Z wudaća: wutora, 11 januara 2022

Omikron Hornju Łužicu docpěł

Budyšin. Wirusowa warianta omikron je Budyski wokrjes docpěła. Krajnoradny zarjad je wčera dotal 17 padow wobkrućił. Incidencna hódnota mjeztym dale woteběra. Po RKI wučinja wona dźensa we wokrjesu 222,8. Wčera rozprawjachu wo 158 natyknjenjach z koronu a wo wosom smjertnych padach wot minjeneho pjatka. Wokrjes Zhorjelc zwěsći 171 infekcijow, třoch zemrětych a tři omikron-pady. Incidenca po RKI je tam 181,2.

Kulturny wuběrk

Budyšin. Kulturny wuběrk Domowiny je so wčera we wobłuku online-posedźenja skonstituował. Jeho jednohłósnje wuzwoleny předsyda je z Njebjelčic pochadźacy nowy čłon zwjazkoweho předsydstwa Feliks Ričel. Jemu poboku staj městopředsydka Franciska Grajcarekec a městopředsyda Jan Bělk, kaž třěšny zwjazk informuje.

Spěw wo Běłoruskej

W někotrych pjekarnjach wuhladamy tučasnje hižo prěnje ptačokwasne pječwo. W pjekarni Jeremias we Wulkej Dubrawje ­poskićeja hižo wot spočatka januara słódne kreacije, kaž baiserowe ptački a šokolodźane hněžka. „Něhdźe 15 wšelakich ­družin smy tule minjene lěta wuwili“, rjekny pjekarski mišter Martin Reck (na wobrazu). Foto: SN/Hanka Šěnec

Berlin/Flensburg/Budyšin (SN/JaW). Zwjazkowe ministerstwo za nutřkowne naležnosće, kotrež pod nowym knježerstwom Nancy Faeser (SPD) nawjeduje, zastojnstwo społnomócnjeneho zwjazkoweho knježerstwa za prašenja wusydlencow a narodne mjeńšiny bórze znowa wobsadźi. To zhonichu Serbske Nowiny dźensa na naprašowanje. Dotal pak njebu naslědnik dr. Bernda Fabritiusa (CSU) – wón je funkciju wot 11. apryla 2018 wukonjał – hišće powołany.

Ludowe nakładnistwo zhladuje na lěto z ćežemi a wuspěšnymi knihami

Budyšin (SN/CoR). Ludowe nakładnistwo Domowina móže najebać wšě ćeže dobru bilancu za zańdźene lěto předpo­łožić. „Powšitkownje – a to zawěsće tež za druhe zawody płaći – bě lěto 2021 korony dla we wěstej měrje wužadace. Mějachmy wosebje w prěnjej połojcy lěta ćeže z produkciju a ze zwičnjenjom nowostkow. Tak njeběchu žane zarjadowanja móžne, a mnohe předawanišća běchu zawrjene, wěsty čas tohorunja Smolerjec kniharnja. W druhej połojcy pak, jako so situacija polěpšowaše, je so nam poradźiło zarjadowanja zaso přewjesć a wažne wudaća na wikach prezentować“, rozłožuje jednaće LND Syman Pětr Cyž.

Radwor (pdź/SN). Dawid Wowčer a Danilo Dej wostanjetaj předsydaj Radworskeho młodźinskeho kluba. Čłonojo kluba su jeju na njedźelnej hłownej zhromadźiznje w zastojnstwje wobkrućili.

Kontaktnych wobmjezowanjow korony dla wotměchu młodostni wuradźowanje towarstwa, kotrež přisłuša Budyskej Domowinskej župje „Jan Arnošt Smoler“ Budyšin, w digitalnym formaće na platformje „jitsi“.

Nazornje a z pomocu wšelakich grafikow, tabulkow a přehladow rozłožistaj Wowčer a Dej skutkowanje cyłka w minjenym lěće, kotrež móžeštaj najebać koronu dosć pozitiwnje hódnoćić. Jako najwjetšej zjawnej projektaj wuzběhnyštaj wonaj staciju bičwolejbuloweje tury Radija Satkula, zarjadowanu w lěću na Ra­dworskim sportnišću, a wuhotowanje wubědźowanja Powerserb nazymu na tamnišej kupje. Wobě zarjadowani je serbska młodźina derje přiwzała.

Po wobzamknjenju sakskeho knježerstwa budu kulturnišća wot 14. januara znowa zjawnje přistupne, hdyž tež z wobmjezowanej kapacitu přihladowarjow a pod hygienowym prawidłom 2G. Jeničce diskoteki a kluby wostanu ­dale zawrjene.

