Z wudaća: wutora, 02 awgusta 2022

FC Energija Choćebuz – SV Werder Bremen 1:2 (0:1)

Zestawa FCE: Sebald – Hasse (76. Heike), Hildebrandt, Slamar (46. Eisenhuth), Borgmann, Kujović (76. Badu), Hofmann, Geisler (46. Juckel) – Milde, Hottmann, Abu-Alfa (46. Oesterhelweg)

Zestawa SV Werder Bremen: Pavlenka – Pieper, Veljković, Friedl, Weiser, Groß, Buchanan, Bittencourt (70. Stage), Schmid (90. Rapp), Füllkrug, Ducksch (90. Burke).

Na kóncu njeje za FC Energiju za dalše wobdźělenje na pokalnym wubědźowanju DFB dosahało. Zastupjer štwórteje ligi pak bu po poražce 1:2 wot fanow frenetisce swjećeny, bě tola regionalny ligist specielnje w druhim połčasu cyłkej z Bremena ze zwjazkoweje ligi zasakły bój skićił, po kotrymž so sewjerni Němcy na kóncu zasłužbnje z dobyćom rozžohnowachu.

W prěnjej połojcy přewostajichu hosćićeljo swojim hosćom přejara hrajnu režiju, jako steješe FCE přehłuboko, zo by tam nadběhi wočakował. Tak bě to hišće dobry wuslědk za nich, kaž hrajerjo FC Energije pozdźišo sprawnje přiznachu.

SJ Chrósćicy – Póst Germania Budyšin 0:0

Zasadźeni hrajerjo SJC: Králíček, Škoda – Matješk, Sentiwan, Runt, Zynda, Kreuz, G. Zahrodnik, Hawš, M. Zahrodnik, Matik, Młynk, Krawc

Tydźeń do starta do noweje sezony steješe za hrajerjow SJC dwójny test na planje. Pjatk testowachu přećiwo Póst Germaniji z Budyšina a sobotu přećiwo dalšemu wokrjesnemu wyšemu ligistej ST Hnašecy/Dobruši.

FC Energija Choćebuz – Borussia Hildesheim 2:0 (1:0)

Zestawa FC Energije: Sebald (46. Bethke) – Milde (46. Hasse), Eisenhuth, Slamar (90. Kaizer), Borgmann, Hofmann (46. Böhmert), Kujović (66. Juckel), Geisler, Badu (46. Wähling), Hottmann (66. Heike), Oesterhelweg (46. Abu-Alfa/90. ­Wagner)

Zmužitosć a nadźiju su hrajerjo FC Energije Choćebuz na jich poslednim tesće do zahajenja sezony natankowali. Přećiwo lońšemu dźesatemu regionalneje ligi sewjer, Borussiji Hildesheimej je so jim wuspěch 2:0 poradźił. A tón bě w kóždym nastupanju zasłuženy.

Z Hildesheimskimi mějachu Choćebuženjo chětro česćelakomneho přećiwnika před hrudźu, kotryž runaše so we wašnju hraća mustwu z łužiskeje metropole. Stajnje buchu škitarjo Energije na trawniku hižo při natwarje jara zahe nadběhowani. Tuž trjebachu ći šwarnu kopicu idejow, zo bychu bul při wotewrjenju hrajerjow w swójskich rjadach dźerželi a běžeć dali. Tole poradźi so jědnatce FCE jara šwarnje, wšako buchu tež w lěćnej přestawce znowa zawjazani hrajerjo teama bjezposrědnje porjadnje zasadźeni.

Po dwěmaj lětomaj přestawki koronapandemije dla přewjedu lětsa wot započatka apryla hač do srjedź septembra zaso winowatostne a pokalny hry we wólnočasnej koparskej lize starych knjezow. Tež Sokoljo z Ralbic su so znowa přizjewili. Woni pak maja lětsa chětro ćeže swój rytmus a hrajny niwow lět do nanuzowaneje přestawki docpěć. Cyłkownje hraje wosom mustwow w stafli. Mustwowy nawoda Sokołow Maik ­Brězan poda dźensa zjimanje ­prěnjeje połserije.