Z wudaća: srjeda, 03 awgusta 2022

Róžant. Po wšěm zdaću wot 15. do 26. awgusta ponowja statnu dróhu S 92 mjez Róžantom a Smjerdźacej. Puć dóstanje nowu asfaltowu worštu. Kaž krajnoradny zarjad zdźěli, budźe dróha za to dospołnje zawrjena. Wobjězdka powjedźe do wobeju směrow po S 97 a K 9232.

Techno při skale

Miłoćicy. Pjatk, 5. awgusta, zahaji towarstwo Meta Solis swój lětuši festiwal samsneho mjena při Miłočanskej skale. Mjez druhim zahudźi Paul Geigerzähler, elektronisku hudźbu prezentuja na přikład Ida Bux, Knytl, STOI a Ignomus. Zastup wučinja minimalnje 5 eurow.

Dwójce so paliło

Budyšin. K hašenju wołachu wohnjowu woboru předwčerawšim něhdźe w 20 hodź. do wjaceswójbneho domu na Einsteinowej w Budyšinje. Z dotal njeznateje přičiny paleštej so na šestym poschodźe njerjad a matraca. Zasadźenych bě wjace hač 40 wobornikow z dźesać jězdźidłami. Wobydlerjow hornich třoch poschodow dyrbjachu něhdźe hodźinu ewakuować. Po zhašenju płomjenjow móžachu woni zaso do swojich bydlenjow so wróćić. Zranił so nichtó njeje. Połojca šesteho poschoda bu kura a wohenja dla wobškodźena. Škoda wučinja něhdźe 30 000 eurow. Na nimale samsnym městnje je so sydom hodźin pozdźišo znowa paliło. Tež tónle woheń wobornicy spěšnje zhašachu. Wohnjowoborny fachowc je wčera za přičinami slědźił. Policija přepytuje podhlada zapalerstwa dla.

Šulerka dotalneho 10. lětnika Budyskeho Serbskeho gymnazija chce jedne lěto w Americe wuknyć

Hórčanka Lea Hajnec poda so přichodne dny na jednolětny dyrdomdej do USA. Bydlić budźe wona w jednej swójbje a chodźić kaž wšitcy druzy teenagerojo w Americe do šule. Milenka Rječcyna je so ze 17lětnej Serbowku rozmołwjała.

Kak je tomu dóšło, zo sće so rozsudźiła hić do kraja za oceanom?

L. Hajnec: Moja kuzina je mi wo tym powědała, zo je móžno dóstać za tajki přebytk stipendij. Wosebity poskitk zmóžnja kooperacija mjez ameriskim kongresom a zwjazkowym knježerstwom Němskeje. Poskitk měri so jeničce na wuměnu mjez USA a Zwjazkowej republiku Němskej. Je to potajkim zrě­čenje na najwyšej statnej runinje.

Kotre wuměnjenja sće dyrbjała spjelnić?

Njedawno wotmě so pola Łaza bič­wolej­bulowy turněr „29. VBH-Silbersee-Beachvolleyball-Turnier“. Hrajny niwow na nim z kóždym lětom stupa a samo hrajerjo za němske narodne mustwo su mjez tym pódla. Tute dwudnjowske wurisanje, z rejemi za hrajerki a hrajerjow sobotu wječor, je jara woblubowane a tohodla kóžde lěto hižo w zymje wukni­howane.

Wyši koparski ligist FSV Budissa Budyšin je zrěčenje z Christianom Noackom ­wo dalše lěto hač do 30. junija 2023 ­po­dlěšił. Wo tym informuja zamołwići wjednistwa w medijowej zdźělence. Kaž ze sobotneho wozjewjenja wuchadźa je 20lětny zakitowar na lěwym boku wšitke stacije dorostoweho wukubłanja w Budissy přeběžał. „Loni w lěću poradźi so jemu skok do 1. mustwa muži“, zdźěla koparske towarstwo na swojej inter­netnej stronje.

„Wjeselimy so, zo chce Christian swój puć w našim towarstwje dale kročić. Wón njeměješe w swojim prěnim lěće w 1. mustwje muži žanu jednoru sezonu. Přiwšěm smy wo nim a jeho kwalitach přeswědčeni. Hdyž Christian Noack dale pilnje na sebi dźěła, póńdźe přichodny krok a swoje wuwiće tam sam doprědka poćěri“, zwurazni wiceprezident Budissy Budyšin a zamołwity za 1. mustwo muži Sven Johne.