Z wudaća: póndźela, 04 julija 2022

Saněrowanje Hórnikečanskeho jězora so dale dliji

Łaz (dpa/BŠe/SN). Saněrowanje Hórnikečanskeho jězora budźe so po wulkim zesunjenju zemje w měrcu 2021 hač do kónca lětdźesatka dlijić. Předewšěm dźe wo to zaso wěsty přistup zwoprawdźić, zdźěli minjeny pjatk Wyši hórniski zarjad. „Činimy wšitko, zo dźěła spěšnje a wěsće pokročuja“, wuzběhny rěčnik jednaćelstwa Łužiskeje a srjedźoněmskeje towaršnosće hórnistwoweho zarjadnistwa (LMBV) Bernd Sablotny. Saněrowanske kóšty wučinja znajmjeńša 30 milionow eurow. W zawrjenym wobłuku budu najprjedy stabilizowacy nasyp zhusćić. Po tym hodźi so jězor, kotryž słuša k najstaršim kumštnym wodźiznam Łužiskeje jězoriny, zaso za kupanje a čołmikowanje wužiwać.

Zamołwići chcedźa so wo to prócować, zo smědźa ludźo jězor hižo do zakónčenja saněrowanskich dźěłow wužiwać. Tole pak měło geotechnisce móžno być, wuzběhny Martin Herrmann z hórnistwoweho zarjada. Wuměnjenje je, zo so stabilizowacy nasyp zhusći, zo njemóhła so zemja znowa zesunyć.

Po dołhej busowej jězbje so nawróćiwši mnohich fanow w serbskich trikotach w Njebjelčicach wuhladać a zasłyšeć spěwanje přiwisnikow bě fenomenalne. Jako hrajer serbskeho mustwa podźakuju so tuž hišće raz za wašu sylnu podpěru přez cyły turněr. Hač wot doma abo w Korutanskej na městnje, zhromadnje z WAMI smy sebi tute do toho lědma předstajomne třeće městno ­wudobyli. Wulki dźak tohorunja wšitkim organizatoram, kotřiž běchu wot spo­čatka hač do kónca profesionalnje agě­rowali a so wo najlěpše wuměnjenja postarali. Wjeselimy so runočasnje nad tym, kotru euforiju a zdobom tež zajim za­móžachmy w běhu tutoho krótkeho časa za naš lud w tu- a wukraju wubudźić. Čim rjeńšo, zo nastupichmy tu jako mustwo z hornjo- kaž tež delnjoserbskimi hrajerjemi a zamołwitymi. Nadźijam so tuž, zo so potom za dwě lěće zaso wi­dźimy a znowa swjećimy: „Serbske ­mustwo, serbske mustwo, hej, hej“! Jan Bogusz

Sta zajimcow su so minjeny kónc tydźenja hłuboko do swěta bajow a powěsćow ­zanurili. We wobłuku 2. słowjanskeho bajkoweho festiwala Dešnjanskeho domizniskeho muzeja předstaji mjez druhim bajer Togomir powědku „Złote kubło“, Wiebke Schulz spřistupnja dyrdomdeje lutka a spěwytwórc Pittkunings rozłoži, „čehodla su Serbja němčinu nawuknyli“. Powědace dźiwadło pěstowacy ansambl Machandel ­na našim foće zahori přihladowarjow z hru „Trašny hósć“. Zarjadowarjo su ze swjedźenjom přewšo spokojom, mjenujo jón „nowu formu daledawanja serbskeho ­imaterielneho kulturneho herbstwa“. Foto: Babett Zenkerowa

46 młodostnym je biskop Heinrich Timmerevers wčera w Chrósćicach sakrament firmowanja wudźělił. Wulki dźěl holcow a wjele kmótrow bě w družčej resp. wuslěkanej drasće. W swojim prědowanju biskop młodostnych namołwješe, ze swjateho ducha wuchadźacy pokoj přiwzać a druhim ludźom dale dawać. Božu mšu wobrubili su Chróšćanski cyrkwinski chór a wosadni dujerjo. Po kemšach dóńdźe k rozmołwje mjez biskopom a firmujomnymi. Foto: Lea Kralec

Bukecy (CS/SN). Jedyn z wjerškow swjedźenskeho kónca tydźenja k 800. jubilejej Bukec bě sobotu popołdnju serbsko-němski dworowy swjedźeń na farskim dworje z něhdźe 150 wopytowarjemi. ­Zahajili su jón z nyšporom, kiž swjećeše farar Thomas Haenchen. Při tym wopy­towarjo wšitke kěrluše serbsce spěwachu a so tohorunja serbsce modlachu. Zapřijate běchu mjez druhim holcy ze serbskeje drastoweje skupiny kaž Martha Dammlerec z Trjebjeńcy, kotraž bě narodnu drastu konfirmandki zwoblěkana.

Mato Krygaŕ a Marko Grojlich předstajištaj na to w třoch skupinach ewangelsku serbsku narodnu drastu Bukečanskeho regiona a jeje najwšelakoriše wosebitosće. Při tym Marko Grojlich jednotliwe drasty serbsce rozłoži, Mato Krygaŕ ju němskim wopytowarjam w jich maćeršćinje rozkładźe. Mjez jednotliwymi skupinami postara so kapała Holaski hudźbnje wo dobru naladu mjez publikumom.

