W Porchowskej kupjeli witaja wobhospodarjo wot spočatka junija zaso hosći. Meteorologojo wšak přichodne dny ćopłe samo horce dny připowědźeja, na kotrychž ludźi zawěsće zaso za wochłódźenjom pytaja. W kupjeli čaka na nich wodowa přestrjeń z cyłkownje 3 000 kwadratnymi metrami, při čimž je wjeselo za wšitke starobne klasy zaručene. Foto: Steffen Unger
Zły Komorow (SN/BŠe). Wjele wobydlerjow we Łužicy zhladuje z wulkej starosću na trajacu suchotu, wšako je dale a mjenje wody k dispoziciji. Nimale we wšitkich rěkach ćeće tuchwilu mało wody a přichodne dny meteorologojo wjele spadkow njewěšća. Tež ze stron politiki so nětko něšto hiba. Tak chce sakske knježerstwo 27. junija zakładnu koncepciju wodoweho zastaranja 2030 předstajić. Suche lěta w zašłosći wšak su dopokazali, zo so klima měnja a suche periody z mało spadkami přiběraja.
Zwjazkowy etat wobzamknjeny
Berlin. Z přizwolenjom krajow je zwjazkowy etat wobzamknjeny. Z tym je wot dźensnišeho tež nachwilne hospodarjenje Załožby za serbski lud zakónčene. Wona móžeše lětsa dotal jenož spěchować, hdźež wobsteješe prawniska winowatosć.
Pomoc Ukrainjanam
Budyšin. Wot spočatka junija stara so jobcenter krajnoradneho zarjada Budyšin wo podpěru ćěkancow z Ukrainy. Za prašenja, za kotrež je wosobinska přitomnosć potrjechenych trjeba, dosaha, hdyž jedyn swójbny tam přińdźe. Za Ukrainjanow, kotřiž nětko hakle přińdu, płaći, zo maja so w zarjedźe za wukrajnikow přizjewić. Tón rozsudźi, hač smědźa we wokrjesu wostać abo hač jich na dalše zarjadnišća za přiwzaće ćěkancow w Sakskej rozdźěla.
Namjeznej kriminaliće zadźěwać
Zwjazk Łužiskich Serbow Domowina ze změnu strukturow wulku nadźiju na wozrodźenje serbskeje rěče zwjazuje. To zwurazni jeho předsyda Dawid Statnik wčera po zhromadnym posedźenju sakskeho a braniborskeho knježerstwa na Łužiskim motodromje a skedźbni při tym na delnjoserbski projekt „Zorja“.
Braniborski kabinet je wčera druhi krajny plan za skrućenje delnjoserbskeje rěče schwalił, kotryž bě kulturna ministerka Manja Schüle (SPD) zapodała. Dokument wobsahuje mjez druhim samozawjazk kulturneho ministerstwa, w serbskim wobłuku jenož hišće projekty z poćahom k rěči spěchować.
Podstupim/Šejkow (SN/at). „Braniborska profiluje so ze swojim druhim krajnym planom dale jako progresiwny mjeńšinowy region w Europje, wo tym sym přeswědčena“, rjekny braniborska kulturna ministerka Manja Schüle (SPD) wčera po wobzamknjenju krajneho knježerstwa nastupajo dalšu podpěru delnjoserbšćiny. Po słowach ministerki nječinja to, „dokelž mamy Serbow za folkloristiski přiwěšk. Ale dokelž tči w Serbach potencial, jónkrótny region Łužicu hromadu wjesć“. Schüle zdobom wuzběhny, zo woni „jako witalna žiwa skupina hižo nětko strukturnu změnu we Łužicy rozsudnje wobwliwuja“. A tohodla chce braniborske knježerstwo wot Zwjazka wuwabjene srědki za strukturne wuwiće we Łužicy w přichodnych lětach bóle za planowanje a wožiwjenje rěče zasadźować.
Wojerecy su dźěl modeloweho projekta komunalne wuwićowe přirady. Z iniciatiwu chcedźa předewšěm dowěru do demokratije skrućić. 10 000 eurow dóstanje město za zwoprawdźenje naprawow. Konkretna ideja, kotruž maja we Wojerecach předwidźanu, je „Zelena wobkroma“.
Wojerecy. (SN/AK) Wojerecy su dźěl cyłozwjazkoweho modeloweho projekta „Zhromadnje na městnje přichod wuhotować – komunalne wuwićowe přirady“. Tole podšmórny Wojerowski wyši měšćanosta Torsten Ruban-Zeh (SPD) wčera na posedźenju měšćanskeje rady. Ze štyrjomi dalšimi komunami so město wot meje 2022 hač do klětušeho oktobra na projekće wobdźěli.
Kaž w hornjołužiskej Niskej, w Arneburgu-Goldbecku w Saksko-Anhaltskej, w sewjerorynsko-westfalskim Kalletalu a Rottenburgu nad Neckarom w Badensko-Württembergskej ma tež we Wojerecach komunalna wuwićowa přirada nastać. Předewzaće iniciěrowałoj běštej zwjazkowa centrala za politiske kubłanje zhromadnje z Humboldt-Viadrina Governance platform gGmbh.
Berlin (dpa/SN). Zwjazkowy minister za strowotnistwo Karl Lauterbach (SPD) chce přistup do testowanskich centrumow za ludźi wobmjezować. Jenož hišće ludźo ze symptomami a wuzwolene skupiny ludźi kaž małe dźěći a samodruhe měli prawo měć, so na koronawirus testować dać. Tole wuchadźa z „nazymskeje strategije koronawirusa dla“. Lauterbach chcyše koncept na dźensnišej konferency strowotniskich ministrow w Magdeburgu předpołožić.
Zelensky za nowe sankcije
Kijew (dpa/SN). Ukrainski prezident Wolodymyr Zelenskyj žada sej wójny přećiwo swojemu krajej dla nowe sankcije EU přećiwo Ruskej. Sedmy paket sankcijow je tak spěšnje kaž móžno trěbny, rjekny Zelenskyj w swojim nócnym widejowym poselstwje. „Ruska dyrbi přiběracy ćišć wójny a agresiwneje antieuropskeje politika dla začuwać“, wón rjekny. Zdobom wón potwjerdźi, zo trjeba Ukraina nuznje dalše a tež ćežke brónje.
Koaliciske jednanja skónčene
Napity na policajsku stražu přijěł je 73lěty muž w sewjerorynsko-westfalskim Hagenje, zo by so w naležnosći ćeknjenja po njezbožu „na swoje njedobro“ wuprajił. Jako zastojnik wuprajenja zapisa, čuješe alkohol w powětře. Test wunjese nimale 1,5 promilow. Jězbnu dowolnosć jemu nablaku sćazachu. Nimo toho spisachu skóržbu jězdźenja pod wliwom alkohola dla – na njedobro 73lětneho.
Dwanaće metrow do hłubiny padnyła – a njezbožo přežiwiła – je žona na Rujanach. 41lětna je wčera wječor z třećeho poschoda wjaceswójbneho domu w gmejnje Dranske padnyła. Po wuprajenjach swědkow bě wona na swjedźenju wjetše mnóstwa alkohola piła a na woknowej desce rejwała. Skónčnje bě runowahu zhubiła a z wokna na łuku před domom padnyła. Ju dowjezechu zranjenu do chorownje.