwych wobmjezowanjow pućowanja dla dale wobćežna naležnosć.

Kajka to překwapjenka: Wot nowembra wuknu w Drježdźanach zajimcy serbšćinu na ludowej uniwersiće (VHS). Z jědnaće wobdźělnikami je kurs lěpje wopytany, hač běchu w přihotach na nazymski semester 2021/22 na kubłanišću planowali. Cyle připódla prajene: Je to prěni króć, zo tajki poskitk na ludowej uniwersiće w sakskej stolicy maja. Mjeztym drje běži wučba korony dla online, ale wobdźělnicy su Jadwize Pjacec, kotraž kurs nawjeduje, swěrni. Přirunuješ-li situaciju tam z tej w Budyšinje, maja so w Drježdźanach lěpje. W Budyskim zarjadnišću dźě tuchwilu kurs serbšćiny njeposkićeja. Tež online rěč wuknyć njemóžeš. Runje tak je to z čěšćinu a ukrainšćinu. To znajmjeńša z poskitka Budyskeje VHS w interneće sćěhuju. Kajka to rozdźělna situacija w městomaj! Nochcu přičiny za zjaw na łužiskim kubłanišću pytać. Jenož telko: Angažement towarstwa Stup dale a jeho předsydki Jadwigi Pjacec a VHS w Drježdźanach mam za wulce hódny a njewočakowany. Milenka Rječcyna

W zawodźe za wudobywanje zornowca w Zemicach-Tumicach je so minjeny štwórtk paliło. Wokoło 16.15 hodź. wołachu wjesnu wohnjowu woboru a susodne wobory do zawoda. We wulkej křidowej hali palachu so wjacore běžate pasy a mašiny. Sylneho kura dla alarmowachu dalšich wohnjowych wobornikow, kotřiž maja škitne maski. Nimo toho dyrbjachu hadźicy kłasć, zo bychu dosć wody ze spjateho jězora a z wulkeho, 30 000 litrow wobsahowaceho zběrnika měli. Něhdźe 60 wohnjowych wobornikow bě hač­ do pózdnjeho wječora zasadźenych, zo bychu płomjenja po­dusyli. Fachowcy nětko přepytuja, štó bě woheń zawinił. Foto: Rocci Klein

Podstupim (dpa/SN). Ličba kónčin z wosebje wulkimi ličbami natyknjenjow z koronawirusom w Braniborskej dale přiběra. Wot wčerawšeho njesmědźa nješćěpjeni w Choćebuzu w nocy hižo dom wopušćić, po tym zo bě sydomdnjowska incidenca z 927,1 tam hižo štwórty króć za sobu hódnotu 750 překročiła. K po­trjechenym kónčinam słušeja tež Frankfurt nad Wódru a pjeć wokrjesow. Ze 796,5 nowoinfekcijemi na 100 000 wobydlerjow je wčera tež wokrjes Wódra-Sprjewja hranicu tak mjenowaneje hotspot-kónčiny překročił. Połoženje ko­ro­na­wirusa dla so w Braniborskej wšědnje přiwótřa, kaž rěčnik strowotniskeho mi­ni­sterstwa Dominik Lenz zdźěli. Wuće­ženje łožow na intensiwnych stacijach bliži so po wšěm kraju z 19,5 procentami čerwjenej liniji 20 procentow. Lenz na to pokaza, zo je wjele dźěći a młodostnych wot korony potrjechenych. „Bohužel přiběraja tež infekcije mjez wyšimi starob­nymi skupinami, hdźež je strach ćežkeho schorjenja wosebje wulki.“ Sydomdnjowska incidenca w Braniborskej wučinja mjeztym 725,6. To je po Sakskej a Durinskej třeće městno w Němskej.

W rěčnišću Sprjewje blisko Budyskeje Sprjewineje hasy maja tuchwilu twarscy dźěłaćerjo nadawk, kromy wuporjedźeć. Po informaciji Sakskeho krajneho zarjadnistwa rěčnych zawěrow běchu so wjacore kamjenje pušćili. Te dyrbja nětko zaso kruće zatwarić. Z pomocu wulkich měchow, tak mjenowanych bigpackow, wodu tohodla wokoło twarnišća wodźa. Foto: Carmen Schumann

Runje tak kaž loni su tež lětsa nimale wšudźe adwentne wiki wotprajene. W Grodku pak su sej zajimawu alternatiwu wumyslili, a ta žněješe minjeny kónc tydźenja přewšo dobry wothłós.

Grodk (Jos/SN). W Grodkowskim nutřkownym měsće bě minjeny kónc tydźenja wjele ludźi na nohach, kotřiž njejsu hišće nadźiju spušćili, zo tež zaso lěpše časy hač tuchwilu dožiwja. Derje, zo bě jich poměrnje wjele. Měšćanski wabjenski kruh a měšćanske zarjadnistwo běštej na prěni swjedźeń swětła z wočinjenymi wobchodami přeprosyłoj. Tón poskitk mnozy wobydlerjo rady přiwzachu a na te wašnje pokazachu, zo maš w tychle časach nimo hodownych wikow tež hišće lěpšich rozrisanjow.

Fontena w gondlowym haće najčasćišo mjenowana

Wojerecy (AK/SN). Wobydlerski etat 2022 za město Wojerecy a jeho dźěle Brětnja-Michałki, Němcy, Hórnikecy, Čorny Chołmc a Ćisk poněčim konkretne formy nabywa. Kaž nowinska rěčnica Corin­na Stumpf informuje, skónči so 14. nowembra pjeć tydźenjow trajaca doba,­ zo móžachu wobydlerjo namjety zapodać. „Dóšło je 137 idejow wot 116 wosobow. 72 procentow wšitkich zapodawarjow měješe jedyn namjet, 19 procentow dwaj a něhdźe dźewjeć procentow samo tři.