Nowy projekt biosferoweho rezerwata móhł lěpšiny přinjesć

Njeswačidło (JK/SN). Na minjenym posedźenju Njeswačanskeje gmejnskeje rady narěča radźićel dr. Dietrich Butter (Zhromadnosć towarstwow) nowy projekt wjednistwa biosferoweho rezerwata Hornjołužiska hola a haty. Tutón projekt, ­kotryž so „Wild – Natur“ mjenuje, je dźěl naprawow we wobłuku strukturneje změny, kotryž z tutoho žórła financuja. Hač do lěta 2026 steji za region 22 milionow eurow k dispoziciji. Tele pjenjezy chcedźa přewažnje za to nałožować, wu­twarić a skrućić turistisku infrastrukturu w regionje biosferoweho rezerwata.

Palčikaj a sowu pokradnyli

Budyšin. Njewšědnje chrobłe padustwo sta so sobotu wječor w Budyšinje. Krótko do 19 hodź. přijědźe wosobowe awto na ležownosć při Lubijskej dróze. Sobujěduca žona wulěze, wza sej zahrodowej palčikaj kaž tež sowu a sydny so zaso do awta, kotrež na to wotjědźe. Wšitke tři figury běchu z keramiki. Škoda wučinja ně­hdźe 60 eurow. Wobsedźerka ležownosće je padustwo wobkedźbowała a sej na zbožo awtowe čisło spomjatkowała. Kriminalna słužba Budyskeho policajskeho rewěra pad nětko přepytuje.

W bydlenskim domje w Trjebinje je minjeny pjatk popołdnju z dotal njeznateje přičiny woheń wudyrił. Alarmowani wohnjowi wobornicy dyrbjachu wjacore wosoby z domu wuchować a započachu na to hašeć. Za to wołachu dalše wohnjowe wobory wo pomoc, tak zo rozpřestrě so hašenje na wulkozasadźenje wobory. Nimo wosobow wuchowachu wobornicy tohorunja štyri psy z twarjenja. Poćežowace při hašenju bě, zo bě na třěše solarna připrawa instalowana. Hłowna dróha před domom bě dlěši čas dospołnje zawrjena. Dohromady bě něhdźe 80 wohnjowych wobornikow z wjacorymi jězdźidłami zasadźenych. Bydlenski dom so najprjedy raz wužiwać ­njehodźi. Foto: Lausitznews/Christian Essler

Chrósćicy. We wobłuku rjada Zynki a linki čita Tomaš Kliman srjedu, 6. julija, w 19.30 hodź. na Chróšćanskej Krawčikec žurli štyri mjenje znate powědančka fararja, spisowaćela a přełožowarja Jurja Wingera (1872– 1918). Prěnje a najznaćiše powědančko „Hronow“ wo času Třicećilětneje wójny napisa rodźeny Chróšćan lěta 1893. Po přikładźe pólskeho spisowaćela H. Sienkiewicza, kotrehož dźěła tež přełožowaše, chcyše ze swojimi historiskimi powědančkami Serbam pomhać wuwiwać swójsku stawiznisku powědacu literaturu. Tola tež rjad reportažow z pućowanjow po tu- a wukraju a dźiwadłowe hry słušeja do jeho tworjenja. Hudźbnje wobrubi čitanje z twórbami Bjarnata Krawca Soyoung Kim na klawěrje. Za­rjadowanje wospjetuja štwórtk, 7. julija, w 19.30 hodź. w Budyskej Röhrscheidtowej bašće.

Pančicy-Kukow (JR/SN). Přewšo dobra nalada knježeše sobotu wječor mjez ně­hdźe 100 hosćimi spěwneho wječora w Pančicach-Kukowje. „Zejler w nowym fraku“ bě hesło zarjadowanja na wupyšenym Błažikec-Kaulfürstec statoku, na kotrež bě skupina Wólbernosće přeprosyła. Třistronski statok wědźeše spěwne ćěleso derje wužić, k zahajenju zaspěwachu spěwarjo Krystof Rjeda, Pětr Cyž a Fabian Kaulfürst wjerš „Ja sym najrjeńši serbski cowboy“ jedyn po druhim z hinašeho městna, pak hladajo z woknom abo z wrotow. Přidružichu so spěwarki Jadwiga Kaulfürstowa, Juliana Kaulfürstowa, Jadwiga Nukowa a Judit Šołćina, kotrež tohorunja kóžda z hinašeho městna spěwachu. Na to nastupichu so Wólbernosće před domskim statoka a zanjesechu „Słónco chcu ja měć“ a „Pod běłej brězyčku“. Po tym z publikumom zhromadnje „Hanka, budź wjesoła“ zaspěwachu, za čož su wšitke štučki na internetowej stronje wozjewili. Tuž móžeše publikum šmóratka wužiwajo mócnje sobu spěwać. Za to měješe pozdźišo dalšej składnosći ze spěwomaj „Z dychom swjatoh’ Jana“ a „Lubka Lilija“.