Budyšin (SN/bn). Němsko-Serbske ludowe dźiwadło hrajnu dobu 2021/2022 po dwuměsačnej přestawce z třomi komedijemi dale wjedźe. 15. januara pokazaja inscenaciju „Der dressierte Mann“ na hłownym jewišću a klankohru „Dieter und der Wolf“ w Dźiwadle na hrodźe. Dźeń na to slěduje němska wersija krucha „Dołhož fenki běža“ we wulkim domje. Prěnja premjera lěta 2022 budźe 19. januara „Der Reichsbürger“ z Marianom Bulankom we hłownej róli.

Saarbrücken (dpa/SN). Šćěpjenske centrumy w Němskej hač do kónca lěta dale dźěłaja. To zdźěli ministerka za strowotnistwo Posaarskeje Monika Bachmann (CDU). Posaarska bě wotpowědnu próstwu konferency strowotniskich ministrow zapodała. A zwjazkowy minister za strowotnistwo Karl Lauterbach (SPD) je podlěšenje ertnje přilubił. Tak móža sobudźěłaćerjo centrumow nětko spušćomnje planować.

Dźěło Sassolija wuzběhnył

Rom (dpa/SN). Italski ministerski prezident Mario Draghi je zasadźenje zemrěteho prezidenta Europskeho parlamenta Davida Sassolija na dobro Europy wu­zběhnył. Sassoli bě „přeswědčeny Europjan“, rjekny 74lětny Draghi wo swojim krajanu. Draghi wupraji mandźelskej Sassolija a dźěsćomaj swoje sobužarowanje. W Florenzu rodźeny socialdemokrat je dźensa rano 65lětny zemrěł. Jeho běchu wot 26. decembra myleneho imunitneho systema dla w chorowni lěkowali.

Chudźi wosebje potrjecheni

Po wšej Němskej su wčera zaso tysacy ludźi přećiwo naprawam w zwisku z koronawirusom demonstrowali. W Budyšinje ­dóńdźe k namócnosćam, jako demonstranća spytachu rjećaz policistow přetorhnyć (hlej wobraz). Zastojnicy zasadźichu ­popjerjowy spray. Třo policisća so zranichu, jako demonstranća plesternaki a bleše na nich mjetachu. Foto: dpa/Bernd März

Homoseksualne amplowe poriki maja wot tohole tydźenja w Braunschweigu za wjace tolerancy wadźić. Cyłkownje wosom amplowych mužikow su ze štyrjomi žónskimi a štyrjomi muskimi porikami z małej wutrobičku narunali. Znački maja „signal tolerancy, wotewrjenosće a akceptancy jenakosplažneje lubosće być“, rjekny wyši měšćanosta Thorsten Kornblum (SPD) k zahajenju akcije.

Přemało spara a napinacy šulski dźeń stej wosomlětnemu pachołej w sewjernej Němskej zjawne pytanje policije wunjesłoj. Hólčec bě po šuli njedaloko Kiela do busa zalězł, doma pak njedojěł. Tak informowaštaj staršej policiju, kotraž zjawnje za nim pytaše. Busowy šofer je hólca skónčnje namakał – spjaceho w zadnim dźělu busa. Policija wosomlětneho na to domoj dowjeze.

Berlin (dpa/SN). Energijowa změna w Němskej njeje po posudku zwjazkoweho knježerstwa spěšna dosć. To je nowy minister za hospodarstwo a škit klimy Robert Habeck (Zeleni) dźensa při předstajenju swojeje „wotewrjenskeje bilancy“ w Berlinje zwěsćił. Po tuchwilnym stawje Němska lětsa a klětu swoje klimowe zaměry njedocpěje. Habeck rěčeše wo „drastiskich zastatkach“.

Nětko chce wón z „hnydomnymi naprawami“ spěšnosć w tym nastupanju powjetšić. Mjez druhim minister planuje natwar nowych wětrnikow pohonjeć. Komuny měli znajmjeńša dwaj procentaj swojeje płoniny za twar wětrnikow přewostajić. Twarske dowolnosće za nowe wětrniki chcył wón wolóžić a tuchwilu płaćiwe wotstawki wětrnikow k sydlišćam pomjeńšić. Za nowe přemysłowe twary chcył Robert Habeck „solarnu winowatosć“ zakonsce zakótwić. Tež priwatnym twarcam ma knježerstwo solarne připrawy nuznje poručić. Knježerstwo chce po tym puću podźěl wobnowjomnych energijow hač do lěta 2030 wot nětko 40 na potom 80 procentow podwojić.